Minggu, 17 April 2022,Perjumpan Ras Tuhan( Markus 16:12 )

Minggu, 17 April 2022

Pertoton         : Ajari kami nandai kerehenNdu Tuhan arah setiap keadaan. Amin

Pokok Pikiran : Perkuatlah indera rohani.

Doa Safaat      : Bencana alam, semangat er PI.

Usulen Lagu    : KEE 257:1-2, 322:1-2

Ogen   : Markus 16:12

Perjumpan Ras Tuhan

Kenca Jesus keke ibas simate nari, icidahkenNa diriNa man nterem ajar-ajar ibas kesempaten si berbeda. Si unikna ibas cerita IA ncidahken diri, momen terakhir kal man ajar-ajar si sepulusada kalak siusur ras ia dingen si enggo ipilihNa. Si sepuluhsada enda me ajar-ajar elite, ring satu, khusus iperlengkapiNa jadi rasulNa. Tah kai maksud Jesus enda labo siangka. Endam ia kenyataan ibas cerita kitab Injil.

Ibas sada kesempaten, Jesus ncidahken diriNa alu rupa si la bagi biasana, alu rupa sideban tupung ajar-ajar e sangana ibas perdalanen ku bas sada kuta. Cataten ncidahken maka si dua kalak enda ajar-ajar singkelengi Jesus, si pernah megi kerna pengajaren ras ngidah tanda-tanda sengget si ibahanNa. Kepeken arah pengalamen dua kalak ajar-ajar enda banci kita erlajar erti meteh ras mengalami kerna kekeken Jesus. Nterem ajar-ajar e meteh pengajaren kerna kekeken Jesus tapi lenga mengalami erti kekeken Jesus bas geluhNa. Mesera akap kalak ngaloken berita kekeken e sebab nimbak hukum alam padahal berita enda hukum kiniteken, hukum ilahi. Emaka wajar nterem kalak la tek, khususna ajar-ajar si sepuluh sada e.

Si unik akap kami arah cerita enda, Jesus ncidahken baNa arah rupa sideban, si la bagi biasana. Kalak si engkelengi Jesus maka hati ras indera rohanina peka, nandaisa gia ia reh alu rupa si berbeda. Si sada frekuensi la pernah salah siaran. Sada getaran hati la pernah silap nandai si ikelengina gia reh alu melala rupa si berbeda-beda.  Si keleng atena Tuhan pasti ialamina, iidahna kehadiren Tuhan ibas setiap situasi, kondisi bahken pribadi sihadir ibas geluhna. Perkuat indera rohaninta.

(Pdt. Daud Sembiring/082367332167)