Bahan Sermon Khotbah Minggu 26 Juni 2022,IberekenNa Rikut Payona(Judas 1:24-25 )

Bahan Sermon Khotbah Minggu 26 Juni 2022

Invocatio: Nina Dibata, “genduari Si jadikenlah manusia si sentudu ras TempasTa, si menam seri ras Kita, gelah ikuasaina kerina nurung, perik-perik bage pe kerina asuh-asuhen ras rubia si meliar, subuk si galang ras si kitik (Kej 1:26).

Ogen : Judas 1:24-25 (Tunggal)

Kotbah : Joel 2:23-27 (Tunggal)

Tema : IberekenNa Rikut Payona

1. Perlebe

Nggeluh kerina lit aturenna. Kerina lit etikana. Bagem kira-kira pemahamen si enggo lit I bas kita secara umum I bas ndalani kegeluhen enda. minggu etika kerja I bas minggu enda pe ngingetken kita ka nge uga kita ngaturken kerna pendahinta tep-tep wari seh maka pendahin e erguna banta rikut pe jadi pasu-pasu man kalak sideban. Pemahamen maka gegeh erdahin e erbahanca maka kerina pendahin erlayas dingen mereken ulih simehuli rusur mabai melala kel kalak kecewa. Sebab kinatana labo ka kerina bage jadi. Rusur lupa kita maka I bas kerina kegeluhen lit kap Dibata si erkuasa sierdahin I tengah-tengah kegeluhenta dingen situhuna peranNa nge simbelinna I bas kerina sinidahiken kita e. bahanta I bas minggu enda mabai kita guna ngangkai kerna si enda terdauhen.

1. Penjelasen Teks

Ogen : Judas 1:24-25

Surat  si itulis Judas enda melala ngerana kerna pertenget man perpulungen kerna guru-guru perguak, rikut  nginget ras ngajarken perpulungen e kerna geluhna I bas masa-masa si enggo ibentasina, dingen natap pe ku bas kegeluhenna si gundari si melala erbage pengerana (bahasa) si la pas, sifat si lanai dem i bas kebadian, rikut pe perbahanen si salah. Mabai maka Judas negasken pengajaren  gelah kalak si erkiniteken e arusna min nggeluh ibas keleng ate Tuhan dingen mereken dirina pe erguna nandangi kalak si lit isekelewetna.

Ras secara khusus Judas 1:24-25, eme bagin penutup ibas kitab si gendek enda. si risi kerna puji-pujin si ipenangkih Judas erkiteken perbahanen Dibata man kalak siikelengina.

Ayat 24,  nuriken lit 3 hal si lakoken Dibata, eme:

• Dibata nge si ngasup engkawali gelah ola celus, labo hanya bersifat la ndabuh ku bas dosa/perbahanen jahat tapi pe lebih asa si e. kata celus enda iertiken ibas sada pengertin “kiam ibas kiniteken nari/murtad”.
• Si ngasup maba kam ku adep-adepen Dibata, (ind: tak bernoda……………dihadapan kemuliaanNya), enda negasken mulihi maka labo lit gegeh manusia ngadap man Dibata si badia erkiteken dirina si lanai badia erkiteken dosa. Tapi Dibata ngenca ngasup ngelakokenca man manusia.
• Dem keriahen ras la erpandangen,

Ayat 25, Pujin Judas man Dibata si ncidahken 4 jenis karakter Tuhan, eme kemuliaanNa, kedolatenNa (kebesaranNya : majesty), kuasaNa ras pemerentahenNa si ncidahken kerna kedaulaten kuasa ras gegeh Tuhan.  Jadi banci sikataken maka Judas 1;24-25 enda eme pujin si ipenangkih kalak sierkiniteken si enggo ngaloken perkuah ate Tuhan erkelangken Jesus Kristus si jadi Juruselamat.

Kotbah : Joel 2:23-27

Tema utama kitab Joel eme ‘the day of the Lord, eme kerna wari Tuhan”, tapi labo  menekanken peristiwa eskatologis (penghakiman terakhir) tapi memperluas pemahamenta kerna hal enda ku bas relevansina  ibas kegeluhen si gundari enda.  kitab enda pe bagi umumna kitab PL maka ncidahken uga belinna keterikatan antara ketaatan ras pasu-pasu bage pe ketidaktaatan ras hukuman. Aminna pe bage, tetap ka nge siidah uga Tuhan si dem keleng ate e lalap nge erusaha mabai gelah bangsana nadingken si jahat e dingen mulihken nuju kempak ia alu dem keleng ate. Situasi si terjadi tupung e, lit bencana nasional erkiteken bencana labang si rehna I utara nari (ay.19), taneh/juma-juma kerah si erbanca la rulih seh maka lumben/kelaparen jadi I bas paksa si e.  kerina bencana enda nuduhken penghukumen Tuhan man banngsa enda erkiteken kinilapatuhenna. erkiteken si enda makaTuhan erkelangken  Joel pe ngajuk kerina imam-imam/pemimpin kerohanian rikutken kerina kalak si lit I bas golongen peminem/pemabuk, pejuma, ras sidebanna gelah banci mulihken man Dibata, jera ras robah alu cara reh ndahi IA dingen erpuasa.

Secara khusus pengogenta ibas ayat 23-27 enda  nuduhken maka ibas pengajuk si ibereken Tuhan e I je pe lit janji pasu-pasu si isehkenNa man bangsa e.janji enda tergantung ku bas kesetian ras ketaatan bangsa e. erkiteken bangsa enda nggit ngaloken  dingen ndahiken pengajuk guna jera enda maka Tuhan erpadan mereken udan rikutken payona (ay.23)., ras pe masu-masu taneh siisuani alu ulih si sampur (ay.24), she maka kinirugin ibas tahun-tahun si lewat banci igantiken alu ulih si sampur e (ay.25).

Enda nuduhken man banta maka etika pendahin ras ulih pendahin e mbelin kel kaitenna ras bentuk ketaaten man Tuhan. Ertina, uga pe kerasna usahanta erdahin adi labo kita nggeluh malang dingen patuh  man Dibata maka kerina e banci sia-sia ras labo banci jadi pasu-pasu sebab Dibata nge situhuna siberotoritas i bas kegeluhenta enda (bnd. Mas127:1). Sebalikna ka pe adi taat man Dibata maka kai siidahiken e alu tutus ras ertanggungjabab maka mereken ulih si mehuli rikut banci pe jadi pasu-pasu I bas kegeluhen. (bnd. Yer 17;7, Kol 3;23).

• Pengkenaina
• Megati i bas kegeluhen enda sijumpai melala kel pengajaren ras pengajuk i bas ndalani kegeluhen si la sue ras sura-sura Dibata, tapi e justru meriah si akap ngikutkenca sebab siakap e payo. Baik i bas segi kegeluhen sosial, keberagamaan rikutken pe i bas caranta ndarami rejeki guna keperlun kegeluhenta (caranta erdahin). Enda icidahken ibas pengogenta kitab Judas 1 si paksa e melala guru perguak mabai dalan kegeluhen si papak man perpulungen. Tentu pengajaren enda mabai maka nggeluh banci erpalasken sura-sura pusuh ngenca, ndalankenca banci bagi ukurta saja (la ergiah-giah tapi ngikutken meriah akap daging), la tutus, perayaken terjeng doni ngenca, si mabai maka kegeluhen ras carata nggeluh labo mehuli ras la jadi pasu-pasu. Tapi selaku kalak sierkiniteken bagin khusus pengogenta eme ayat 24-25 ncidahken maka kalak si tek e lalap ngasup ngataken bujur man Tuhan alu mpenangkih pujinna erkiteken i idahna maka Tuhan enggo erdahin i bas kerina kegeluhenna alu mehuli, dingen IA enggo ka erdahin pe alu kuasaNa mereken keselamaten man manusia, seh maka iakuiNa kedaulaten Tuhan e alu ncidahken cara nggeluh termasuk pe carana erdahin bagi hulina Tuhan erdahin sedekah enda  i bas kegeluhenna. Cara Tuhan si dem alu kiniulin e jadi ikukten man bana ndalani kerina kegeluhenna.
• La tersilahken kerna situasi si jadi i bas kegeluhen, baik e simabai ukur senang bage pe si lang. Misalna bencana si jadi i tengah-tengah doni enda. Sebab banci jadi arah situasi enda salah sada cara Tuhan mabai kita gelah nggeluhken kegeluhenta reh rembakna kempak Ia. Si la bagi ukur e jadi seruan pertobaten man banta kerina gelah mulihken nggeluh i teruh keleng ate Tuhan dingen ngaloken pasu-pasuNa si simpar e arah kerina kai si idahiken kita (Joel 2:23-27).  Enda salah sada caranta ngidah maka Dibata nge sierkuasa i tengah-tengah kegeluhenta. Emaka alu bage patut nge kita arus tetap nggargari kecibal kegeluhenta payo ntah lang i adep-adepen Dibata sebab i bas nggeluh patuh man Dibata i je melala sialoken kiniulin.