BAHAN SERMON PJJ GBKP TGL 17-23 JULI 2022, Dibata Kecion Dingen Gegehta(Masmur 46:1-6)

BAHAN SERMON PJJ GBKP TGL 17-23 JULI 2022

Ogen: Masmur 46:1-6

Tema: Dibata Kecion Dingen Gegehta

Ibas kegeluhen tiap jelma pasti ersura-sura maka kegeluhenna tetap lit ibas Mejuah-juah, tapi sendalanen ras sura-sura e maka perbeben ras kiniseran jadi ayam-ayam geluh tetap lit bas doni enda. Perbeben ras kiniseran enda la terjeng rehna ibas manusia nari, tapi pe banci rehna ibas alam nari, si berbentuk bencana alam bagepe masalah-masalah sideban. Ibas kejadin e kerina manusia kote dingen lemah, janah ije me kita perlu gegeh. Gegeh situhu-tuhu eme ibas Dibata nari, uga kita erjimpuh ilebe-lebeNa arah pertotonta nuduhken kita enda labo kai pe iadep-adepenNa. Perdalinen geluh manusia ibas ndarami gegeh ras ras penampat megati alu erbage-bage cara, tapi arus siakui bahwa uga pe siban carana adi nggo reh bencana pasti ise pe langasup ngolangisa, adi la seijin Tuhan kerina usaha manusia sia-sia. Enden enden korah ibas Kitab Masmur mereken sada pergegeh bahwa Tuhan Tetap kap ras kita, seh maka e menjadi penguaten man banta kerina ibas litna perbeben. Ingan cicio berarti mereken ras teduh si aman ras nyaman, biasana adi lit benca alam kerina manusia ndarami ingan berteduh, pengungsian si banci mereken keselamatan tubuh, tapi labo kepeken terjeng keselamatan e ngenca si perlu, semangat, gegeh ras kiniteken pe perlu iselamatken. Gelah ula kita larut ibas perbeben kegeluhen ntah erbage-bage bencana sireh ku kita. Sebab yakin kita uga pe mbelinna reh galumbang perbeben e Tuhan tetap njagai kita ras iberekenNa kita kengasupen guna ngalakenca. Emaka tentuna arah Masmur enda mbuka pengertinta gelah tetap tegar ibas masa-masa sulit ntah bencana si lit gia ibas kita sebab kepeken Dibata tetap ras kita.

Pdt. Jeri Karlo Tarigan, S.Th