BAHAN PERPULUNGEN JABU-JABU (Pendidikan Anak i Tengah-tengah Keluarga), Kesempaten Jadi Guru(Heber 5:11-14)

BAHAN PERPULUNGEN JABU-JABU

(Pendidikan Anak i Tengah-tengah Keluarga)

Ogen     : Heber 5:11-14

Tema     : Kesempaten Jadi Guru

                Penulis kitab Heber nuriken ibas ia nehken pengajaren kerna kata Dibata man perpulungen, lit kendala siijumpaina man kalak Kristen paksa sie, si jadi alamat surat enda.  Kendalana eme perpulungen melet/ndekah ngangkai pengajaren Dibata e alu mehuli. Tapi amin bage gia, penulis la putus asa, tetap ia ergiah-giah ras la patah semangat guna mberitaken kata Dibata e, aminna pe enggo ietehna kerna kondisi perpulungen si ielaina. Man bana, enda jadi sada tugas ras tanggung jawab si arus tetap idahikenna. Erkiteken aminna pe perpulungen eme kalak Kristen si enggo ndekah nandai Tuhan, mbegiken ras ngaloken pengajaren kerna kata Dibata, tapi kinitekenna la tumbuh, bali denga bagi anak-anak. Ibas ayat 12-13, “ Situhuna enggo cukup kesempaten man bandu gelah banci kam jadi guru, tapi seh asa genduari perlu denga kam iajari ibas bena-benana nari kerna ajaren-ajaren Dibata. Lenga bo kam man nakan keras, tapi minem susu denga kam. Kalak si arus denga minem susu, anak-anak denga kap ia, la ietehna kai si benar ras kai si salah.”

Situasi si bagenda pe melala denga i tengah-tengah perpulungen. Labo jadi sada jaminen, ndekah gia ia nandai Tuhan dingen erlajar kerna pengajaren kata Dibata, tetap kinitekenna la turah dingen erbuah. Bali bagi anak-anak denga. Tentu enda kerina arus ibenaken kita ibas tiap-tiap jabuta. Jabu eme sekolah si kitik. Ibas jabu eme kita siajar-ajaren guna ndahiken dahin si mehuli bagi singena ate Tuhan. ibas si e, sierperan aktif eme orang tua. Perlu kel pendidiken anak e i tengah-tengah keluarga, ras orang tua me si jadi kesempatan lako jadi guru man anak-anakna.

Bagi lirik lagu karo, Adina enggo mbelin bage, mbelin daging ni baba nake. Mbelin bekas pendidong doah, nade bapa perkuah…Maka ersinlsal gelah babah nande bapanta si mehuli me kap. Payo me ateta tuhu me dagena si pake me pedahna…dst.” pesan singkat arah lagu enda eme pengarapen segelah dikune enggo mbelin anak si kin kitik-kitik nari enggo ipebelin-belin meteh mehuli, janah lagu langkahna pe mehuli bagi singena ate Tuhan. pengajaren orangtua man anak-anakna tuhu-tuhu jadi palas si penting kel ibas pertumbuhen subuk kula bagepe pertendinna. Ulamin kulana ngenca tumbuh tapi kinitekenna lang.

Genduari enda la sitik orang tua lanai ngasup jadi teladan (usihen) si mehuli man anak-anakna. Megati pe adi iajarken orang tua anakna, mis ijababna nina, “ Kena pe bage nge…” Enda gelarna krisis integritas. Integritas ertina sue kata ras perbahanen. Adi genduari ngajarken anak lalit ertina adi arah cakap/babah saja tapi arus tudu ras perbahanenta. Lit rusur belas-belas nina, ‘Adi cakap saja labo lako.’ Pertumbuhen kedewasan kiniteken labo jadi secara otomatis, instan, entah pe spontan, tapi arah sada proses ras perlu kedisiplinen ibas ngelakokenca.

Pdt. Melda P. Br. Surbakti, S.Th

(Rg. Simlaingkar A)