Khotbah Minggu, 18 September 2022; Minggu Kenca Trinitatis / Minggu Perdamen / stola : Meratah, Senina Si Meherga Ibas Kristus, Pilemon 1:8-18

Sermon Klasis Medan Namo Rambe, Rabu 14 September 2022

Khotbah Minggu, 18 September 2022; Minggu Kenca Trinitatis / Minggu Perdamen / stola : Meratah

Invocation  : Tuhanlah si mere gegeh man bangsaNA, mereken dame arah pasu-pasuNa (Mzm.29:11)

Ogen           : Kuan-kuanen 16:5-7 (Tunggal)

Kotbah        : Pilemon 1:8-18 (Tunggal)

Tema          : Senina Si Meherga Ibas Kristus

1. Kata Perlebe

Minggu enda igelari minggu perdamen, si ertina eme kap minggu si ngingetken kita gelah nggit ngalemi (mengampuni) salah; antara sada ras si debanna baik ibas jabu, anggota ngawani perpulungen bage pe man kerina jelma. Perdamen e me kap sada konsep si maba kekelengen, kiniersadaan, ras kiniteruken ukur. Janah nggeluh ibas kekelengen, kiniersadaan ras kiniteruken ukur e me kap sada hal si arusna ilakoken manusia, terkhusus kalak si erkiniteken man Tuhan Yesus.

Erkiteken kita e me kap makluk sosial, berarti  kita saling membutuhken sada ras si debannna ibas ndalani kegeluhenta. Emaka ibas kegeluhenta adi lit turah perubaten pada umumna geluhta la ndatken ketenangen, ras kenyamanen. Lit kata-kata bjak, nina: “Sada musuh mbuesa, seribu teman pe kurangsa”. Permusuhen la kel mehuli (sangat tidak baik), tapi perdamen e me si arus rusur si upayaken ibas ndalani kegeluhenta. Arah renungenta enda, mari erlajar kita uga carana maka kita banci nggeluh erdame sada ras si debanna.

1. Pebagesi Teks

Surat Paulus man Pilemon enda e me sada surat perdamen, ija ituriken alu tangkas ije kerna hubungan si enggo sempat ceda ras peltep, ipesikap ras ipehuli ka mulihken janah bagenda me sura-sura Dibata nandangi manusia.

Nats Khotbah (Pilemon 1:1-18), nuriken kerna Paulus mindo man Pilemon segelah ngaloken mulih si Erguna (Onesimus) jadi si erdahin Pilemon.  Tole pe Paulus mindo man Pilemom segelah ialokenna si Erguna e lebih asa budak, e me senina si meherga ibas Kristus. Payo maka si Erguna enggo ndube erbahan sada kesalahen. Kesalahan kai si ibahan si Erguna labo jelas kel isuratken ibas nats-ta, engkai maka ia kiam i rumah Pilemon nari pe labo si eteh kel alu payo. Banci saja turah bas ukurta la kin lah erguna enda budak si kisat? Ntah la jujur?, banci saja ka pe kita erpengakap erkiteken mesuisa iakap sebage budak  ibas perbahanen Pilemon. Tole banci jadi, ntah Pilemon si kurang bijaksana ibas memimpin budakna  maka turah ukur budakna enda kiam ibas rumahna nari.

Tapi adi si pepayo ibas ayat 18 ras 19, kai si ikataken Paulus man Pilemon kerna utang ras nina Paulus ia pagi nggalarisa kerina man Pilemon. Ijenda jelas ikataken maka si Erguna nge si erbahan kesalahen man tuanna Pilemon. Peran Paulus ijenda ngajuk Pilemon gelah nggit ngalemi, ngaloken, erdame ras budak na si Erguna. Tole adi sigar-gari ibas ayat 12 ras 13, kepe si Erguna enda lit bas penjararan Paulus sedekah enda, ras bas paksa surat enda ioge Pilemon si Erguna me mabasa man Pilemon. Ertina ia enggo isuruh mulihken ku Pilemon. Janah ialoken Pilemon min si Erguna mulihken jadi budakna, radu ras kerina kekurangen, ras salah lepakna. Intina ijenda : hubungan si ndube enggo ceda antara budak ras tuanna, sada si ersalah, sada nari arus nggit ngalemi salah.

Ogenta (Kuan-kuanen 16-5-7), nuriken kerna Dibata labo er-ngena ate man kalak si meganjang ukurna, tapi ernge-na ate man kalak si erkemalangen man BaNa, sebab kalak si bagenda ngenca (erkemalangen man Tuhan) ngasup erdame ras temanna manusia. Kalak si erkemalangen man Tuhan, memiliki sifat er-meteruk ukur (lawan meganjang ukur) e me erbahanca meriah ukur Tuhan man bana; imbang-imbangna ibahan Tuhan jadi temanna ras la jadi si jahat man bana.

Invocation (Masmur 29:11), Tuhan ergegeh mereken dame ras pasu-pasuNa man bangsana ibas katawari paksa pe. Pemazmur Daud ngajuk maka tetap ateta nembah/ muji Dibata-nta sebab si aloken kap ibas IA nari : gegeh, keselamaten, dame sejahtera, ras simpar pasu-pasuNa bas kegeluhenta. Upah nggeluh erkemalangen/ nembah man Tuhan sangat jelas si nanami, labo abstrak.

• Aplikasi
• Senina Si Meherga I Bas Krsitus (Tema), bage min pengalokenta man temanta ras temanta si pernah pe erbahan kesalahen man banta. Bagi Kristus si dem ibas pengampunen, sebage kita kalak Kristen (senina ras turang ibas Kristus), ngasup min kita nggeluh dem ibas pengampunen. Kita arus sangat menghargai teman senina / turang-nta ras nggeluh ibas sikeleng-kelengen. La si pebelin-belin sifat si la mehuli e me meganjang ukur ras pendendam (nginget kesalahan kalak man banta). Adi lit sifat meganjang ukur ras pendendam labo kita ngasup ngalemi kesalahan kalak si daban, janah enda labo si ngena ate Tuhan. Si ngena ate Tuhan-lah silakoken maka ulihna simpar pasu-pasuNa si aloken bas kegeluhenta.
• Tugas kalak Kristen pe memulihken hubungen si nggo ceda, bagi si ilakoken Paulus (juru damai). Dirina lebe nggo ngasup erdame ras kalak si deban. Labo banci jadi juru dame adi dirina pe lenga ngasup erdame ras kalak si deban. Jenari adi ndalanken juru damai arus lit pengorbanenta, bagi Paulus nggit nanggung utang si Erguna. Memposisiken diri bagi kalak si ersalah/ er-meteruk ukur. Maka banci ngaloken pengalemen arus lit ngakuken kesalahen. Kalak si meganjang ukur labo nggit ngakuken kesalahenna.
• Kita arus ndalanken Kata Dibata enda, maba perdamen; sebab nina Yesus : “Ise si nehken peraten Dibata, ia me seninangku, turangku, nandeKu” (Mark. 3:35). Lit nge potensi konflik ibas perpulungenta, serayanNa; nggit erlajar er-meteruk ukur, ngergai kalak si deban, nggit erdame ras ise pe. Kiniteken e labo pasif tapi aktif.