Bahan Sermon Kebaktian Minggu 31 Juli 2022 Minggu Peningkatan Ekonomi Jemaat,Rulih Ibas Pendahin(Johanes 21:1-7 (Tunggal))

Bahan Sermon Kebaktian Minggu 31 Juli 2022

Minggu Peningkatan Ekonomi Jemaat

Invocatio             : “Erdahinlah ia alu mehuli guna ncariken keperlunna, janah gelah lit ibas ia guna nampati kalak si

ibas kepiceten” (Epesus 4:28b)

Ogen                     : Rut 2:3-9 (Tunggal)

Khotbah               : Johanes 21:1-7 (Tunggal)

Tema                     : Rulih Ibas Pendahin

1. Perlebe

Ibas bena-benana ijadiken Dibata manusia minter ipasu-pasuNa “Ertuahlah jadi nterem, demi dingen

taluken doni enda, kuasai kerina nurung, perik-perik i awang-awang, kerina rubia-rubia i daraten” (Kej. 1:28). Bagepe kenca manusia ndabuh ku bas dosa, nina Dibata, “Terpaksa kam latih erdahin ngusahai kidekah geluhndu, gelah banci iberekenna cukup nakanndu.” (Kej. 3:17b). Arah si enda, tuhu-tuhu teridah maka Dibata tetap encidahken keleng ateNa ras simereken serpang pulah anem gia manusia enggo ndabuh ku bas dosa. Dibata tetap mereken kesempatan man manusia guna erdahin eme nguasai, ngusahai, njagai ras mpekena-kena doni enda segelah mereken ulih man manusia. Jadi erdahin sedalanen ras ulih. Alu kata sideban, arah erdahin maka ndatken ulih. Ibas erdahin epe arus terbeluh, eme makeken pemeteh ras kepentaren segelah tama guna man diri sendiri bagepe man kalak sideban.

2. Isi

• Invocatio : Epesus 4:28b

Enda me si itekanken Rasul Paulus man perpulungen i Epesus, kinijingkaten erdahin kepeken la

terjeng ncukupken keperlun nggeluh saja tapi pe guna nampati kalak si musil/kekurangen. Sebab arah erdahin dingen ngaloken ulih arah dahin e, eme pasu-pasu Tuhan, lit kepe sikerajangen kalak si deban ije, la man dirina ras keperlunta saja. Ituriken Paulus maka kemalemen ate e di kune ngaasup kita mere, la riahen siakap ngalo. Biak enda lit ibas kalak si tutus erdahin ras melumbar sebab igejabna gegehna e pemere Dibata si arus ipakeken dingen ulih epe pemere Dibata guna inanami ras-ras.

• Ogen : Rut 2:3-9

Lit dua tipe manusia paksa ia ndahiken sada dahin, eme tipe perkisat ras tipe mejingkat. Rut eme tipe sekalak si mejingkat. Dahin sidahikenna eme ngikut-ngikuti kalak si rani guna mumahi ruhi gandum si tading ibahan kalak rani. Bagi si ikataken Tuhan erkelangken Musa ibas Imamat 19:9-10, “Adi iperanindu jumandu, ola perani seh ku duru, janah ulanai ulihi perani ruhi page si tading-tading. Olanai ulihi niar-niar peken anggurndu guna pepulung anggur si tading ntah pe mumahi si enggo naktaken, tadingken e man kalak si musil ras man kalak si tandang.” Enda me siilakoken Rut ibas erdahin guna nampati bibina Naomi ibas ngelitken kebutuhen geluhna. Bukti kinijingketen Rut enda teridah ibas pengakun mandur man Boas bahwa ipindokenna gelah banci ia ngikut-ngikut kalak rani lako mumahi ruhi gandum si tading-tading. Ia mulai erdahin erpagi-pagi si lampas, ras e denga kel ia istirahat i sapo. Ertina Rut benar-benar memanfaatken waktu ibas ia ndahiken dahinna. Teridah me dungna rulih ia ibas pendahinna. Iperentahken Boas gelah Rut tetap ibas juma guna mpepulung gadum ras pendahin ras diberu-diberu si ngemo i juma Boas.

• Khotbah : Johanes 21:1-7

Ibas bahan khotbahta eme nuriken kerna Yesus si ncidahken DiriNa i danau Tiberias kenca kematenNa, arah dahin si paksa idahiken Petrus, Tomas, Natanael, Jakobus, ras Johanes, bagepe dua kalak ajar-ajarNa si deban selaku jadi nelayan. Ibas paksa sie, ersura kel Petrus guna njala nurung. Sura-surana e irespon teman-temanna, radu ras ia njala rani. Berngi ia lawes ras lalit datna ulihna. Si e erbahanca turah kekecewaanna, merasa gagal ibas ndahiken dahinna. Emaka terang kenca wari, tedis Yesus i tepi dano e pe lanai itandaina. Ieteh Tuhan kekecewaan ajar-ajarNa, emaka ipindokenNa ka gelah ajar-ajarNa ngamburken jala kempak kemuhen perahu e. Rulih kel pendahinna, kenca iamburkenna jalana, lanai ia ngasup ngerintaksa sebab melala kel nurung ibas. Kenca isaksikenna e kerina, sadar ajar-ajarNa, nina man Petrus, “Tuhan kap si ngerana banta e.” Arah si e banci siidah bahwa ibas erdahin tentu pernah ka jumpa kegagalen, saja ula e erbahancamis kita putus asa. Tapi tetap kita setia ibas ndahiken dahin e ras erpengendes man Tuhan, sebab si erdahin bagi sura-sura Dibata, la pernah ulihna sia-sia.

3. Aplikasi

Temata bas minggu enda eme Rulih Ibas Pendahin . Tentu enda labanci kita sinik saja. Lit sada usaha si

Arus ilakoken kita. Kita selaku anak-anak Tuhan, erdahin e enggo jadi sada perintah si ibereken Tuhan man banta. Terlebih Tuhan pe seh asa genduari tetap ncidahken pendahinNa ibas tetap mpekena-kena doni enda. Bagepe, kai pe si jadi pendahinta, adi ilakoken alu tutus ras mejingkat tentu mereken ulih si mehuli. Emaka ibas minggu peningkatan ekonomi jemaat enda, ibereken pengertin ras dorongen tentang uga pentingna peningkatakan ekonomi jemaat alu tetap tutus ras mejingkat kita ibas ndahiken dahinta dingen ngendeskensa ras ernalem man Tuhan. Ora et labora, totoken kai si idahiken kita, ras dahiken dahin si enggo itotoken kita. Alu bagi di kune pe jumpa kari kegagalan ras tantangan paksa kita ndahiken dahinta seh pe ibas ulih pendahinta, ula mis kita kecewa ras putus asa, tapi tetap kita tutus ibas erdahin, mejingkat ras pentar ibas ndahiken dahinta, tek kel kita i pasu-pasu Tuhan me pendahinta e rikutpe ulihna. Adi sibage lah carata ibas erdahin, maka kegeluhenta reh ulina seh maka banci kita jadi pasu-pasu man sekelewetta, sebab rulih ibas dahinta e jadi asam man banta guna nampati kalak si ibas kepicetan (invocatiota) seh maka gelar Tuhan termulia.

Arah renungenta wari si sendah ngajuk kita gelah:

• Kalak si erkemalangen man Tuhan, si tutus erdahin, mejingkat erdahin ras pentar ibas ndahiken dahin nge si ngaloken pasu-pasu idur Dibata nari.
• Tetap tutus erdahin ras ngataken bujur ibas ulih pendahin si ibereken Dibata.
• Rulih pendahinta e pe mabai kita guna jadi pasu-pasu man sekelewetta. Sebab pasu-pasu Tuhan e labo terjeng kita si nikmatisa, tapi pe kerina anak-anak Tuhan seh makana arah dahin rikut pe ras hasilna ipakeken kita guna kemulian gelar Tuhan.
• Melala tantangen si ijumpai kita, entah e ibas prosesna atau ulihna. Misalna saja gelah ndatken untung si mbue, tergoda kita guna ndahiken dahin si la ngena ate Tuhan, atau ibas kita ndatken ulih arah dahinta, sipakeken e guna sada hal si la ngena ate Tuhan. Enda si arus ipedauh kita. Jadiken dahin e jadi ibadah, guna kemulian gelar Tuhan, seh makana makeken ulih erdahin e pe bagi si ngena ate Tuhan.

Ibas ndahiken dahin e, gia ulihna lenga bagi ukur (mengalami kegagalan ras kekecewaan), ula mis putus asa tapi tetap mejingkat. Arus iinget kita, adi si serahkan kerinana man Tuhan, maka ulihna la sia-sia. Bagi siinanami ajar-ajar Tuhan paksa ia ndahiken dahinna eme njala nurung. Emaka si arus ilakoken kita ula menyerah tapi berserah. Bagi si ilakoken Rut, tetap ia erjuang ibas mumahi ruhi gandum si tading ibahan kalak rani. Kerina hasilna iendeskenna man Tuhan.