Sermon Khotbah GBKP Minggu Budaya I – Tanggal 28 Agustus 2022, Tetap Ikutken Undang-Undang Tuhan, 2 Raja-Raja 17 : 34-39 (T)

Sermon Khotbah GBKP Minggu Budaya I – Tanggal 28 Agustus 2022

Klasis Medan Namorambe

Invocatio       : “La lit gunana ia ersembah man bangKu, sabab si iajarkenna labo Undang-undang Dibata, tapi undang-undang manusia nge, janah e ikatakenna Undang-undang Dibata!” (Mrk.7:7)

Ogen             :Jakup 2 : 1 – 4 (T)

Khotbah        :2 Raja-Raja 17 : 34-39 (T)

Thema           :Tetap Ikutken Undang-Undang Tuhan

Tentu kerina kita lanai asing nandangi erti rambu-rambu lalu lintas. Adi paksana lampu merah, tandana kerina kendaraan bas arah tertentu ngadi, jenari adi nggo lampu hijau tandana nggo banci melaju, jenari adi kari lampu kuning, e tandana arus melambat dingen hati-hati sebab nandangi lampu merah ka me. Man kalak si la patuh nandangi rambu-rambu lalu lintas, resikona: itilang sekaligus banci cilaka, em akibat ketidakpatuhen. Enda me si ituriken arah renungennta sekali enda, kinilapatuhen nandangi Undang-undang Dibata resikona eme ndatken ukumen bas Dibata nari, tapi sebalikna si nggit ngikutken/patuh padan Dibata isehkenNa.

Paksa e Hosea selaku raja Israel mindo penampat man raja Mesir guna ngelawan raja Assur, sebab la atena nari nggalari utang (Ind.upeti) man raja Assur. Erkiteken bage, merawa me raja Assur, itangkapna Hosea janah ikepungna Samaria. Jenari kenca telu tahun ikepungna, ibabana kalak Israel ku Assur jadi tabanen, janah deba tading. Isembah kalak Israel e me dibata-dibata sideban, ipajekkenna ingan-ingan ersembah man kalak perbegu, ilanggarna perentah Tuhan singataken ola nembah man gana-gana, seh maka keke rawa Dibata (17:1-12). Tapi amin bage gia, Tuhan tetap nuruh suruh-suruhenNa ras nabi-nabi guna mpersingeti Israel, sayangna persinget e la nggit ia ngikutkenca dingen ilanggarna kerina Undang-undang Dibata. Kenca bage, ibahan raja Assur kalak tading i kuta-kuta daerah Samaria. Perbahan kalak e la nembah Tuhan Dibata, emaka isuruh Tuhan me singa kutengah-tengah kalak e gelah ijerngem singa e. Megi si e, raja Assur merentahken gelah iulihken sekalak imam si nggo ibaba jadi tabanen, gelah iajari imam kalak si tading i kuta-kuta Samaria e kerna Undang-undang Dibata ras kuga nembah man Tuhan (ay.28) sabab Dibata kap simada taneh e. Tapi kalak si ringan ije ndai tetap nge erbahan berhala, gia isembahna nge Tuhan, tapi la ka itadingkenna dibata-dibatana rikutken adat negeri asalna ndube. Enda me makana isingetken kerna perentah Tuhan man bangsa Israel gelah ‘ola nembah dibata-dibata sideban, ola erjumpuh bana, ola bereken persembahen, jenari ikutkenlah Tuhan saja.’ Tuhan kap simaba nini bangsa e ndarat i Mesir nari alu kuasaNa si mbelin, emaka man si patuh ngikutken perentah enda padan Dibata eme “Kupulahi kam ibas musuh-musuhndu nari” (ay.39).

Enda ningetken kita kerna piga-piga hal. Si pemena lebe ula min leben kita mengandalken manusia jenari lupa mengandalken Tuhan, bagi sinilakoken Hosea. Ibas situasi si sulit kel nge ia, tapi labo ku Tuhan ia mindo penampat,melainken ku raja Mesir. Jenari sipeduaken, nandangi kalak si tading i Samaria si nggo ngidah kuasa Tuhan, tetap ia mekeng nembah man gana-gana, nerusken adatna sindekah seh maka amin gia isembahna ka nge Tuhan Dibata, lanai ngena ate Dibata. Selanjutna, lit janji/padan Dibata man kalak si ernalem baNa. Enda ngataken maka labo sia-sia ernalem man Dibata, sebab kuasaNa simbelin tangkas sejak zaman nini bangsa Israel ipulahi i Mesir nari. Emaka aruslah  setia ngikutken Undang-undang Tuhan (Kata Dibata). Kai ndia tanda-tanda kalak si setia ngikutken Kata Dibata? Nembah man Tuhan saja, tanpa embel-embel adat/kiniteken sindekah. Jenari ogennta pe nigetken kita gelahna ola rayo-ayo nandangi si bayak ras si musil, sebab biak si bage labo bali ras biak Dibata. Nggeluhlah biak Tuhan ibas diri kalak si ngaku tek dingen patuh man Kata-Na!

Bas minggu Budaya enda, gerejanta GBKP eme gereja si tetap melestarikan budaya, sejauh budaya/adat e la berlawanen ras pengajaren Kristus. Injil me si nerangi budaya/adat si ateta si lestariken. Emaka sekalienda kita ipersingeti mulihi gelah nggejapken maka selaku pengikut Kristus teridah min orat geluh Dibata arah kita, janah biak Dibata jadi biaknta guna njaga, ngukurken ras maba kiniulin man doni enda. Kiniteken arus min teridah arah caranta berbudaya/ndalanken adat, sebab tutus kel gia teridah kita ersembah ku Tuhan adi tetap kang sidalanken si la ngena ateNa, bagi persinget bas ayat Invocatio-nta la lit gunana ersembah ku Tuhan, adi mbiaren denga nge kita nandangi undang-undang manusia, si banci ikataken kebiasaan/tradisi si banci mabai kita papak, tentu la ngena ate Tuhan. Kerina kebiasaan/tradisi/adat arusna mabai kita encidahken maka kita kalak si erkiniteken, mabai kita nggeluh alu mehuli subuk arah pengerana ras perbahanennta man kerina sangkep geluhta ras temannta manusia. Emaka marilah, asa kengasupennta sipakeken geluhnta ras pemere-pemere Tuhan guna nehken kiniulin, gelah teridah biak Tuhan arah geluhnta. Amin