Sermon PJJ Tanggal 18-25 September 2022, Kepentaren Desken Tambar (Kuan-kuanen 12 : 18-25)

Sermon PJJ Tanggal 18-25 September 2022

Tema   : Kepentaren Desken Tambar (Kuan-kuanen 12 : 18-25)

————————————————————————————-

1. Kata Penaruh

Pentar ibas Kamus Bahasa Karo ertina bijaksana. Bijaksana ibas KBBI selalu menggunakan akal budinya (pengalaman dan pengetahuannya), arif, tajam pikiran, pandai dan hati-hati (cermat, teliti). Ibas Alkitab pentar ikataken alu istilah berhikmat ertina mbiar ras erkemalangen man Dibata. Nina ibas Mazmur 111:10a, “Bena-bena kepentaren eme erkemalangen man Tuhan. Man kalak si patuh man baNa iberekenNa kap pemeteh si mehuli”. Alu bage si eteh maka Tuhan nge si mereken kepentaren man manusia, emaka la banci lang manusia harus erkemalangen man Tuhan segelah-na jadi sekalak si pentar. Kepentaren enda lit dua (2) bagin : sada kepentaren ibas Dibata nari janah sada kepentaren si reh na ibas doni enda nari (bnd. 1 Kor. 2:6-16). Tentu renungenta kerna Kepentaren Desken Tambar eme kepentaren idur Dibata nari.

1. Mpebagesi Pengangkan Kerna Ogen

Kuan-kuanen 12:18-25 si jadi bahan PJJnta eme pedah-pedah Salomo      (pertenget Salomo). Ituriken maka: lit ranan si la erpepah (lancang mulutnya) ngelukai ukur / menyayat, bagi tikaman pedang. Ranan si megombang (menghina) erbansa ceda ukur si mbegi-mbegisa janah banci menusuk seh ku pusuh. Munuh labo alu pedang saja, tapi arah ranan si belasken kita pe megati kita enggo “munuh” kalak si deban. Ertina, labo saja kesah-na si bene bas ia nari, tapi banci jadi arah pengerananta mate semangat kalak si deban, mate karakter-na, rsd.

Tapi perlu tetap si inget, lit ka nge ranan si banci jadi tambar janah pepalem pusuh. Banci ranan si belaskenna e, tuhu-tuhu maba sada pengarapen / seberkas cahaya terang. Bage me si ipedahken Salomo ibas ay. 18 “Ranan si la erpepah banci ngelukai ukur kalak desken pedang, tapi kepentaren desken tambar si pepalemken”. Sienda ngataken maka adi cakap tuhu si belasken alu cara si teng-teng maka banci njadiken kerina mehuli. Tapi cakap si tuhu ibelasken alu cara siteng-teng tetap ibas nilai-nilai kebenaren labo ibas erti manis mulut.  Adi suara kenabian e tetap si peseh maka Dibata pro ras kita, tapi adi sura-sura manusia si sehken maka Dibata-nta, tentu nggo kontra ras kita. Janah jelas ikataken ibas ay. 19 maka “ranan la tuhu kentisik ngenca umurna”.

Perdiateken kalak si merancang kejahaten, pasti ia berusaha segelahna tercapai kejahaten na e, idaramina cara uga memperdaya kalak si deban. Tapi pada akhirna tetap terbukti maka ia nipu bana. Kalak si merencanakan kejahaten, alu pekulah-kulah ate-na erteman (bersahabat) ras kalak si deban, tapi pusuhna idemi alu kejahaten. Tapi amin gia bage, uga pe perencanaan kalak jahat alu tipu daya ibas pusuhna (pusuh picik) pasti akan terkuak, janah pe perlu si eteh maka sekalak penipu pasti akan tertipu (bd. Ay. 20). Tapi kalak si ndarami kiniulin nandangi kalak si deban maka kiniulina–na e jadi kepentaren si desken tambar; jumpa keriahen / sukacita.

Kalak si ncikep kebenaren Kristus la ijumpai-na cilaka, aminna melala pe perbeben si man hadapenna. Kalak bujur e labo banci bene, sebab Dibata kap ras-sa. Tapi adi kegeluhen kalak si jahat lalap jumpa kiniseran/kesusahen. Banci isalihken Tuhan Dibata adi-na lit pertobaten si tuhu-tuhu. Kalak si enggo nandai Dibata pe teridah arah nilai-nilai kegeluhen-na, labo icidah-cidahkenna kiniulin / kebujuren si ibahan-na. Labo perlu kai pe si ibahan-na si mehuli imomoken kempak jelma si nterem, tapi teruslah ngelakoken kiniulin ibas geluhta.

Kalak si mejingkat erdahin ialokenna me kuasa / keduduken. Kalak si la erlatih-latih, si nggit berjuang ras berusaha la banci lang ialokenna kepercayaan ibas kalak si deban nari si erbahanca sikap iakapna ndalani wari-warina, terlebih-lebih guna ngelitken keperlun geluhna. Ertina lit ije kesetian ras ketutusen ate arah dahin-dahin si idadapna. Tapi kegeluhen kalak si malas erbahanca latih akapna. Labo lit kalak si tek man bana pe, ia terjeng suruh-suruhen kalak ngenca, mesera iakapna ndatken kai si iperlukenna. Iterusken ay.25; Kendelen ate erbahanca tumpat ukur, piahna kiniulin si deherta e pe lanai si idah. Erkiteken terlalu fokus kita kempak kendelen ate-ta e. Aru ate erbahansa patah semangat, ukur e pe lanai bo jore janah banci pe ngerehken pinakit ku bas daging kulanta. Tapi perukuren si mehuli erbahanca malem me ateta. Ertina perukuren si mehuli mpedarat ranan si mehuli, kedamen ras keriahen ukur, dungna si jumpai ras si aloken me kemalemen ate ibas geluhta.

• Pengkenaina

Kalak si nggeluh erpengarapen man Tuhan nge maka kepentaren e lit dirina. Janah enda banci jadi labo bage-bage saja. Harus nge kita nggeluh erkemalangen kempak Tuhan maka kepentaren e jadi si kerajangenta. Sebab bas Tuhan Dibata kap ulu kepentaren e. Lit pemahamen, maka nina gambaren dirinta teridah arah kai sibelasken. Janah kai si belasken ncidahken isi pusuhta. Megati si enda jadi ibas kinata kegeluhenta. Kalak si mehuli tentu teridah arah pengeranana, janah pengeranana si mehuli rehna ibas pusuhna nari kap. Tapi lit ka nge kalak si berpura-pura. Kepeken kalak si erpangkat, berilmu tinggi, terhormat banci lanai terhormat erkiteken pengerana si mehuli.

Tep-tep jelma pada umumna melasken kata kurang lebih 30.000 per wari. Si jadi perenungen man banta, uga nge buena hal-hal si positif arah si 30.000 enda ndai? Buen nge pengaruh si positif ntah negative si ibahan kita. Lidah adalah kematian atau kehidupan, racun atau obat, tergantung bagaimana penggunaannya. Kepentaren si enggo ibereken Tuhan Dibata man banta pakekenlah bagi sura-sura Tuhan. La hanya terjeng pengerananta si dem kepentaren, tapi pe lagu langkah ras perukurenta harus tuhu-tuhu dem kepentaren.

Pdt. Naikken Sitepu, M.Th; GBKP Pokok Mangga Medan