Sermon Kotbah Minggu 23 Januari 2022 (Minggu Epiphanias 3), Jesus Me Pilihen Ras Persuruhen Dibata

Sermon Kotbah Minggu 23 Januari 2022 (Minggu Epiphanias 3)

Invocatio        : Kalak si ngataken maka ia nggeluh ersada ras Dibata, ia arus nggeluh bagi Jesus

Kristus (1 Johanes 2 : 6).

Ogen               : Nehemia 8 : 1 – 9 (R)

Kotbah            : Lukas 4 : 14 – 21 (T)

Tema              : Jesus Me Pilihen Ras Persuruhen Dibata

Arah kotbah Minggu Epiphanias sipeteluken enda, tole ipetangkas man banta maka Jesus eme pilihen ras persuruhen Dibata si reh ku doni enda guna ngajari manusia uga arusna ndalanken/ngelakoken ras ndahiken si ngena ate Dibata, Guna sie, icidahkenNa pe kuasa Dibata si mereken pembebasen man manusia segelah arah e manusia ipengasup nehken sura-sura Dibata.

Siilakoken Jesus ibas Lukas 4:14-21 enda eme kenca IA dung icubai Iblis ija erkiteken ieteh Iblis maka labo terpengaruhina Jesus gelahna ndalanken siisurakenna, emaka itadingkenna Jesus (ay. 13).  Kenca itadingken Iblis, lawes Jesus ku Galilea, si paksa e ikuasai kekaisaren Romawi mulai tahun 63 SM. Ibas ayat 14 ikataken maka ikuasai Kesah Si Badia IA. Lukas nekanken kal peranen Kesah Si Badia ibas pelayanen Jesus (Luk. 1:35; 3:21-22; 4:1, 14) sabab payo Jesus e Dibata tapi IA sekaligus pe manusia. Emaka sebage sekalak manusia, Jesus arus ndatken gegeh, penampat ras pimpinen ibas Kesah Si Badia nari gelahna ibas kemanusianNa e pe tuhu-tuhu tetap IA ngasup ndalanken ras ndahiken kerina tanggung jabap siiampeken man baNa sabab ibas kemanusianNa e lit daging bagepe hal-hal manusiawi si sifatna kote (la megegeh) ras terbatas bagi niNa man ajar-ajarNa, “Erjaga dingen ertotolah gelah ola kam ndabuh ku bas percuban. Ukur manusia mehuli kap tapi kote dagingna” (Mat. 26:41).

Hal si menarik guna jadi usihenta pe eme Jesus ngajar ibas rumah-rumah pertoton ntah Sinagoge si lit i Galilea e janah kerina kalak muji IA. Enda erkiteken ibas IA ngajar e, lit ije kuasa ras otoritas erkiteken pendahin Kesah Si Badia e. Dungna seh me IA i Nasaret inganNa ipebelin. Nasaret eme sada kota si kitik i daerah Galilea. Sanga wari Sabat ku rumah pertoton ntah Sinagoge IA bagi biasana. Sinagoge ertina perkumpulan eme ingan pulung sekelompok kalak guna ersembah (beribadat), erlajar ras njaga identitas agamana. Paksa e Sinagoge enggo jadi ingan si penting ibas peribadaten Jahudi ras kegeluhen komunitas i daerah-daerah sekitar Laut Tengah. Bas Sinagoge e lit pemimpin janah pemimpin e berhak (bebas) mereken kesempaten erkotbah ntah ngajar man ise saja si pulung ibas paksa e si iakapna banci erkotbah (bdk. Perb. 13:14-15). Em dalanna maka paksa e Jesus banci ngajar ibas rumah pertoton ntah Sinagoge e.

Mulihi kerna Jesus lawes ku rumah pertoton bagi biasana (ay. 15) ncidahken uga Jesus patuh ras setia ndalanken perentah Dibata lako nginget ras ngergai wari Sabat. IA mereken usihen ketaaten ndalanken perentah Dibata. Enda ncidahken pe kerna prioritas geluh Jesus eme ersembah ibas waktuna. Ketedehen ate eribadah ras megiken Kata Dibata eme pe si idah lit ras ilakoken kalak Israel si enggo mulih i pembuangen nari alu kepulungenna kerina subuk dilaki, diberu bagepe danak-danak si enggo ngasup ngantusi Kata Dibata i tengah kesain deherken gerbang Lau  i Jerusalem. Ketutusen atena e teridah pe ibas keseriusenna megiken kai siiogeken Esra mulai matawari pultak nari seh ciger (Ogen Nehemia 8:1-9). Adi kita uga menda ? Piga dekah menda kita ngasup megiken kotbah kerna Kata Dibata ?

Tedis ibas ngoge Kata Dibata bas paksa e eme sebage sikap ras tanda pengergan rikut kehamaten nangdangi Kata Dibata e (ay. 16c; bdk. Neh. 8:4-5, 7). Siioge Jesus paksa e eme Jesaya 61:1-2 si isina kerna kerehen persuruhen si ipilih Dibata guna maba berita ras pembebasen man 4 kelompok masyarakat si ngenanami ate mesui eme kalak musil, tertaban, pentang, itindas subuk secara jasmani (daging kula) bagepe secara pertendin (rohani).

Secara jasmani (daging kula) eme musil erkiteken kadena kin pe la lit; tertaban eme kalak si sangana lit ibas penjara ntah iperbudak; pentang erkiteken matana la erpengidah; itindas eme iperlakuken la adil, la bujur, la bagi arusna. Kalak-kalak si bagenda eme kalak si la iperhitungken i tengah-tengah masyarakat, si terpinggirken, idiskriminasiken ras ieksploitasi ntah imanfaatken erkiteken sistem si la adil si buen menguntungken man kalak bayak, pejabat pemerintah, pengusaha ras pemimpin agama. Akibatna enterem kalak jadi tabanen subuk erkiteken perang ntah pe erkiteken la tergalarna utangna. Deba erkiteken tindaken kriminal siilakokenna umpama nangko gelah banci man saja lah gia. Kemusilenna e mahanca ia pe kurang ndatken pangan si cukup ras sehat mahanca ia rentan kena penakit. Di kune sakit, la ka ndatken pengobaten si layak. Emaka oratna entah malem nge min ndai penakitna, tapi sijadi justru sebalikna reh kelekna penakit e emaka lit nge kalak tupung tubuhna ndube kuh ring-ringna kerina erfungsi ras sehat tapi erkiteken kurang gizi, perawaten ras pengobaten, bas pertumbuhenna jadi lit si kurang ibas fisikna, umpama kertang, difabel, rsd.

Secara pertendin (rohani) eme erkiteken ikuasai dosa. Musil erkiteken perukurenna si kerdil, sempit, tertutup mahanca la ia ngasup nggejapken maka situhuna bayak nge ia. Kalak si bagenda me si rusur mengeluh, kelsehen, kurang-kurangen sabab lalap akapna la bias. Emaka banci nge ia bayak secara materi tapi musil bas pengucapen syukur man Dibata bagepe makeken si lit bas ia e guna kalak si deban (bdk. Sakeus ibas Luk. 19:8). Tertaban eme kalak si geluhna ikuasai dosa alu kerina kerincuhenna mahanca kalak e teridah lanai ergegeh mulahi bana ibas kecenderungen pusuh perukurenna guna erbahan dosa.  Pentang eme kalak si lanai ngasup ngidah maka lit denga Dibata si ngkuasai ras ngaturken geluhna, Dibata si man baNa me pepagi ipertanggung jabapken kerina siilakoken manusia e bas geluhna. Kepentangen pertendinna e mahanca la ia nggit ernalem man Dibata, justru sebalikna igeluhkenna geluhna bagi ate-atena saja.. Itindas eme kalak si geluhna enggo idehken dosa mahanca enggo bene keriahenna.

Kenca dung IA ngoge, emaka nina Jesus, “Sendah enggo seh isi Pustaka Si Badia si ibegindu ndai” (ay. 21) sabab kerehen Jesus e eme masana Tuhan mulahi bangsaNa (ay. 19). Alu enda Jesus memproklamirken maka Mesias siipadanken Dibata e enggo ringan i doni enda guna meritaken ras maba pembebasen man manusia. Bagem pe oratna kita, bagi isenaken ibas invocatio 1 Joh. 2:6 maka tandana kita nggeluh ersada ras Dibata, maka la banci lang arus nggeluh bagi Jesus eme meritaken Berita Si Meriah bagepe maba, ngelakoken ras nehken pembebasen subuk man temanta manusia bagepe tinepa Dibata sidebanna gelah kerinana banci nggeluh alu layak ras ermeriah ukur.

 

 

 

Bahan Sermon Perpulungen Jabu-Jabu Tanggal 23 – 29 Januari 2022

(Evaluasi Sasaren Program GBKP Tahun 2021)

Ogen               : Kejadin 41 : 37 – 43

Tema              : Anak Si Nguda Jadi Pasu-pasu

Sasaren program gerejanta ibas tahun 2021 si lewat eme Anak Si Nguda Jadi Pasu-pasu (Generasi Muda Menjadi Berkat) alu arapen gelahna arah sie, reh buena anak singuda ibas gerejanta subuk KA/KR bagepe Permata si muat bagin ibas dahin-dahin (kegiaten-kegiaten) gereja sekaligus maba nanam si mehuli ku tengah-tengah masyarakat. Payo tahun enda, sasaren program e enggo ganti tapi labo ka e erbahanca ikut ngadi pe perayaken uga gelahna anak singuda e terus jadi pasu-pasu arah kerina dampar geluhna tanda ia enggo jadi paleren pasu-pasu Dibata ku sekelewetna.

Emaka erpalas kubas ogenta paksa enda, tandana anak singuda e tetap jadi pasu-pasu maka erlajar me kita kubas Jusup si paksa e tading/ringan i Mesir. Piga-piga hal sibanci sidatken arah ogen enda tanda Jusup enggo jadi pasu-pasu e eme gia Jusup enda labo kalak Mesir asli, statusta pe situhuna labo jelas kal sabab sebage kalak si itukur nge ia maka seh i Mesir tapi kenca kentisik erdahin ras Potifar tapi arus ka masuk tutupen (penjara) erkiteken tuduhen kejahaten ngelakoken si la mehuli man ndehara tuanna. Adi ikataken minoritas, termasuk me pe. Tapi Jusup enda ndatken pengakun ibas raja Mesir nari kerna kepentaren ras pengertinna si la terpeseri ras ise pe si lit i Mesir ibas paksa e (ay. 38). Enda ncidahken bobot ntah kualitas pemeteh ras kepentaren Jusup si sangat iperluken guna ngaturken  negeri Mesir paksa e. Jusup pe iakui Raja Mesir e sebage sekalak si lit ibas ia Kesah Dibata (ay. 38). Enda ncidahken bobot (kualitas) pertedin (spiritualitas) Jusup si mehuli. Enda teridah arah kepentaren ras kengasupen Jusup mereken ide, masuken si mehuli kerna kai si arus ilakoken raja Mesir bagepe kerina rakyat Mesir guna kiniulin negeri Mesir.

Erkiteken kualitas si lit ibas dirina eme maka Jusup ipercayaken raja Mesir jadi wakilna lako ngaturken negeri Mesir eme kenca raja Mesir, Jusup me si erkuasana i Mesir. Enda ncidahken maka kesempaten guna ngelakoken sada-sada hal si erguna man masyarakat bagepe ndatken keduduken ntah jabaten penting ibas bangsa ras negara ija kal gia anak singuda e ringan/tading, terbuka kal man anak singuda bas gerejanta enda asalken lit kualitas geluhna si banci iandalken. Emaka la banci lang, anak singuda e arus terus menerus ningkatken kualitas geluhna subuk ibas spiritualitas, pengetahuan bagepe emosional sabab kecerdasen si bagepe me siiperluken jelma si enterem.  Tandana anak singuda e jadi pasu-pasu bas geluhna, teridah arah litna ide-ide, saran-saran, masuken-masuken ras tindaken-tindaken (perbahanen, aksi) sipehuliken subuk ibas jabu, gereja, persekolahen, pendahin ras masyarakat.

Pdt. Eben Eser Depari, M. Th

GBKP Runggun Simpang Selayang