BAHAN SERMON PERPULUNGEN JABU-JABU Tanggal 21 -27 Agustus 2022, IANGKAT GUNA NAMPATI (Ester 4-12-17)

BAHAN SERMON PERPULUNGEN JABU-JABU

Tanggal 21 -27 Agustus 2022

TEMA: IANGKAT GUNA NAMPATI (Ester 4-12-17)

(Solidaritas / Menolong Sesama)

Nggeluh si sampat-sampaten eme tanggungjabab selaku kalak si erkiniteken. Sebab e me tandana ia erbuah ibas kinitekenna man Kristus Yesus. Arah oraten PJJnta, enda ilatar belakangi kerna kegeluhen bangsa Israel  si tading ibas negeri pembuangan i Babel. Peristiwa enda terjadi i Susan, sada kota ija Raja Persia ras Media si tergelar Ahasyweros tading. Kenca Raja mpengadi Ratu Wasti jadi kemberahen erkiteken la ia mehamat man Raja, si pemena idaramina me kemberahen si mbaru guna ijadiken ratu si mbaru. Alu erbahan sayembara Raja ngelakoken pemilihen ratu, si kedungenna terpilih me Ester jadi ratu si mbaru. Mordekhai ngelarang Ester nurikenca man ise pe maka ia kalak Yahudi, la lit sada pe si meteh, justru raja sendiri pe la meteh. Ituriken maka lit sekalak si tergelar Haman anak Hamedata, kesusuren Agag, ija ia iangkat Raja jadi perdana mentri. Raja Ahasyweros mereken man bana sada kuasa janah kedudukenna itetapken i datas kerina pembesar si lit i adepen raja. Janah kerina pegawai raja si lit i pintu gerbang istana raja erjimpuh nembah man Haman, sebab bage me iperentahken raja, tapi Mordekhai la nggit nembah mungkuk man bana. Asum Haman meteh maka Mordekhai la nggit nembah erjimpuh man bana maka nembeh ke ate Haman, itambah ka erkiteken ietehna Mordekhai kalak Jahudi la hanya Mordekhai saja ibunuhna tapi pe kerina kalak Jahudi. Jadi Haman ndarami dalan kuga carana guna ngkernepken kerina kalak Yahudi, Tujun jahat Haman enda jelas merupakan rencana Iblis. Iblislah si bertindak i balik Haman, lit sekalak si bermaksud menggagalken janji Tuhan alu munuh kerina kalak Yahudi. Penungkunenna ngasup nge Dibata guna nepati janjiNa? Alu kata si deban banci nge janji Thuan igagalken sura-sura manusia, ise pe ia ntah pe penguasa kerajaan si mbelin ibas zamanna? Tentu lang. Engkai Mordekhai la nggit nembah man Haman eme erkiteken Dibata Israel ngelarang nembah man manusia.

Kenca keputusan Haman guna ngkernepken kerina kalak Yahudi, itetapkenna sada tanggal eme ibas tanggal 13 bulan 12 (Ester 3:13), Perentah guna ngkernepken kalak Yahudi itulis menurut rencana Haman sendiri, janah ikirimken ku tep-tep daerah ras wilayah kekuasaan raja, si mengakibatken kebiaren si mbelin man kerina kalak Yahudi (Ester 3:12-15, 4:3). Kenca ieteh Mordekhai icaingkenna bajuna tandana atena ceda,kenca bage ipakena uis guni,icaburkenna abu ku takalna … (Ester 4:1). Asum ieteh Ester berita e arah suruh-suruhenna lesek kel atena. Jenari ikirimken Ester uis man paken Mordekhai gelah itangtangina uis guni e, tapi la nggit Mordekhai (Ester 4:4-6). Arah pelayan ituriken Mordekhai kerina kai si terjadi, janah ipindona man Ester guna ngadap raja ras membela bangsana i adepen raja (Ester 4:7-9). Awalna, Ester ragu janah la pang ngelakoken kai si ipindo Mordekhai, erkiten la iizinken sesekalak ngadap raja tanpa iundang (Ester 4:10-12). Umumna enterem kalak berpikir maka erkiteken Ester, eme sekalak ratu, la nggit nampati, maka lanai lit kemungkinan nandangi Mordekhai ras kalak Yahudi selamat ibas pernembeh Haman.

Emaka nina Mordekhai  “Ola iarapkenndu maka kam sikapen asangken kalak Jahudi si deban erkiteken kam ringan i bas istana. Adi sinik pe kam i bas paksa-paksa si bagenda, ugapa pe reh nge penampat man kalak Jahudi tah i ja nari gia, janah kalak Jahudi e la banci lang selamat nge; tapi kam ugapa pe mate, janah keluarga si itadingken bapandu imasapken. Banci jadi guna nampati bangsandu nge maka kam enggo iangkat jadi kemberahen.” (Ester 4:13-14). Mordekhai tek man Tuhan. Janah isadarina Tuhan nge si maba Ester kubas kerajaan ibas masa sulit enda. Seh maka ipindonkenna man Ester guna nampati. Tapi erkiteken Ester terhalang nandangi aturen, maka ikatakenna tanpa penampat Ester pe isampati Tuhan nge ia. Mordekhai yakin alu mengandalken Tuhan pasti ia iselamatken. Arah kai sini ikataken Mordekhai enda mengubah pikiren Ester  “E maka itenahken Ester perkatan enda man Mordekai,  “To, pepulunglah kerina kalak Jahudi si lit i kuta Susan enda; ertoto dingen erpuasalah kam kerina guna aku. Ola kai pe pan tah iinemndu telu wari telu berngi dekahna. Aku ras suruh-suruhenku si diberu pe bage ka ibahan kami. Kenca bage lawes aku ndahi raja, aminna gia e ngelanggar aturen. Adi terpaksa kin aku mate guna si e; mate pe labo dalih.”

Payo bagi kai si ilakoken Mordekhai, si mengandalken Tuhan “labo ipermelaken” (Yesaya 49:23) Pang ndalanken kebenaran asum kita naksiken ketidakbenaren labo gampang. Megati kita iperhadapken kubas risiko buruk si engkenai dirita. Ester tangtangna mbiar asum Mordekhai mindo gelah ngadap man Raja, tapi guna nelamatken bangsana arah ancamen si irancang Haman. Lanai ia mbiar ngadap Raja aminna gia kesah taruhenna. Guna sie mindo ia gelah bangsa end ape notoken ia, dingen erpuasa guna ia ibas ndalanken sie kerina. Tindaken Ester enda labo sekedar tindaken pang ras nekat tanpa perhitungen, tapi ia pang erkiteken ia mengandalken Tuhan.

Sigejapken pe maka ibas tep-tep keadaan, pendahin, jabaten, posisita banci jadi lit rencana Tuhan guna make kita nampati kalak si deban. Aminna ija gia kita ringan. Adi bage kin ola si abaiken, ola erkiteken lit kalak mindo gelah isampati ibas keadaanna si sulit la kita mediate. Teklah maka kita kerina tan-tan Dibata guna nehken keleng ate nandangi kalak isekelewetta. Janah asum kita nehken/ndalankenca pindo gelah gegeh ras penampat ibas Tuhan nari. Tentuna alu erbage resiko si reh engkenai kita enggo kita siap ngalakenca.

Diskusi.

1. Kai nge si ngambati makana kita kurang muat bagin nampati teman si perlu kel penampat ibas kita nari?
2. Tulisken kai saja atendu ibahandu kulebe enda guna nampati subuk keluarga, sektorta,runggun bagepe si la sada kiniteken ras kam? E maka sitotoken. Siateku kubahan guna nampati

Bujur ras Mejuah-juah man banta Kerina….