Renungan Harian, Kamis, 17 Februari 2020, Kepentaren Tuhan (Kuan-Kuanen 3:19)

Renungan Harian, Kamis, 17 Februari 2020

Tema                     : Kepentaren Tuhan (Kuan-Kuanen 3:19)

Penulis kitab Kuan-kuanen mulai ngenehen, mengalami ras mpelajari kerina perdalanen kegeluhenna i doni enda janah melala hal banci nerangi pusuh ras perukurenna khususnya kinitekenna man Tuhan. Igejapna maka ibas muasna ciger wari e lau meciho banci jadi tambar dingen mereken gegeh simbaru. Tupung melehe pe malala pangan banci iolah guna ndatken gegeh simbaru nerusken kegeluhenna. Melala hal tempa la bagi ukur tapi kedungenna banci mereken pelajaren si meherga man bana. Cerita akhir ibas perdalanen geluhna pe terkadang la terprediski. Tapi reh mbagesna ia ngukuri ras mpelajari kerina tinepa Dibata enda maka reh pentarna, reh beluhna ia ndalani geluh i doni enda. Bahken, reh mbagesna ia rukur kerna kai siidah, si ialami ras ipelajarina maka semakin I tandaina keleng ate Tuhan e man bana. Tempa-tempa biasa nge adi inehen dingen ipergermetken tapi adi nutuslah dingen ipelajari maka banci biasa e jadi luar biasa. Melala denga rahasia Tuhan si lenga terpelajari, tersingkap man banta arah kai si itepa Dibata I doni enda.

Renungenta sekalenda mabai kita ngenehen kepentaren Tuhan arah kai siitepaNa ndube. Ise pe labo pernah ngidah uga rupa Tuhan e janah tugas kita labo ndarami bentuk rupa Tuhan e dingen erbahan gambarNa. Dahinta cukup makeken kerina tinepa Dibata enda alu pentar segelah e maba  kiniulin la saja man banta tapi kerina isi doni enda. Tuhan njadiken doni enda alu KepentarenNa, alu kebeluhenNa itamakenNa langit ibas inganNa. Ngantusi rahasia kedalamen pemeteh Tuhan maka mari sinehen, sipelajari rahasia tinepaNa doni ras langit sebab e ncidahken ise Tuhan e.

Pertoton              : Pengasup kami muji ras mpermuliaken kam Tuhan Si Mada Kuasa. Amin

Pokok Pikiran     : Rahasia Kepentaren Tuhan lit ibas kerina tinepaNa doni ras I langit.

Doa sapaat          : Bencana alam

Enden-enden    : KEE 2:1-2, KEE 9:1-2

Pdt. Daud R. Tuahta Sembiring, S.Th

(082367332167)