Bimbingan Khotbah Minggu 7 Agustus 2022. (Minggu Kuasa Dibata Menang Nandangi Kuasa Kegelapen),Jesus Erkuasa Nandangi setan(Lukas 9:37-43 (Tunggal)))

Bimbingan Khotbah Minggu 7 Agustus 2022.

(Minggu Kuasa Dibata Menang Nandangi Kuasa Kegelapen)

Invocatio  : Emaka endeskenlah dirindu man Dibata.Lawanlah iblis kian me iblis Ibas Kam nari ( Jakub 4:7)

Ogen   : Jesaya 14:12-15 (Tunggal)

Khotbah : Lukas 9:37-43 (Tunggal)

Tema     : Jesus Erkuasa Nandangi setan

Kata Perlebe

Arah invocatio eme Jakub 4:7 banci si idah maka arah ngendesken diri man Dibata ngenca erbahansa kita ngasup ngelawan iblis dingen kiam me iblis e Ibas kita nari. Uga kin ngendesken diri man Dibata? Berarti kita nggeluh Ibas kuasa Dibata eme kebenaran Dibata. Adi la kita nggeluh Ibas kebenaran Dibata maka ertina kita nggeluh Ibas kebenaran iblis. Kebenaran iblis eme dosa sierlawanen ras kebenaran Dibata si jadi dalan masukna kuasa iblis kubas kegeluhen manusia. Kai kin kebenaran iblis e?  Eme perbual/perguak, pembunuh, la pernah ngakipiti kebenaran Dibata, sombong, rangap, kebiaren, segat ate (kebencian) ras dendam (Joh 8:44).

Arah ogenta pe banci si idah raja Babel si ikuasai dewa Marduk Ibas kemasyurenna ikuasai biak sombong, tapi idabuhken Dibata erkiteken labo kin lit gegehna ngelawan Dibata.

Pebagesi Teks

Kitab Lukas itulisken dr Lukas si enggo niksiki berita arah murid-murid Yesus nari gelah Teopilus ras kerina singogesa banci tek maka Yesus e Anak Dibata si isuruhNa ku doni enda guna nebusi manusia Ibas kuasa dosa nari. Arah nats renungenta banci si idah maka nca Yesus i permuliaken idatas Uruk ilebe-lebe Petrus, Yohannes ras Jakobus maka nusur me ia kerina i uruk nari, nterem kalak tek njumpai Yesus (38).

Sekalak Ibas si enterem e erlebuh man Yesus ngarap gelah anakna iperdiateken sebab e kel ngenca anakna (39). Iturikenna uga kiniseran anakna iseluki setan, rempet nderkuh, idampes-dampeskenna bana dingen rugup-ugup babahna, mesui kel atena janah menam-menam lanai erleka setan e ras ia (40). Murid-murid Yesus si la ikut ku datas uruk, la ngasup mpelawes setan e (41). Nina Yesus man kerina kalak si ije, ” O, Kam kalak si la erkiniteken dingen si enggo papak, asakai nari dekahna Aku ras kam? Asakai nari dekahna Aku tahan ras kam? Baba anak e kujanda! (41).Sanga ibaba anak e man Yesus, nggirgir ia, i dampes-dampeskenna bana. Tapi i sergangi Yesus setan e dingen i pepalemNa anak e . Kenca malem iberekenNa man bapana (42). Banci si idah uga kuasa setan e memang atena munuh manusia dingen nirangken manusia ras Dibata  Simpegeluh manusia. La Tek man Yesus si eme Anak Dibata, erbansa kuasa setan banci nguasai manusia, bagepe erbansa la ngasup mpelawes setan, sebab  Tek man Yesus selaku Anak Dibata eme kebenaran e. Jadi Tek man Yesus, dingen erpengendes man BaNa ngenca caranta mpelawes setan gelah ia kiam Ibas kita nari.

Pengkenaina

Ibas jaman gundari enda, bage buena  tawaren setan si menarik ras tempa-tempa sue ras kebenaran Dibata, tek denga nge kita man Yesus? Erkuasa nge kita ngelawan kuasa setan e? Sebab tanda-tanda kalak Tek man Yesus banci mpelawes setan. Berarti mpelawes setan labo talenta tapi kuasa si ibereken Dibata man setiap anak-anakNa sitek man BaNa. Yesus ngkritik kalak si la ngasup ngelawan setan ” O Kam kalak si la erkiniteken dingen papak….”

1Yoh 3:7-9, O anak-anakku, Ola pelepas ise pe mabai Kam papak! Kalak si ngelakoken si ngena ate Dibata asalna Ibas Dibata nari, Bali ras Kristus pe asalNa i bas Dibata nari. Tapi kalak si terus erbahan dosa ia sikerajangen iblis kap, sabab iblis e erdosa mula-mula nari kin. Anak Dibata reh ku doni enda guna ngkernepken pendahin iblis. Ise si enggo jadi anak Dibata la iteruskenna erbahan dosa, sabab biak Dibata lit Ibas ia. Janah erkiteken Dibata kap Bapana, lanai banci iteruskenna erbahan dosa. Uga maka ula kita papak tapi tetap Tek dingen ersada ras Dibata? 1 Yoh. 2:9 Kalak si la ringan Ibas ajaren Kristus, tapi ndarat i je nari, ia la erDibata. Ise si ringan i bas ajaren e, Bapa ras Anak e lit Ibas ia.

Mari dage kita setia Ibas pengajaran Kristus gelah ula kita papak dingen ragu/la tek nandangi Yesus, tapi banci pe si tandai uga kin pendahin iblis e dingen banci pe silawan ras sipelawes. Sebab kuasa Yesus pasti menang Nandangi kuasa iblis.

ajaren Kristus bas geluhta.