Bahan Sermon Kebaktian Minggu 04 September 2022, Perb. Rasul-Rasul 4:23-31, Pertoton Perpulungen Kerna Serayan Tuhan.

Bahan Sermon Kebaktian Minggu 04 September 2022

Minggu Notoken Serayan Tuhan 1

Invocatio             : “Rusur kukataken bujur man Dibatangku, teptep kali kam kuinget i bas pertotonku” (Pilemon 1:4)

Ogen                     : Masmur 119:33-40 (R)

Khotbah               : Perb. Rasul-Rasul 4:23-31 (T)

Tema                     : Pertoton Perpulungen Kerna Serayan Tuhan

1. Perlebe

Pertoton eme salah sada pergegeh ibas ndalani kegeluhen enda. Kegeluhen kalak si erkiniteken man Dibata

teridah arah ketutusenna ibas ertoto, ertoto guna dirina jine ntah pe guna kalak sideban. Tuhan Jesus pe tetap ertoto ibas ndahiken dahin-dahin pelayanenNa tupung IA ringan i doni enda, salah sadana eme ibas kitab Matius 14:23, “ Kenca bage lawes Jesus ku sada uruk guna ertoto. Seh berngi Jesus ibas ingan e sisada”.

Mbelin kel ertina pertoton e, subuk man si ertoto bagepe si man totonken. Kuga dage sedekah enda? Enggo nge ndia sijadiken ertoto jadi sada kesemalen geluh ibas erkiniteken? Sebab kinatana teridah maka kurang denga waktuta subuk kita serayan bagepe perpulungen ertoto alu tutus kerna dahin-dahin gereja, bagepe notoken kerna serayan Tuhan. Mekatep lupa maka kita arus nggeluh sitatang-tatangen ibas toto, gelah tetap megegeh ibas ndahiken dahin-dahin pelayanan gereja.

Minggu enda eme minggu notoken serayan Tuhan, ija kita kerina idilo guna notoken kerna serayan Tuhan. Bagepe ikut nggejapken kerna ulina sura-sura Dibata ibas ndilo manusia jadi serayanNa, jenari selaku ringring ni Kristus, kita idilo guna sitatang-tatangen ibas pertoton.

2. Isi

Ibas ndahiken mberitaken Berita si Meriah la banci sipungkiri pasti lit nge tantangen si man jumpan kita subuk

ibas dirinta sendiri bagepe ibas sideban nari. Tapi, uga gia mbelinna perbeben rikut pe tatangen e, belinen denga kuasa ras penampat si rehna ibas Dibata nari. Si perlu eme tek kita bahwa dahin siidahiken kita e eme dahin Dibata (Tuhan yang utus, Tuhan yang urus).  Ibas nats khotbahta Perb. Rasul-rasul 4:23-32, ngerana kerna pertoton perpulungen. Ibas ayat 23-28, kenca Petrus ras Johanes ibebasken ibas Pengadilen Agama nari, minter ia lawes ndahi teman-temanna ras iturikenna kerna kai si enggo ikataken imam-imam si mbelin ras pertua-pertua, eme: “Kuasa kai lit ibas kam ntah pe gelar ise ipakendu asum kam mpepalem ia?” (Pasal 4:7b). Enda ibelasken pemimpin-pemimpin kalak Jahudi ras pertua-pertua bagepe guru undang-undang i Jerusalem, erkiteken nembeh atena bas pengajaren Petrus ras Johanes man kalak sinterem, ija nina maka Jesus enggo keke ibas si mate nari, si nuduhken maka lit kekeken ibas si mate nari rikut pe ia mpepalem kalak sakit. Dungna ia itangkap ras ibaba ku Pengadilen Agama i Jerusalem. Tapi erkiteken la dat kesalahenna secara hukum, maka ia duana ibebasken aminna lit ancamen bahwa ia duana lanai banci mereken pengajaren kerna Jesus. Kenca ibegi teman-teman Petrus ras Johanes kai si terjadi, mis ia kerina ertoto ras-ras man Dibata, nina “O Tuhan, Kam sinjadiken langit, doni, ras lawit bagepe kerina isina.” Enda nuduhken bahwa kebebasenna duana labo erkiteken kehebatenna tapi erkiteken kuasa Tuhan. Bagepe dahin siidahiken e, emekap dahin Tuhan, maka Tuhan pasti sinampatisa. Aminna pe lit tantangen ras ancamen si bakal ijumpai, arah toto banci si dat gegeh guna tetap ngasup mberitaken kata Dibata alu la biar-biaren. Ras ibas ayat 31, kenca dung ertoto, mugur-ugur rumah inganna pulung e, ertina teridah ibas ketutusen ertoto e terjadi mujijat. Toto e ergegeh kel, lalit dalannta mbiar ibas mberitaken kata Dibata e.

Tentu ibas mberitaken kata Dibata e, dahin pemberita labo hanya mberitaken tapi pe arus jadi pelaku Kata Dibata e. Emaka guna si e, serayan Tuhan pe harus tetap mindo kepentaren man Dibata, bagi siilakoken pemasmur ibas pengogenta. Ipindona kepentaren segelah tetap nggeluh sue ras perentah Tuhan. Alu bage banci tetap icidahkenna geluh si tutus ras setia ibas kegeluhenna.

3. Aplikasi

Selaku serayan Tuhan, dahikenlah dahin e alu tutus, pindo gegeh man Dibata si mada dahin e, bagepe tetap si

pindo kepentaren man Tuhan gelah tetap nggeluh bagi singena ateNa ras tetap jadi serayanNa si tutus ras setia. Bagepe kita serayan, ula lupa notoken dirinta ras temannta sada aron. Bagi Paulus, mbue kiniseran si ialokenna ibas ndahiken dahin Dibata, tapi ia tetap tutus, tetap ia ertoto ras mindo gelah itatang-tatang perpulungen ibas pertoton. Bagi ibas invocatiota, uga Paulus ngataken bujur man Tuhan ibas pertotonna erkiteken Pilemon selaku temanna sada dahin pelayanen si tetap notoken ras ncidahken kekelengenna seh makana aminna ia pe tading bas penjara tetap igejabna kemalemen ate, erkiteken kekelengen Pilemon e erbahanca ia megegeh. Ibas si e teridah ia saling notoken sada ras sidebanna. Ibas toto Paulus pe ingetna kerna Pilemon segelah tetap ia tutus ibas erkiniteken bagepe ibas ndahiken dahin mberitaken Berita si Meriah gia melala tantangen.

Bagepe selaku ngawan ni perpulungen pe tetaplah encidahken kininggitenna ibas natang-natang serayan Tuhan. Tep-tep anggota ngawan ni perpulungen tetap ertoto kerna serayan Tuhan, sebab pertoton perpulungen e pe seh kel mbelinna ngaruhna man serayan Tuhan, gelah kerina serayan Tuhan e megegeh ras sehat-sehat ibas ndahiken dahin pelayanen si enggo iendesken man bana. Jenari ngawan perpulungen encidahken kepatuhen arah ndukung ras nampati dahin-dahin serayan Tuhan arah kininggiten ngelai ras makeken diri guna pebelangken Berita si Meriah.