SERMON SABTU PENGARAPAN (Sabtu, 16 April 2022 Warna Stola Ungu) , Nggeluh Bagi Si Ngena Ate Tuhan ( 1 Petrus 4:1-8 )

Invocatio        : Pengarapenku man Dibata bali ras pengarapenku kalak enda, maka lit nge kekeken ibas si

  mate nari, subuk kalak si bujur bage pe kalak si la bujur (Perb. 24:15)

Ogen               : Job 14:1-14 (Responsoria)

Khotbah          : 1 Petrus 4:1-8 (Tunggal)

Tema               : Nggeluh Bagi Si Ngena Ate Tuhan

1. Perlebe

Kematen eme salah sada peristiwa si seh asa genduari tetap jadi misteri man manusia. Ikataken misteri erkiteken manusia alu akalna (pikirenna) la ngasup mastiken kerna wari, jam, ingan ras kecibal manusia kenca mate. Emaka kematen megati jadi salah sada si jadi kebiaren manusia. Tempa-tempa pengkawali Dibata, kuasa Dibata terjeng ibas doni enda ngenca. Emaka melala genduari manusia e, guna memperlambat kematenna erbahan usaha. Misalna saja berolah raga, man pangan si sehat, mpedauh pantangen pinakitna, njaga diri gelah awet muda, pan vitamin, bagepe salah satu topik doanta eme gelah sehat ras mejuah-juah. Tapi, situhuna garis batas manusia nggeluh i doni enda enggo me itetapken Dibata dingen la banci ielakken manusia alu usaha/ cara si ugapana.(Bandingken pengogenta Job 14:1-14).

Emaka ibas kita mperingeti kerna Sabtu Pengarapen enda, mbabai kita guna mpebagesi pengangkanta kerna uga belinna keleng ate Dibata arah kematen Tuhan Yesus. Iajuk kita guna nggejabken uga Yesus ibas nebusi dosa manusia, si bengket ku doni kematen guna naluken kuasa kematen e segelah kita ngaloken keselamaten. Arah pengorbanen Yesus e, mpeturah pengarapen man banta maka ibas Yesus lit kekeken ras kegeluhen si rasa lalap. Emaka mehergalah siakap pengorbanenNa janah sijadiken e penjemba man banta guna tetap nggeluh bagi singena ate Tuhan.

2. Isi
3. Khotbah: 1 Petrus 4:1-8

Petrus ibas suratna mereken sada nasehat man kalak si erkiniteken kerna kai si arus alakoken kita

ibas ngalakan erbage-bage perbeben geluh. Eme alu tetap ngasup ngkuasai diri ras petenang ukur alu tetap tutus ertoto. Arah toto tetap terjalin komunikasinta si mehuli ras Tuhan seh maka turah ketetapen ukurta guna engkuasai dirinta terlebih ibas ngalaken erbage-bage perbeben, kiniseran, ras kesusahen alu mehuli. Seh makana aminna pe kita ngenanami erbage-bage kiniseran, tetap kita ngelakoken si ngena ate Tuhan, la kita terpengaruh man godaan-godaan doni enda si erban kita ndauh ras Tuhan. Selain si e, Petrus pe ngajuk perpulungen gelah tetap geluh sikeleng-kelengen alu tutus,  sebab keleng ate me si banci namburi kerina dosa. Ipersingeti Petrus perpulungen e, aminnn gia melala perbeben, masalah, kesusahen,  selaku anak-anak Tuhan arus tetap geluh ibas keleng ate.  Bagi inti pengajaren Yesus eme kekelengen, ras pe IA kap kekelengen e.  Ibas situasi si ugapanape tetap ngasup nehken keleng ate man sapih-sapih manusia.

1. Ogen: Job 14:1-14

Nina kuan-kuan ‘Kiniseran kite-kite dalanna ku si jorena’. Enda me si terjadi ibas kegeluhen Job.

Ibas bahan ogenta ituriken kerna beratna perbeben Job seh makana ipilihna dalan kematen ibas ia ndungi masalahna. Tapi dungna idatna pengarapen arah perbeben siihadapina. Tek kel Job bahwa kenca ia mate pasti alokenna kekeken ibas Dibata nari. Sebab tek kel ia nandangi kekelengen Tuhan man bangsaNa. Emaka lanai ia lit ibas eraru ate erkiten janji Tuhan mereken kemalemen ate e pasti ras amin. Bage me sura-sura Tuhan nandangi kerina kalak sierkiniteken. Aminna lit kiniseran ras perbeben si mesangat tetap ernalem man Tuhan saja.

1. Invocatio Perb. Rasul 24:15

Ituriken Paulus nina itamakenna pengarapenna man Dibata, tek ia bahwa lit nge kekeken ibas si mate nari, subuk kalak bujur bagepe kalak si la bujur. Arah si e teridah bahwa Paulus nggejabken kuasa Tuhan si tetap mereken keselamaten man bana. Gegeh si rehna ibas Dibata nari si erbanca ia ngasup ndalani kegeluhenna. Emaka ibas geluh entah mate tetap iandalkenna gegeh si rehna ibas Dibata nari, sebab geluh entah mate sikerajangen Tuhan kap. Si penting eme kita nggeluh tetap ngelakoken singena ate Tuhan ras mate ibas gelar Tuhan ka.

3. Aplikasi

Renunganta ibas wari sendah mabai kita guna tole ngergakan kerna pengorbanen Yesus si mate i kayu persilang dingen erjuang bas doni kematen nari guna naluken kuasa dosa segelah kita ndatken keselamaten. Sieteh dingen sigejabkenlah maka kematenNa erkiteken dosa-dosanta, guna nebusi kita? Emaka haruslah lit ibas dirinta ras teridah ibas kegeluhenta bagi temata Nggeluh Bagi Si Ngena Ate Tuhan. Em tandana kita ngergaken kematen Kristus i kayu persilang guna nebusi dosa-dosanta.

Bagepe ibas wari Sabtu Pengarapen enda mari sirenungken uga belinna kuasa Dibata guna kiniulin manusia si iselamatkenNa. Labo perban beluhta ntah tunggungta. Tapi erkiteken perkuah ate Dibata nge. Hanya kita kurang nggejabken keleng ate Dibata e seh maka kurang pengataken bujurta man Tuhan. Emaka arah renungenta wari si sendah iajuk kita tetap ngelakoken si ngena ate Tuhan si jadi pengataken bujurta man Tuhan ibas dampar geluhta.

Tandana kita ngelakoken si ngena ate Tuhan eme ngasup kita ncidahken geluh sikeleng-kelengen ras sisampat-sampaten, megegeh dingen saber ibas ngalaken kiniseran ras perbeben ibas geluhta.