Sermon Bahan PJJ tanggal 03 Juli 2022 , Ersembah rikut ras erdame (Matius 5:23-24)

Sermon Bahan PJJ tanggal 03 Juli 2022

Bahan : Matius 5:23-24

Tema   : Ersembah rikut ras erdame

Bimbingen

            Bahan  PJJ ta enda eme salah sada Kotbah Jesus i das uruk eme kerna merawa maka merawa enda pasti menimbulken perselisihen si erbahanca la dame pusuh. Jadi ibas ersembah man Dibata perlu pusuh si dame,lalit rongket-rongketna.Sebab kiniteken la rikut ras perbahenen kiniteken si bage mate kap (bnd Jakup 2:17). Maka ersembah man Dibata e labo ritual saja tapi pe gaya hidup si ncidahken pusuh dame si teridah arah kegeluhenta ras kerina manusia maka lalit elem-elem. Ibas oraten PJJ enda enda ningetken maka ibas nehken persemahen, i persingeti Jesus man  kerina singikutken Ia maka arus alu pusuh si erdame, lanai lit sangkut ukur kalak si deban,adi lit denga sangkut ukur seninandu nandangi kam,tadingkenlah lebe persembahenndu e jenari erdame ras ia. Kenca bage persembahkenlah persembahenndu eman Dibata.Alu pengajaren Jesus enda maka ibas nehken persembahen enda labo guna pamer,entah mennonjolken diri bagepe rutinitas. Tapi sebagai tanda hubungen baik ras Dibata bagepe hubungen baik ras manusia. Sebab undang-undang Dibata pe i rangkup ibas engkelengi Tuhan Dibata asa ukur,asa tendi dingen asa gegeh li janah si peduaken engkelengi teman manusia bagi engkelengi didi sendiri. Salah sada engkelengi Dibata eme alu nehken persembahen alu pusuh dame, bagepe salah sada engkelengi teman mansuia engeluh erdame ras kerina manusia,lalit elem-elem.

Ersembah man Dibata eme biak geluh kalak si enggo ngaloken perkuah ate Dibata,alu bege kegeluhenna pe lit alu encidahken perkuah ate Dibata,jadi pasu-pasu man kalak si deban. Ersembah man Dibata eme biak nggeluh si erdame,sebab Dibata pe enggo mperdameken manusia arah anakNa Jesus Kristus. E maka kita pe si upayaken maka lalit permusuhen ras temanta manusia,lit pe mungkin la bagi ukurta temanta ula si pebelin-belin mis lah erdame,sebab alu bage nge maka cara ta ersembah bagepe ibas nehken persembahenta ialoken Dibata,janah kita pe ngaloken pasu-pasu ibas Dibata nari. Alu bage ibas hubungenta ras Dibata teridah hubungenta pe ras manusia mehuli ras sikeleng-kelengen bagi Dibata enggo ngkelengi kita. Jenari kita pe jadi kesaksin singgeluh,ibadah yang sejati ras si ngena ete Dibata eme mpersembahken dirinta jadi persembahen singgeluh ( Bnd Roma 12:1). Geluhta si pentingna si persembahken man Tuhan,eme alu njaga dirinta gelah la jadi batu sandungen nandangi kalak si deban tapi jadi pasu-pasu arah kita erdame ras kerina jelma banci kitas si sampat-sampaten ibas maba baban geluh enda (Bnd Galatia 6:2). Jenari arah dirinta nari si persembahken kali si lit iabs kita,gegeh,waktu,talenta,bagepe kinilitenta man Dibata. Jadilah kita sumber pasu-pasu bagi Dibata enggo masu-masu kita.Amin

Pdt Sunerlita Br Ginting, M.Th