SERMON KOTBAH MINGGU, 14 AGUSTUS 2022 Minggu IX Kenca Trinitas/Minggu Tri Tugas Gereja,Ersada ukur ibas pengajaren (Perbahanen Rasul – rasul 8 : 4 – 13 (Tunggal)

SERMON KOTBAH MINGGU, 14 AGUSTUS 2022

Minggu IX Kenca Trinitas/Minggu Tri Tugas Gereja

Invocatio     : Tinepa Dibata kap kita, ibas persadanta ras Kristus Jesus, ijadikenNa kita guna ndahiken dahin – dahin si mehuli si enggo leben irencanakenNa, gelah sidahiken e (Ep. 2 : 10)

Ogen           : Jesaya 61 : 1 – 4 (Tunggal)

Kotbah        : Perbahanen Rasul – rasul 8 : 4 – 13 (Tunggal)

Tema          : Ersada ukur ibas pengajaren

1. PERLEBE

Si jadi tugas ras tanggungjawabta selaku pengikut Kristus eme ndalanken Tri Tugas Gereja (persadan, kesaksin, pelayanen).  Tugas ras tanggungjawabta si kerjaken jadi bentuk pengataken bujurta erkiteken Dibata tetap njaga ras ngkawali kegeluhenta. Kinata kegeluhentapaksa genduari dem salu tekanen, berita – berita si la pasti, situasi si megati berubah – ubah si mpeturah rasa ingin tau jelma sinterem ras si banci saja e jadi sada pergegeh guna banci mpelimbarui situasi kegeluhen. Guna mewujudken si e tentu harus kita nggeluh ibas pengajaren si benar segelah ngasup kita mpetangkas sura – sura Dibata janah si sungkun kubas pusuhta ma nggit nge kita guna nehken tanggungjawabta selaku warga gereja arah dahin Tri Tugas Gereja?

1. ISI

Kegeluhen kalak Kristen ibas jaman gereja si pemena dem alu tantangen erkiteken erkiniteken man Jesus. Kerina kalak si tek harus ngalaken erbage – bage perbeben bahkan harus pe mempertaruhken kesahna demi mpertahanken kiniteken man Kristus tapi amin bage gia labo lit kebiaren ibas kalak e, labo lit rasa putus asa apalagi ersura – sura guna  mundur. Paksa e Istefanus mate alu ibenteri salu batu erekiteken Kristus (Perb. Rasul 7 : 58a), kematen Istefanus eme bena – bena terjadi peniksaan si hebat i Jerusalem (Perb. Rasul 8 : 1b). Kejadin e labo erbahanca surut semangat pelayanan Pilipus (salah sada tokoh siisorot ibas teks enda). Pilipus eme sekalak diaken si pitu kalak si ipilih (Perb. Rasul 6 : 5). Bali bagi Istefanus, Pilipus pe dem alu kuasa Kesah si Badia guna ngerana kerna Jesus ras ngelakoken erbage – bage tanda sengget. Alu kuasa ras tanda – tanda sengget ibas Dibata nari Pilipus mabai nterem kalak ibas sada kuta i Samaria guna jera. Berita si meriah si iberitaken Pilipus cukup mere kesan si mehuli sebab secara umum sekalak Jahudi bagi Pilipus la banci erteman ras sekalak Samaria. Cukup ndekah kalak Samaria ermusuhen ras kalak Jahudi tapi Kesah si Badia mengutus Pilipus guna mpetangkas kuasa Kristus nandangi kalak Jahudi bagepe kalak Samaria. Kalak Samaria kedungenna mengalami perjumpaan ras Kristus arah pendahin Pilipus.

Ayat 7 nuriken kerna pendahin Dibata nandangi kalak Samaria. I Samaria pe terjadi tanda sengget simbelin bagi mpepalem kalak si sakit ras mpelawes setan. Kristus ndilo kalak Samaria e janah nehken pasu – pasuNa arah Pilipus erkiteken si e kerina kalak Samaria ermeriah ukur ras mindo gelah iperidiken. Asum Pilipus bengket ku Samaria kalak Samaria  kepe enggo leben nandai sekalak guru perguak emekap Simon. Ia itandai kalak Samaria sebagai sekalak si lit kinigurunna si erbanca jelma sinterem takjub man bana, kerina kalak si meganjang bagepe si meteruk megiken katana seh maka iban gelarna “kuasa simbelin”, la sitik pe ibas kalak Samaria si erpengakap maka Simon eme juruselamat siikirimken Dibata. Kinigurun (Ind. sihir) siipake Simon guna ncidahken kuasana ibas erbahan tanda sengget eme kuasa gelap, si jahat me si mereken pemeteh man Simon guna memamerken kinibeluhenna janah ikatakenna ia simbelin. Adi si jahat si erdahin tentu ikataken kalak e ia me simbelin tapi adi Dibata si erdahin tentu kalak e tetap mpeteruk dirina gelah Dibata tetap ermulia. Siikerjaken Simon kepe labo sebanding ras siikerjaken Dibata arah Pilipus, bage belinna tanda sengget si ikerjaken Dibata arah Pilipus maka dungna Simon pe tek man Dibata janah ia pe mindo gelah iperidiken kedungenna ras Pilipus me ia katawari pe.

Jesaya 61 : 1 – 4 nuriken kerna Jesaya selaku persuruhen Dibata isuruh guna mpeseh berita keriahen man bangsaNa si atena mulih ku Jerusalem ibas pembuangen nari. Berita keriahen enda ipeseh man bangsa Israel erkiteken kondisina paksa e ibas situasi putus asa tempa lanai lit ije pengarapen. Berita enda me jadi bukti maka Dibata tetap erkeleng ate man bangsaNa teridah arah suasana kegeluhen bangsaNa si erceda ate isalihken jadi keriahen, ukur si kote salih jadi ende – nden pujin, kota si runtuh si nggo ndekah mesuni ipajekken mulihi. Dahin si isuruh Dibata man Nabi Jesaya enda jadi dahinta pe guna tetap erberita alu ngandalken kuasa Dibata.

• PENGKENAINA

Minggu enda bengket kita kubas minggu Tri Tugas Gereja, simabai kita selaku kalak si tek man Jesus gelah tetap mpegara semangat guna nehken berita si meriah alu la milihi situasi ras ingan. Ibas nehken berita si meriah e tentu labo  si bagi ukur lalap man jumpan tapi pe mawen si jumpai pe tantangen, kiniseran ntah pe tekanen  tapi labo e jadi alasen man banta gelah ngadi erberita. Si gejaplah kita enda persuruhen Dibata si nggo itepaNa janah ipermbakkenNa ras IA guna ndahiken dahin – dahin si mehuli (Inv. Ep. 2 : 10), kiniersadanta ras Tuhan e kap si jadi senjatanta guna ngasup ngalaken erbage – bage tantangan, kiniseran ntah pe tekanen si reh tupung si dahiken dahin erberita si meriah.

Rutanglah siakap kita selaku kalak si tek guna nehken berita si meriah e, bagi Pilipus ras Jesaya bas ogenta, labo ngasup sinik sebab kinitekenna erdahin ibas pusuhna guna nehken berita si meriah e. Matius 28 : 19 – 20 pe mereken sada tanggungjawab man banta gelah tetap erberita guna njadiken kerina bangsa jadi ajar –ajarNa, si buatlah baginta ibas dahin erberita aminna pe kitik ras sederhana sicidahken arah kegeluhenta sekalak – sekalak subuk arah pengerananta rikut ras perbahanenta si dem alu keleng ate.

---

Pdt. Sri Novalinda Br Tarigan

GBKP Rg Tebing Ganjang