BAHAN SERMON KHOTBAH GBKP TGL 17 JULI 2022 KLASIS MEDAN NAMORAMBE MINGGU V KENCA TRINITATIS/ MERDANG, Dem Doni Enda Alu Pasu-Pasu Tuhan (Masmur 104:10-23 (R))

BAHAN SERMON KHOTBAH GBKP TGL 17 JULI 2022 KLASIS MEDAN NAMORAMBE

MINGGU V KENCA TRINITATIS/ MERDANG

Invocatio         : Adi nuan kam, si suankendu labo sinuan-sinuan si enggo mbelin  tapi benihna saja nge                             ngenca, umpamana page ntah sidebanna (1 Korinti. 15:37)

Ogen               : 2 Korinti 9:8-11 (T)

Kotbah            : Masmur 104:10-23 (R)

Tema               : Dem Doni Enda Alu Pasu-Pasu Tuhan

PENJELASEN TEKS

Secara keseluruhen Masmur 104 enda nuriken kerna hubungen Dibata ras kerina tinepaNa. Ibas pengertin sie, maka pe masmur sekaligus nuriken maka kerina tinepa tetap la banci la lepas ibas sinepasa nari, erkiteken Ia me sierkuasa nandangi kerina kai si itepaNa. Masmur “Pujin Man Si Mada Tinepa” eme sada ungkapan kekaguman pemasmur nandangi ulina tinepa Dibata. Kerina si itepa Tuhan e mehuli. IjadikenNa kerina enem wari dekahna. Janah enggo iukurken Tuhan pe kerna keberlangsungan hidup alu nikapken kerina siniperluken ibas sada ekosistem. Itepa Dibata rubia-rubia, la lupa IA leben nepa sumbul lau gelah lit inemen, kelde kerangen pe la muas. Itepa Dibata perik, leben itepaNa batang-batang kayu ingan perik erban asarna. Manusia itepaNa, e pe la lupa Dibata leben nepa sinuan-sinuan ras pangan guna mereken gegeh man bana. Dem doni enda alu pasu-pasu Dibata. Pemasmur terpesona ngidah ulina si irancang Tuhan, nuriken man banta cara memahami kemulian Dibata la hanya arah ibadah si bernuansa rohani ntah ibas tanda – tanda sengget saja, tapi pe kemulian Dibata e banci si idah kai si enggo itepaNa. Encidahken cara kerja Dibata situhu – tuhu sempurna ibas Ia nepa tinepaNa alu mehuli, si teridah ibas kerina ulih si itepa. Dage guna kiniulin kegeluhen manusia e sendiri maka manusia la banci lang tetap memelihara kerina tinepa Dibata alu engkelengi kerina tinepa e. Sejalan ras sie ibas ogenta ituriken Paulus man perpulungen Korinti gelah tetap nggejabken bahwa kai si lit ibas ia eme pemere Tuhan, janah alu bage nggit muat bagin guna nampati perpulungen Tuhan i Jerusalem, Paulus njemba gelah tetap erpengarapen gelah ula biar-biaren nehken simehuli guna dahin Tuhan, sebab Dibata ngasup mereken manbanta erbage-bage pemreNa alu sampur (ayat 8) seh maka kerina keperlun guna dirinta icukupi Tuhan, gelah alu bage erngasupna kita ndahiken dahin-dahin simehuli. Asal nggit kita ngerdangken simehuli ibas kegeluhen enda, maka ibereken Tuhan benih simehuli rikut ulih sierlipat, tugasta kepeken terjeng ndahiken saja ngenca, sebab kerina nggo pesikapNa. Tentuna janji pengarapen bagi tersena ibas ayat 11 kedungenna Dibata sierbansa kita bayak ibas kai pe, tentuna kinibayaken sialoken kita ibas Tuhan nari e kang si menggerakken kita pe melumbar mere katawari pe, tanda sigejab ras siakuken si e kerina ibas Tuhan nari rehna. Tentu kerinana butuh proses, sebab labo lit kalak mis pentar/berhikmat ibas kegeluhen tanpa latihen iman, rikut kai sikataken ibas invocatiota labo sinuan-sinuan si enggo mbelin si isuanken tapi benihna saja ngenca, sinuan si isuan mulai benih nari tentu berproses janah adi irawat pasti mehuli, beda ras sinuan si isuan nggo mbelin pasti kurang paguh uratna janah pasti terganngu pertumbuhen kune kenca isuanken mulihi kenca nggo icabut, kiniteken sipaguh idasari alu benih sirehna ibas Tuhan nari janah berproses alu penampat Tuhan janah irawat alu dem kiniteken seh maka erbuahken simehuli pastina.

APLIKASI

Minggu enda igelari Minggu Merdang, kenca enggo ka kita rani, meriah ukurta, tapi ula lupa maka waktuna ka kita merdang. Ertina, ngerdangken benih guna isuanken gelah i bas waktuna ka kita banci rani. Tentuna, rikutken konteksta labo hanya perjuma tapi erbage-bage pendahin si idahiken perpulungen rikutken ingan tading masing-masing. E maka ngataken bujur kita enggo ibereken Tuhan dahin guna banci sidahiken. Si paling penting, tetap kita tutus, makeken waktu ras kesempaten alu mehuli. Soal resiko i bas berusaha adalah hal si biasa, si paling penting bagianta e me ndahiken dahin e alu tutus ras mehuli. Enggo pasti dengan kerja keras ras pengorbanen, la pernah sia-sia dahin si idahiken kita, ipasu-pasu Dibata dahinta. Janah rikutken Firman Tuhan enda pe erlumba kita guna sisuan hal-hal si mehuli arah kerina pengkebet geluhta. Tupung ibere Tuhan kesempaten man banta mari tetap kita erbahan si mehuli i bas kegeluhenta. Dem Doni enda alu pasu-pasu Tuhan. Tinepa Dibata eme kerina doni enda, labo manusia saja. E maka harus kita mpehaga Tuhan alu njagai doni inganta tading enda. Ula kita jadi manusia si serakah, piah doni enda pe ceda ibahan keserakahan manusia si la erbias-bias. alu kata sideban, doni enda itepa Dibata man manusia alu fungsi ekonomis eme guna memenuhi kebutuhen nggeluh kerina manusia ras kerina ciptaan si lit.

Pdt. Jeri Karlo Tarigan, S.Th