Renungan Harian Rabu, 27 April 2022 , Erdahin Ibas Terang(2 Korinti 4:6 )

Renungan Harian

Rabu, 27 April 2022

Pertoton         : Bujur ibas terang si enggo icidahkenNdu kubas pusuh kami Tuhan. Amin

Pokok Pikiran : Erdahin ibas terang e maba kegeluhen ras keterkelinen.

Doa Safaat      : Perdamen konflik perang.

Usulen Lagu    : KEE 68:1-2, 15:1-2

Ogen   : 2 Korinti 4:6

Erdahin Ibas Terang

Bena-benana gelap mesangat ras la ertempas dingen la lit kegeluhen ope lenga Dibata erdahin nepa si nasa lit. E maka menaken pendahinNa itepaNa me terang. Arah gelap ndai reh me terang gia matawari, bulan, bintang lenga lit. Janari rehna? Ibas Dibata nari. Ibas ras arah terang ndai Tuhan erdahin nepa dingen ngaturken si nasa lit. Terang maba kegeluhen, terang e maba kiniraturen, janah teridah Dibata e mbisa dingen erkuasa.

Ibas cerita kita wari enda, Paulus nuriken kerna suratna man perpulungen Korinti kerna terang Tuhan e. Adi Dibata pe banci mpekeke terang ibas si gelap nari maka labo hal si mustahil pusuh sigelap e pe banci iterangi Tuhan segelah teridah kemuliaanNa arah Jesus Kristus si mate ibas kayu persilang. Renungenta enda nuriken maka Paulus ngadi nalahken ras mengutuki si gelap e, nalahken dosa ras iblis tetap denga erdahin maba manusia ndauh ras Dibata. Tugas kita nina eme ijinken terang Tuhan e erkuasa, erdahin ibas pusuhta segelah kemuliaan Tuhan teridah arah Jesus Kristus. Adi sungkun jelma sinterem, labo kerina jelma sempat ngoge Kata Dibata ibas Pustaka Si Badia tapi arah ayonta, perbahanenta kempak ia maka idahna me ayo Jesus, keleng ate Tuhan e hadir erkelng-kelengken kita. Ngadi mengutuki kegelepan tapi hadirken terang gia kitik tapi berdampak dingen maba perubahen ku simehuli man doni enda bage pe jelma si nterem.

(Pdt. Daud Sembiring/082367332167)