Bahan Sermon PJJ Ipekena-kena Tuhan, Etika/Ipekena Guna Mehuli, Masmur 8:1-10

Bahan Sermon PJJ Ipekena-kena Tuhan, Etika/Ipekena Guna Mehuli, Masmur 8:1-10

Bahan Sermon PJJ

Ipekena-kena Tuhan

Masmur 8:1-10

(Etika/Ipekena Guna Mehuli)

 

         Penulis kitab masmur e eme Daud selaku raja si peduaken bangsa Israel. Aminna gia sekalak raja, si erjabaten, kuasana si mbelin, tapi tetap ia nehken pujin ras pengakun kerna kemulian Dibata si teridah i belang-belang doni. Dibata ngenca si man pujin. Danak-danak ras si gara-gara rende muji Dibata. Ibas ayat 4 iidah Daud uga belinna Tuhan arah erbage tinepaNa, mbelin kel Tuhan ibas IA njadiken doni si seh kel ulina. Ngidah si e e maka sadar kel pemasmur ngidah keberadaan manusia, seh maka ikatakenna, kai kin manusia e maka ingetNdu ia? Manusia kap ngenca, engkai maka ipekena-kenaNdu ka ia? Sebab kenca idah pemasmur uga belangna doni enda, kitik kel manusia e. Gia rikutken pengenen mata doni enda galang kel ia erkiteken jabatenna, tapi tetap igejabken Daud kitik kel ia. Enda me sierbahanca ia meteruk ukur, sebab idahna ras igejabna kemulian Tuhan i belang-belang doni. Bagepe ban keleng ateNa nge maka ingetNa manusia e. Enda me sinjemba pemasmur erkiniteken man Tuhan. Ibenakenna arah kesadarenna kerna mbelinna Tuhan e, seh maka ipekena-kena Tuhan manusia e.

Labo terjeng e saja, ibahan Tuhan ka manusia e teruhen asangken IA, itangkuhken Tuhan manusia e alu kemulian ras kehamaten. Itangkuhken guna jadi raja, merentah kerina si enggo itepaNa, kerina itamaken Tuhan ku tapak-tapak naheta. Ibereken Tuhan manusia e ganjangen asangken tinepa-tinepa sideban, alu njadiken manusia e sue ras tempasNa (Imago Dei). Ibereken Tuhan kuasa si mbelin guna ngaturken (mengelola) kerina tinepa Tuhan si bage kal jilena alu ertanggung jabab. Emaka perban sie, dahinta selaku manusia si itepaNa sue ras tempasNa harus geluh guna kemulian gelarNa, alu ngelakoken si ngena ateNa. Ula kita ncedai kemulian Tuhan alu nggeluh rate-ate.

Ngidah pengertin pemasmur e arusna turah kesadarenta guna ngergaken kerina siilakoken Dibata nandangi kita. Dibata enggo milih ras nangkuhken kita jadi si merentah ras ngaturken kerina tinepaNa sideban. Kita engo diloNa lako jadi rekanNa ibas mpekena-kena doni enda. Sebab, ibas kinatana erkiteken manusia ndabuh ku bas dosa, manusia jadi serakah. Si lit manusia ncedai kai si enggo itepa Dibata alu mehuli. Emaka arah kata Dibata ibas wari sendah ngajuk kita gelah ikut mpekena-kena doni enda bali ras Tuhan mpekena-kena kita. Dibata ersura-sura gelah manusia si tetap mpekena-kena tinepaNa gelah ula ceda. Genduari si jadi penungkunen, kai si enggo si bahan ibas ndahiken tanggung jawabta ndai? Perlu sirenungken mulihi maka mpekena-kena doni enda eme dahin manusia si itetapken Dibata. Alu bage, ise manusia si la mediate kerna lingkungenna seri ras la ndalanken perentah Dibata, la ngergaken Dibata. Ulihna eme kita ka nge si ngenanamisa. Bujur

 

 

Diskusi:

  • Ibas KEE no 260, “Oh andiko jilena,” lit ije tertulis … “ola melangsang, ola meturdaksa.” Kira-kira, kai nge antusen kalimat enda man banta paksa enda?
  • Bereken contoh si banci silakoken mpekena-kena lingkungen si mereken kemalemen ate ku sekelewetta.

 

 

Pdt. Melda P. Br. Surbakti, S.Th

(GBKP Rg. Simalingkar A)

Share this post

Leave a Reply

Your email address will not be published.