SERMON KEBAKTIAN HUT KEMERDEKAN RI PE-77 TAHUN, Merdeka Janah Ngenanami Kebebasen(8:21-25)

SERMON KEBAKTIAN

HUT KEMERDEKAN RI PE-77 TAHUN

Invocatio        : “Mari TUHAN, Kelini aku, pulahilah aku, perban keleng atendu” (Mzm. 6:5)

Ogen               : Kejadian 40:13-15 (Tunggal)

Kotbah           : Roma 8:21-25 (Tunggal)

Tema              : Merdeka Janah Ngenanami Kebebasen

1. Kata Perlebe

Merdeka! Merdeka! Merdeka! Kata merdeka rusur ibegi kita tep-tep kita merayaken kemerdekaan Indonesia tepatna tiap  tanggal 17 Agustus. Peringeten Kemerdekaan 17 agustus 1945 eme sada memorial si cukup penting erkiteken mbelin kal dampakna nandangi bangsa Indonesia.Ija siidah bage dekahna Negara Indonesia ijajah, ikuasai bangsa sideban mulai Negara Portugis, Inggris, Belanda bagepe Jepang. Ibas masa penjajahen e banci siidah uga kal belinna perjuangen para pejuang si rela erkorban mempertaruhken kesahna gelahna Negara enda banci terbebas ibas penjajahen nari. Melala kal kiniseraan si ihadapai para pahlawan guna memerdekaken Negara enda.

Ibas wari enda, mulihi ka kita mpringeti kemerdekaan Indonesia sipe 77 ken, wari enda kita isingetken mulihi uga kal belinna kekelengen Tuhan nandangi kita nggo banci kita ngenanami kemerdekaan ibas kegeluhenta. Bage kal dekahna kita ijajah tapi gundari kita nggo bebas. Labo erkiteken persenjataan si canggih maka kita banci merdeka tapi erkiteken perkuah ate Dibata nge maka kita banci ngenanami kemerdekaan enda. Emaka arah sienda marilah kita tetap ngataken bujur nandangi Dibata singgo mereken kemerdekaan man banta.

1. Isi Teks

Rasul Paulus emekap penulis surat man perpulungen i Roma (Roma 1:1). Surat enda nuriken kerna ajaren pembenaren melalui iman nandangi Yesus Kristus. Ibas bahan kotbahta Roma 8:21-25 enda nuriken kerna, perbeben, pengarapen, ras kerna keselamaten. Ibas Paulus nulisken surat enda enterem kalak si erkiniteken i Roma sangana ngenanami perbeben si seh kal belinna.

Kegeluhen kalak Kristen selaku anak-anak Dibata pe rusur ndatken perbeben si seh kel belinna. Paulus ngatakenca maka perbeben si inanami anak-anak Dibata la hanya terjeng perbeben saja tapi lit rencana Dibata gelah banci kita bebas ibas perbeben enda menuju ku pemuliaan Dibata. Bagi si itulisken ibas ayat 18 “Rikutken perkiranku maka kiniseran si inanami kita gundari labo kai kel pe adi i bandingken ras kemalemen ate si pagin i petangkas Dibata man banta”. Paulus pe nuriken ibas 2 Korinti 4:17 “Janah kiniseran si gundari e menahang nge dingen labo ndekah janah ulihna me kemulian si rasa lalap si la terturiken beratna ertimbangken kiniseran si menahang e”. Pengharapen si ipadanken Dibata e labo pengarapen palsu bagi siitawarken doni enda. Tapi pengarapen si ipadanken e eme pengarapen si mulia guna ndatken kebebasen ibas kerina perbeben si inanami manusia.

Selaku anak-anak Dibata, erkiniteken man Tuhan njadiken sekalak jelma s idem perbeben salih statusna selaku anak-anak doni, jadi anak-anak Dibata. Kegeluhen sindekah sidem alu perbeben salih ku kecibal si mbaru si dem alu pengarapen menuju ku pembebasen Dibata.Emaka status selaku anak-anak Dibata seh kal mehergana, sebab status si mbaru si idatken anak-anak Dibata enda merupaken jaminen kegeluhen rasa lalap, janah kegeluhenna nggo ipimpin kesah sibadia.Paulus pe ngambarken doni enda ingan “kiniseran” sebab sieteh maka seh paksa si genduari enda kerina si ijadiken Dibata kelsehen janah seh kal akap suina desken sekalak nande si nandangi mupus (Rm. 8:22). Kuasa dosa si erbahanca kegeluhen i doni enda lanai aman, lanai lit kedamen, doni enda erjahatna ibas kerina dampar, doni enda bagi ingan si terjajah, dem alu kiniseran, seh maka enterem kalak nimai pembebasen ibas Dibata nari. Dibata pasti mereken kebebasen nandangi anak-anakna si erpengarapen nandangi Ia, si ernalem nandangi Ia, janah si mereken kegeluhenna nandangi Dibata.

Roma 8:23, kalak si erkiniteken si enggo ngaloken Kesah sebagai jaminen ibas pemere-pemere Dibata, kelsehen nge nimai pembebasen e. Erkiteken kalak si erkiniteken nggeluh denga i tengah-tengah doni si dem alu dosa si jei kin lit denga kinisuin, rasa kecedan ate (Bd. 2 Kor 5:2-4). Kalak si erkiniteken kelsehen guna nimai Dibata ndungi pengangkatenna jadi anak-anakNa, e me nebusi batanta. Emaka ibas kita ngalaken kiniseran kalak si tek nggeluh i pimpin Kesah si Badia seh ku pembebasen ibas kerehen Tuhan Jesus si pedua kaliken. Ibas pengarapen nandangi pembebasen enda me kalak si tek ertima alu megenggeng, sebab tek ia maka kai si itimaina e bakal idatsa ibas waktu si itentuken Dibata (Ayat 24-25).

Ibas bahan ogenta Kejadin 40:13-15 ngerana kerna Jusup nuriken antusen kerna nipi sekalak si nikapken inemen raja mesir sisangana ipenjaraken erkite-kiteken nembeh ate raja nandangi pegawaina si dua kalak e. erkiteken nembeh kal ate raja nandangi pegawaina si dua kalak e emaka ipenjarakenna kalak enda duana i rumah kepala penjara ingan jusup ipenjaraken. Ibas paksa kiniseraan ibas penjara e reh ka nipi pegawai enda si erbanca gulut ukurna.Ertambah-tambah kepeken kiniseran si inanami pegawai enda.Emaka ibas sada paksa idah jusup dua pegawai enda terlolah-lolah. Emaka isungkun jusup nina “engkai makana jutjut kal kam sendah?” nina dua pegawai enda jawabsa duana kal kami ernipi tapi ise pe la beluh ngantusisa. Nina jusuf  Dibata nge simereken kengasupen guna meteh  antusen nipindu. Emaka turikenlah nipindu ndai nina jusuf. Emaka ituriken sekalak juru minem raja nina “Lit i lebe-lebeku sada batang anggur lit telu dahanna, kenca reh bulungna minter reh bungana jenari buah anggur mulai tasak. Aku sangana ncikep calung ingan minem raja e emaka kubuati buah anggur e kupereh ibas calung ndai kenca bage kubereken man raja. Kenca bage iantusi jusup me nipi e alu pertolongen kesah sibadia nina dahan si telu e e me telu wari maksudna telu wari nari kam nggo ipulahi raja ibas tutupen enda nari kam nggo ibebasken ibas tahanen enda nari janah isuruhna me kam mulai erdahin bagi sigel-gel ilakokendu nandangi raja. Kebebasen pasti pagi idatkendu ibas raja nari. Emaka nina jusup adina nggo kam pagi bebas ersinget min kam nandangi raja kerna statusnku sebab lanai kap lit alasen ntah pe perbahanen sierbanca aku bas penjara. Arah bahan ogenta enda teridah maka kerina kalak butuh kerna pembebasen, emaka marilah kita tetap ngataken bujur nandangi Dibata si nggo mereken kebebasen nandangi kita.

• Kata Pendungi

Tema si seh man banta ibas mpringeti kemerdekaan enda eme “Merdeka janah ngenanami kebebasen”. Tepat ibas tanggal 17 agustus 2022 enda negaranta nggo merdeka 77 tahun, adina sinen uga sejarah perjuangen siilakoken para pejuang guna memerdekaken Negara enda mungkin melala kel kiniseran si harus ihadapi guna memperjuangkenca. Tapi secara hukum formal Negara Indonesia nggo merdeka, nggo bebas ibas tabanen nari enda sidatken arah perjuangan fisik bagepe politik siilakoken para pejuangta.Emaka perlu kal kita merenungken uga kal perjuangen para pejuang guna mbebasken kita arah kiniseran nari.

Kemerdekaan si ialoken kita erbanca kita ngaloken kebebasen, baik kebebasen secara politik bagepe kebebasen secara kiniteken.Secara kiniteken kita nggo merdeka erkiteken Yesus nggo nebusi dosata arah pengorbanen si ilakoken Dibata nandangi manusia. Merdeka secara kiniteken pe banci inanami kita arah kekelengen siibereken Tuhan nandangi kita, tetap iperdiatekenna kegeluhennta selaku kita kalak sierkiniteken nandangi Ia. Aminna pe kita nggo merdeka secara politik bagepe kiniteken la e erbanca kita meganjang ukur, tapi arah kemerdekaan si nggo idatken kita e dalanna kita lebih metenget nandangi kiniseraan selanjutna si akan ihadapi kita selaku kalak erkiniteken.

Amin pe nggo merdeka selaku manusia kita pe harus sadar maka melala kepeken kejahaten ras kiniseran si ihadapi kita (pinakit, masalah ekonomi, kebodohen, penyakit sosial, korupsi, gender, kejahaten, bagepe masalah si langa ngadi ibas negaranta eme pandemic covid 19). Emaka kitape selaku manusia lit dengan ibas masa perjuangen guna menghadapi masalah-masalah enda. Tapi la e erbahanca kita mbiar guna ndalani kegeluhenta.Tapi arah kerina kiniseraan e erbahanca kita megegeh dingen paguh sebab Dibata tetap mereken Kesahna guna ngajari dingen ngakawali manusia seh ku kedungen zaman (Joh. 14:16).Enda me sierbahanca kita megegeh ras semangat guna mpepaguhi kiniteken guna kemuliaan Dibata. Bagi tertulis ibas invocatiota Masmur 6:5 “Mari Tuhan kelini aku, pulahi aku, perbahan kleng ateNdu”.

Arah kemerdekaan si nggo idatken kita ibas Dibata nari, emaka kita pe iajuk guna memerdekaken kalak sideban sisangana tertaban, sisangana ibas kiniseraan, selaku kita si nggo merdeka kita harus mampu jadi sira ras terang nandangi teman-temanta si dem alu kiniseran. Jadi kemerdekaan e la terjeng sekerangenta saja tapi kalak sideban pe harus ngenanami kemerdekaan baik secara politik bagepe secara kiniteken.Ola kal, nggo mehuli sekerajangenta lupa kita guna nampati kalak sideban.Tapi radu ras lah kita kerina guna ngenanami belinna kuasa Tuhan ras kekelengenna man banta.Arah sie banci kita jadi pasu pasu nandangi kalak sideban.Janah kalak sideban pe banci ndatken kemerdekaan arah Dibata nari. Emaka rutang lah pusuhta man Dibata, kemerdekaan e nggo sidatken arah Dibata emaka tetaplah kita mpepaguhi kinitekenta nandangi Dibata. Ulanai monce-once, ulanai terpengaruh tapi tetaplah kita sada kiniteken eme memuliaken janah ernalem nandangi Dibata si nggo memerdekaken kita.Selamat mempringeti kemerdekaan Indonesia sipe 77 ken Tuhan simasu-masu.