BAHAN SERMON KHOTBAH MINGGU 21 AGUSTUS 2022 MINGGU X KENCA TRINITATIS/ MINGGU MAMRE ,Masmur 128:1-6, BAPA SI MALANG MAN TUHAN

BAHAN SERMON KHOTBAH MINGGU 21 AGUSTUS 2022

MINGGU X KENCA TRINITATIS/ MINGGU MAMRE

KLASIS MEDAN NAMO RAMBE

(Warna stola: Meratah)

Invocatio         : “Untung kap anak si erbapaken kalak bujur, dingen sindalanken perbahanen si                                          bujur” (Kuan-kuanen 20:7).

Ogen                : Heber 12:5-8 (Tunggal)

Khotbah          : Masmur 128:1-6 (Antiphonal)

Tema               : BAPA SI MALANG MAN TUHAN

1. PENARUH

Adi isungkun kam kerina Moria/pernanden me malem kel nge atendu adi Mamrendu entah pe bapa ibas jabundu malang man Tuhan? Sabab megati kel isingetken maka bapa/Mamre e eme Imam ibas jabu. Adi nina rasul Paulus desken takal perpulungen, Adi takal e la sikap maka mabai bana kerina kula ras ring-ringna e murde, bage ka pe kerna jabu. Tapi adi takal e sikap mabai bana sikap kerina, dingen kegeluhen jabuna pe harmonis, bahagia, rukun, damai sejahtera, sukacita ras pe sehat mejuah-juah”. Tapi sie kerina labo banci reh bage-bage saja tapi harus lit upaya guna meraih entah pe ndatkenca, janah perlu si eteh maka kemalemen ate ibas jabu labo banci i tukur alu materi, tapi harus i bangun arah “kemauan si tulus” alu “membayar harga”. Melala si i dah contoh maka enterem kalak si mengalami keberhasilen i bas pendahinna, keuangen-materi si mapan, karir-jabatan, ras sidebanna, tapi la idatna kemalemen ate/keharmonisen i bas jabuna. Justru kiniliten ndai mabai bana perjabunna jadi si maba randana (bagi petekuak manuk ciger wari).  Kuga dage carana guna ndatken kemalemen ate/keharmonisen ibas jabu?

1. PENJELASEN NATS

Arah Mazmur 128 enda ituriken uga kin carana ndatken kemalemen ate/keharmonisen i bas jabu eme: Erkemalangen man Tuhan. “Sangap kalak si malang man Tuhan”. Ibas cakap aslina “kalak” ijenda eme dilaki (maskulin). Kesangapen ibas jabu ibenaken sekalak dilaki. Dilaki sitentuna ibas jabu eme gambaren sekalak bapa/perbulangen. Engkai maka ikataken sangap? Erkiteken erkemalangen man Tuhan. Erti erkemalangen  man Tuhan iterjemahken pemasmur eme kalak si ngikutken kerina perentahNa (nggeluh ibas kebenaren Kata Dibata). Enda encidahken kalak si pang erdalan ibas dalan Dibata, janah kalak si pang erdalan ibas dalan Dibata ngarapken janji Tuhan, bagepe kalak si erkemalangen man Tuhan eme kalak si tedeh atena rusur man Dibata dingen la pang mekarus er Dibata. Jadi kata enda berlaku man ise pe si erkemalangen man Tuhan, labo tergantung uga ia bayakna, pentarna, musilna entah erpangkat, ise pe labo erpedobahen. Adi kin ia erkemalangen man Tuhan sangap geluhna.

Lit piga-piga ijenda ituriken ulih nandangi kalak si erkemalangen man Tuhan ay.2: Ipanna me ullihna latih, sangap nggeluh mehuli sikerajangenna. Ijenda pemasmur nuduhken gambaren kemalemen ate nandangi kalak sierdahin si malang man Tuhan, ija erdahin. maka labo hanya terjeng memiliki tapi pe seh kubas tahap menikmati. Enterem jelma ibas doni enda ibas ia terjeng memiliki ngenca tapi la seh ku tahap menikmati. Kalak singasup ngenanami ulih latihna maka banci mehuli sikerajangenna. Kinilatihen  nggeluh sada dampar eme lit ibas kita, tapi nanam la lit (alu pengertin sikerajangenta tapi la banci si pan).

Ndeharana bali ras anggur si meramis ibas rumahna: ikataken ijenda maka kalak sierkemalangen man Tuhan rumahna i pasu-pasu alu keriahen dingen kedamen. Anggur ncidahken kekelengen, keriahen. Ibas pesta kalak Jahudi anggur eme jadi skala prioritas, adi la lit anggur la kuh pesta e, bagepe kehadiren nande ibas jabu, adi la lit nande la kuh jabu e.  (mbue sitik bapa empo mulihi ndarami nande) Ijenda icidahken labo hanya terjeng buah batang anggur simehumur, ertina sipeturah kekelengen ras kemalemen ate si sampur ibas jabu. Bagepe Anggur si meramis buahna ncidahken ndeharana s idem alu kinibujuren, menarik, seh maka rembak ate anak jabuna rusur ras ia. Dikune kenca la ia ije lit tempa rusur sikurangna. Bageme kehadiren nande ibas jabu.

Anak-anakna bali ras tunas batang saitun I sekelewet mejana. Saitun ibas kalak jahudi seh buena gunana. Minak saitun bagin persembahen man Tuhan, jadi minak lampu ibas rumah pertoton, bagepe minak saitun enda jadi sada tambar ibas kalak jahudi.

Ay.4. Bageme pasu-pasu Tuhan man kalak si malang man bana, kata enda ipertegas mulihi nandangi kalak si malang mana Tuhan. Ay.5. Tuhanlah simasu-masu kam i Sion nari, mbera idahndu Jerusalem kidekah umur geluhndu. Ibas ayat enda ipekeke mulihi tradisi Sion. Tradisi enda  enggo ibenaken  menaken Daud jadi raja Israel, maka ipusatkenna ingan ersembah eme i Jerusalem. Enda me sada kota si idat arah perjuangen Daud. Tapi kenca bangsa enda ibas pembuangen maka la nari banci ersembah ku Sion (Jerusalem). Erkiteken sie keca mulih i Pembuangen nari ipekeke mulihi tradisi enda. Maka situhna ulu pasu-pasu eme Dibata, arah penembahen si payo ibas rumahNa si Badia.

Cawirlah kam metua maka sempat idahndu kempu-kempundu. Damelah sikerajangen Israel. Cawir metua sada gambaren pasu-pasu i bas budaya Israel, labo sidauhen ibas budayanta Karo. Engkai maka cawir metua jadi gambaren pasu-pasu? Erkiteken kegeluhen bangsa enda enggo ringan i taneh perpadanen. Adi ibas pembuangen/perbudaken denga min ndai labo e gambaren pasu-pasu. Cawir metua labo arah Buena erta kebayaken tapi arah kemalemen ate itengah jabu, subuk bapa, nande ras anak-anak seh ku kempu.

III. APLIKASI

Temata, “BAPA si malang Man Tuhan. Tema enda ngajuk bapa/Mamre itengah jabu gelah tetap erkemalangen man Dibata. Mamre arus nandai dirina selaku sira ras terang man doni enda. Peran bapa/Mamre ibas jabu guna mabai anak jabu guna erkemalangen man Dibata. bapa/Mamre erdiate ras erpemere sue ras mottona.  Encidahken maka ia sekalak si malang man Tuhan erdiate nandangi persoalen kegeluhen ras erpemere ia ibas nggit mereken penampat man kalak siperlu ndatken penampat. Bapa/Mamre sierkemalangen man Tuhan ibereken Dibata umur si gedang sierbahanca idahna kempu-kempuna. Tandana bapa/Mamre erkemalangen man Tuhan tetap nggit erlajar kata Dibata, tutus ku gereja, PA Mamre sebab arah e ia erlajar kerna kata Dibata tambah rusur pengangkanna kerna kata Dibata. Bapa/Mamre si erkemalangen man Dibata  ngasup rukur mehuli, ngidah keuntungen nggeluh la arah sisi materi tapi arah sisi uga ia mngerembakken diri man Dibata, Adi ngerembakken diri ia man Dibata erbahanca ia nggeluh er untung. Emaka payo kel bagi si isingetken ibas Invocatiota “Untung kap anak si erbapaken kalak bujur, dingen sindalanken perbahanen si bujur” (Kuan-kuanen 20:7). Keuntungen e la hanya terjeng man bana saja tapi pe man se isi jabuna. Bapa sierkemalangen man Dibata ngenca ndatken kepentaren ras didiken guna isehkenna man anak jabuna.

Ibas pengogenta isingetken maka pengajaren si isehken bapa man anakna ertujun guna mpeangkaken maka kalak si tek eme anak-anak Dibata ras ncidahken keleng ate Dibata man anak-anakna. Gelah arah pengajaren enda la kita ndatken ukumen, tapi gelah kita nggeluh ibas si mehuli. Arah didiken Tuhan e jadi dalan man banta gelah ngasup bertahan ibas erbage ndalani kiniseran. Sekalak bapa singajarken alu disiplin, labo ngatakenca nembeh atena tapi tanda keleng ate. Kiniseran si jadi e dalam rangka pengajaren disiplin. Kiniseran banci nderpa ise pe kita si nggeluh enda, kiniseran eme bagin geluh si la terhindarken gia labo mesukah ngalokenca. Tapi kiniseran e labo sada hal si mbelin  kel, sepanjang ngasup kita ngidah si terbuni ibas sie. Mari sibandingken kiniseranta ras kiniseran Kristus, kinisranta e la sebanding ras keriahen si bakal sialoken. Adi sigejapken kiniseran e desken sekalak bapa singajarken anakna gelah disiplin, mpekena ras meneguhken ia, labo la atena keleng tapi justru sebalikna.

Arah khotbah enda mabai maka Bapa nge simenaken uga ia erkemalangen man Dibata, tentu radu ras nande, apaika adi bapa lanai lit maka nande ngenda simenakenca. Alu bage ulihna ndehara itengah jabu desken batang anggur si meramis buahna ibas rumahna, lanai tanggung malemna ate jabu adi banci bage ndehanrana, la erkeri-kerin  keleng atena nandangi perbulangen bagepe man anak-anakna. Ia me kemalemen ate i bas jabuna. Metengetlah pernanden  sigenduari gelah ola sempat batang anggur e lanai erbuah, dingen lanai entebu nanamna. Sebab enterem pernanden jaman gundari enda enggo macem nanamna. Erkiteken dekahen er Facebook, WA, Instagram, Ertiktok (adi nai tarenna ku salon rusur ngadung anakna i rumah)

Anak-anak desken tunas batang Saitun enda me si jadi sumbul pengarapen jabu. Tunas ncidahken sada arapen man jabu. Anak-anak si ngeluh ibas pengajaren kata Dibata, maka kenca ia mbelin ia me jadi persembahen si mbelin si meherga si muat bagin ibas ngelai Tuhan ibas gerejaNa. Kegeluhenna maba terang ija pe ia ringan, ia desken tambar si pepalemken i tengah jabu gereja ras masyarakat. Emaka amin kuja pe ia lawes tetap ukur bapa ras nandena. Sebab labo sitik anak si genduari enggo bagi minak jelantah, melket, la lit gunana (erkiteken narkoban).  Ibas tanggal 26 Agustus 2022 iperingeti HUT MAMRE pe 27 tahun. Marilah jadi Mamre si erkemalangen man Tuhan. Amin