Sermon PJJ tanggal 28 Agt-03 Sept 2022, Nggeluh Ibas Kiniulin (Epesus 4:1-3)

Sermon PJJ tanggal 28 Agt-03 Sept 2022

Nggeluh Ibas Kiniulin (Epesus 4:1-3)

Adi lit anak sekolah tapi dekahen la masuk sekolah janah la pernah sekali pe njemak buku, tentu ipertanyaken tutus denga nge atena sekolah ntah lang. Adi lit ka sekalak guru tapi dekahen nge ia ku juma asangken mengajar janah la pernah idah ketutusenna ndalanken pendahinna e, ipertanyaken ka ketutusenna selaku sekalak guru, bageme seterusna tiap jelma ipertanyaken apakah sue statusna ras pengelakona, guna ningetken tiap jelma kerna kai tanggungjawabna ibas geluhna. Enda me isi surat Epesus si jadi ogennta e

Surat rasul Paulus si itulisna ibas penjara nari man perpulungen Epesus enda, ertujun gelah perpulungen e tutus nggeluh ibas persadan ras Kristus Jesus. Keberadaanna ibas penjara, la erban ia ngadi mpegegehi ukur ras kiniteken perpulungen, sebab ia pe ipenjara labo perban ndalanken kejahaten melainken erkiteken meritaken Injil. Teridah ije maka nggeluh meritaken Injil, mbelin kel tantangenna, emaka ngidah si e me maka rasul Paulus mpersingeti perpulungen e, gelah ula talu ibahan tantangen seh maka lanai ingetna kai tugas ras tanggungjawabna. Emaka arah surat e ipersingetina gelah perpulungen e nggeluh sue ras kecibalna, eme selaku kalak si nandai Dibata. Kai kin tanggungjawab selaku kalak si nandai Dibata? Nina rasul Paulus, “meteruk min ukurndu, lemah-lembut, dingen saber. Ola pergelut,… Usahakenlah tuhu-tuhu maka persadanndu tetap irakut alu enteguh ibas perdamen. Si enda ikatakan rasul Paulus sebab bas perpulungen e lit kalak Jahudi ras si labo kalak Jahudi, lit golongen si ersunat ras si lang, janah lit kalak tandang-tandang ras si lang, tapi kenca nggeluh ibas persadan ras Kristus, Kristus ndameken kerina, alu njadiken si dua pihak jadi sada (2:14). Ertina, adi enggo jadi pengikut Kristus ersada min ia kerina ulanai mbeda-bedaken latarbelakang, seh maka nina bas ay.4 “sada ngenca kula, janah sada ngenca Kesah” enda me pendilo pengikut Kristus, nggeluh bas persadan sebab sada kap ngenca Tuhan, sada kinitekennna kerina, dingen sada peridin (baptisan).

Bas doni enda seh kel nggo teremna pengikut Kristus, alu ‘payung’ gelar gereja si berbeda-beda, janah warga jemaat GBKP jine pe seh kel nggo buena, tapi arus siinget Kristus sada kap!! Nggeluh bas persadan ras Kristus itengah kinierbagen la jadi alasen guna kita la nggeluh bas dame. Selaku kalak si tek man Kristus, kita sada kap, sama-sama ‘keluarga Allah’ emaka arusna biak nggeluh sisampat-sampaten lit bas kita. Perbedaan pasti tetap lit subuk ibas biak bagepe latarbelakang, tapi sipakelah perbedan e jadi gegeh guna saling melengkapi, sisampaten, ras sikeleng-kelengen. Mari si pake kesempaten geluh si ibereken Tuhan denga enda, alu nggeluh ibas kiniulin, ingetlah statusnta selaku pengikut Kristus arus min sue ras perbahanennta, seh maka arah geluhnta terpuji gelar Tuhan! Amin.

Diskusi:

1. Turiken palasta ncidahken kiniulin ibas kegeluhen.

Kai kendala-kendalata ibas kita ncidahken kiniulin?