Renungan Harian Kamis, 17 Maret 2022, Roti Pergegeh(Markus 14:22)

Renungen Harian

Kamis, 17 Maret 2022

Pertoton         : Bujur Tuhan ibas pangan ras inemen siiberekenNdu man kami ibas wari enda.

Pokok Pikiran : Jadilah bagi roti sierguna man jelma sinterem.

Doa Safaat      : Para aktivis kemanusiaan.

Usulen Lagu    : KEE 292:1-2, 222:1-2

Ogen   : Markus 14:22

Roti Pergegeh

Ibas Perjamun malam ibas berngi ope lenga Jesus itangkap dingen ieksekusi acara enda ilakokenNa man ajar-ajarNa. Melala hal pelajaren ras pengajaren si ate Jesus icidahkenNa arah tradisi keagamaan kalak Israel siilakokenNa alu penekanen si mbaru. Perenungen wari enda lit dua bagin siarus siperdiateken. Pemena, Jesus ncepik-cepik roti e dingen merekenca man ajar-ajarNa. Engkai makana roti? Sebab roti e salah sada kebutuhen pokok si arus lit ibas kegeluhen manusia tep-tep wari. Adi iumpamaken man banta Indonesia enda e me “nakan”. Man kai roti e? Roti e jadi kebutuhen pokok si mereken gegeh, energi man banta guna ndalanken melala aktifitas. Kekurangen makanen berarti kekurangen daya hidup. Roti e arus jadi roti pergegeh man pertendin bage pe pergegeh man daging kula. Sebab buen dalanta ndalanken simehuli tupung megegeh asangken kelehen. Jadi man lah maka megegeh.

Peduaken, Jesus ncepik-cepik dingen mereken roti e man ajar-ajar, nina, “Buatlah, enda me badanKu”. Kemampuan ras kemauan guna erbagi sada ras sidebanna penting kal gelah Berita Si Meriah ras persadan e tetap megegeh. Semangat berbagi erbahanca maka si kote ipegegehi, si sontar ipekena, si bene idatken mulihi. Adi Jesus nggit mereken diriNa jadi tebusen man nterem jelma kita pe idilo guna ndalanken kai siperentahken Jesus e. Memang labo kerina kita banci ndalanken hal-hal simbelin sebab labo kerina seri gegeh ras kengasupen. Mungkin hal kitik si lakoken kita banci saja peristiwa si mbelin man kalak sideban.

Jadi tugas kita ibas kesempaten enda, jadilah roti pergegeh man doni enda. Berbagilah selagi sempat. Jadilah berguna sada ras sidebanna.

(Pdt. Daud Sembiring/082367332167)