Sermon Kotbah Minggu 3 Juli 2022 Klasis Medan Namorambe, Tetap ermeriah ukur ibas Tuhan( Habakuk 3:17-19)

Invocatio        : Teman si kukelengi,ola usih kai si jahat,tapi usihlah kai si mehuli.Ise erbahan si mehuli asalna ibas Dibata nari,ise si erbahan jahat la enggo idahna Dibata ( 3 Johanes 1:11).

Ogen               :Titus 3:12-14 ( Tunggal)

Kotbah            :Habakuk 3:17-19 (Antiponal)

Tema               : Tetap ermeriah ukur ibas Tuhan.

1. Kata Perlebe

Ermeriah ukur eme ncidahken biak si ngasup ngataken bujur man Dibata ibas kerina dampar kegeluhen sebab nggeluh ibas doni enda eme kerina ibas pengaturken Dibata.Ibas Tuhan banci si gejab la pernah kita kekurangen tapi kerina enggo cukup ibahan Dibata. Bagepe khususna Minggu enda eme Minggu kerjarani,uga kita ngasup tetap ermeriah ukur ibas Tuhan,eme ngasup ermeriah ukur ibas makeken kiniliten sebab kerina kiniliten eme pemere Dibata,e maka labo hanya i pake guna keperlun diri pribadi tapi i pekeken guna mpehaga Dibata arah nehken persembahen kerja rani.Caranta guna ngapup nehken persembahen kerja rani berhubungen rapat ras kualitas rohaninta (kiniteken),Dibata sumber kebayaken e maka tetap nginget ku sumber e gelah reh malemna ate nggeluh. E maka ibas nehken persembahen epe erpalasken kai si lit ibas kita labo erpalasken kai si lalit ibas kita,” Adi lit lah ukur ersuruh guna mere,maka ialoken Dibata me pemere e erpalasken kai si lit ibas kita,labo erpalasken kai si llait ibas kita ( 2 Kor 8:12). Mari si pebagesi kerna bahan kotbah Minggu enda alu tema “Tetap ermeriah ukur ibas Tuhan.

1. Isi

Ibas kitab Habakuk,lit i singetken gelar nabi Habakuk dua kali eme: 1:1;3:1.Erti gelar Habakuk e,nina Martin Luther  (Tokoh reformasi) e me: orang yang memeluk,maksudna nabi Habakuk memeluk umatnya untuk menghiburnya seperti seorang ibu memeluk anaknya yang takut atau menangis.Arah erti nabi Habakuk enda encidahken maka bage me Dibata engkelengi/memeluk bangsaNa tupung bangsaNa ibas paksa kesusahen. Ibas krina situasi maka la pernah Dibata nadingken umatNa,tetap i perdiatekenNa,ija arah kitab Habakuk enda ncidahken maka Tuhan make nabi Habakuk guna petetap ukur bangsa Israel maka Dibata nge si nampati ibas kesusahen si i namami bangsa enda.

Nabi Habakuk erdahin sebage nabi sekitar pengkeri-kerin abab 7 ras ibas awal abad peenemken ope Kristus.Tupung sie si erkuasa i daerah sekitar timur tengah e mekap kerajaan Assyur ras kerajaan Babilonia. Duana kerajaan enda kejam kel perbahanenna nandangi daerah si ikuasaina,termasuk pe man bangsa Dibata sendiri (bangsa Israel). Ngidah perbahanen bangsa Babilon si kejam e man bangsa Dibata,sitik pe la senang ukur nabi Habakuk, emaka jungut-jungut ia man Tuhan ( Habkuk 1:3,13). Kedugenna jungut-jungut nabi  Habakuk e, i jabab Tuhan nina; “Kalak jahat labo pulah,tapi kalak bujur la banci la nggeluh erkiteken tetap ia ernalem man Dibata ( 2:4). Arah enda ncidahken maka kalak bujur/anak anak Dibata tetap nge nggeluh ibas keleng ate Dibata emaka tetap ermeriah ukur ibas Tuhan. Erkiteken nggeluh ibas Tuhan labo tanpa persoalen tapi lit pe persoalen Dibata si mereken serpang pulah.

Ibas bahan kotbahta maka Habakuk 3:17-19 nuriken maka la hanya ancamen ibas bangsa Babilon si kejam nari tapi ibas pendahin si la menghasilken. Bahwa batang ara la erbunga,batang anggur lalit buahna,batang saitun lalit asilna,perjuma la rulih,biri-biri mate kerina dingen lembu pe enggo keri ibas karangna,tetap nge aku ermeriah ukur ibas Tuhan erkiteken Dibata kap singkelini aku,nina Nabi Habakuk. Enda sada ketetapen ukur maka labo Dibata nadingken bangsaNa tapi tetap i keliniNa ibas segala situasi. Lalit si erbahana bene keriahen ibas Tuhan erkiteken keleng ateNa kekal. E maka alu bage katawari pe tetap ngasup ngataken bujur man Dibata si mperdiateken kegeluhen. Nabi Habakuk, jelas ngidah kiniulin Tuhan si mereken gegeh desken nahe belkih,peguh ibahanna perdalanna,e maka la celus aminna pe erdalan ibas deleng-deleng si meganjang. Ertina gegeh ibas kegeluhen enda hanya lit ibas Tuhan,janah petetap ukur maka la erbanca menyeleweng gia mberat si man alanken sebab Dibata si nampati ras is mpegegehi.

Ibas invocatio ta 3 Joh 1:11, nuriken kerna ola usih kai si jahat tapi usihlah kai si mehuli,ise erbahan mehuli asalna ibas Dibata nari,ise si erbahan jahat la nggo idahNa Dibata. Enda ertina ula pernah i pengaruhi biak si la mehuli ibas doni enda tapi lit pe si idah biak si la mehuli talu erkiteken kita nggeluh ibas Dibata. Bagepe lit pe perbeben ula sempat perukurenta ras lagu langkahta la mehuli tapi tetap lah encidahken biak simehuli patuh man Tuhan dingen setia man baNa sebab penampat rehna hanya ibas Tuhan nari. Adi ibas ogenta Titus 3:17-19, Paulus ngingetken,erlajar make kesempaten si lit guna ndahiken dahin si mehuli,gelah i cukupina kai si perluna kal. Ula min ia sia-sia nggeluh. Ertina tetan-teman Paulus erberita Apolos bagepe Titus tas si debanna tetap min ergiah-giah alu litna kerjasama si mehuli ras perpulungen. Ertina saling mendukung ibas Tuhan,emaka megegeh berita si meriah e. Alu perbahenen si mehuli tentu lit buahna eme mabai kalak tek man Dibata. Enda pe nuduhken maka ngasup ndalenkenca erkiteken tetap ermeriah ukur ibas Tuhan. Adi nggeluh ibas Tuhan kai pe lalit terkendala kerina banci i alkoken alu mehuli,janah hasilna pe maba kiniulin

• Pengkenanina

Tetap ermeriah ukur ibas Tuhan, eme sada hal buah kiniteken tetap teridah ibas kegeluhen maka kepeken Dibata e,perkeleng ras tetap engkelini anak-anakNa katawai paksa pe. Jadi lalit si metahat ibas Dibata,erkiteken ia setia nemani ras engklelini anak-anakNa ibas krina dampar kegeluhen doni enda. Sue pe ras Minggu kerja rani,nehken persembahen kerja rani e ncidahken tetap ermeriah ukur ibas Tuhan sue ras tema labo erkiteken lebih ibas kita maka ngasup nehken persembahen,tapi gia penghasilenta sanga paksa la bagi ukur ula erbahanca maka la muat bagin ibas nehken persembahen kerja rani sebab e me tanda kita merasaken maka Dibata nge si tetap mereken kegeluhen bagape gegeh ras kesangapen man banta ndalanken singena ateNa. Kiniteken terbukti arah kita tetap setia man Tuhan ibas krina si man bentasenta. Janah ibas sie labo kita pernah i tadingken Dibata,darami lebe kinirajan Dibata maka kerina i cukupkenNa man banta. bagi si isuratken ibas Matius 6:33 ”Tapi si pentingnakal,daramileh lebe kinirajanNa,janah dalankenlah si ngena ateNa,maka i cukupiNa kai si perlu man bandu. Ibas kegeluhenta,si utamakenlah lebe si ngena ate Dibata,salah sadana nehken persembahen kerja rani sebagai pengataken bujur. Ibas nehken persembahen e ncidahken maka kita mpehaga Dibata,” Kenca bage maka bahanlah kerja rani,guna pehaga Tuhan Dibatandu,alu maba persembahen ukur meriah man baNa.Buena rikutken pasu-pasu si iberekenNa man bandu ( Ul 16:10). Jadi nehken persembahen kerja rani e alu meriah ukur,labo meras terpaksa,sue ras buena pasu-psu si enggo i bereken Dibata. E maka nehken persembahen kerja rani epe tetap ermeriah ukur ibas Tuhan, ertina labo simbol entah formalitas bagepe gelah enggo tapi meriah ukur eme alu pusuh si meciho ras bersih i persembahken man Tuhan.Amin

Pdt Sunerlita Br Ginting, M.Th