Sermon PJJ tanggal 19-25 juni 2022 Erta Ras Kebayaken I bas Tuhan Nari 1 Kronika 29:10-14 (persembahen Kerja Rani)

Sermon PJJ tanggal 19-25 juni 2022

Erta Ras Kebayaken I bas Tuhan Nari

1 Kronika 29:10-14

(persembahen Kerja Rani)

Kegeluhen kiniteken arusna teridah arah perbahanenta,salah sadana eme arah kita nehken pengataken bujur man Dibata. Nehken persembahen eme tanggungjawabta man Dibata jadi salah sada pengakunta maka Tuhan mereken pasu-pasu ras rejeki man banta. Janah palas si payo ibas kita ngertiken perbahanen Dibata tentu payo ka carata ibas nehen persembahenta man Tuhan.

Ibas 1 Kronika 29:10-14 enda nuriken kerna ende-enden pujin pemasmur ibas nggejabken keleng ate Dibata. Lit teridah pengakun Daud kerna Dibata si Mbelin, si terberita, si mulia, si mehulina ras Dibata kap si mada kuasa. Kerina langit ras doni Dibata simadasa. Dibata kap Raja ras pemerintah I babo kerinana. Pengakun enda iakuken Daud ilebe-lebe perpulungen ipuji ras iturikenna kerina kiniulin Dibata. Pengakun enda rehna ibas penggejapen ras pengalamen kegeluhenna tep-tep wari ibas keleng ate Tuhan.

Bagepe ibas ndalani kegeluhen ibas jabaten ntah pe pemerentahenna Daud nggejabken kerina ulu gegehna eme rehna ibas Dibata nari. Kerina erta-erta ras kinibayaken bas Dibata nari rehen. Dibata merentah alu kuasa ras gegeh janah Dibata ngasup erbahan kalak jadi mbelin ras erkuasa. Arah penggejapen sibage rupana Daud ngataken bujur man Dibata dingen rende ia muji gelar Dibata si mulia.

Lit pengakun Daud maka labo ia ngasup mere man Dibata. Sebab kerina ialoken ibas Dibata nari. Ulih pengataken bujur man Dibata e pe ngulihkenca ngenca man Dibata ibas Buena pemere Tuhan man bana. Pengakun si bagenda nge erbahanca reh sukacita kita mere man Tuhan sebab kerinana pemere Dibata kap.

Kai siinanami Daud jadi pengalamenna ibas nehken persembahen. Jadi bukti pengataken bujur man Dibata. Bage ka lah kegeluhen kinitekenta man Dibata. Penggejapen maka kerina ulih pemasu-masun Dibata erbahanca kita ngasup nehken simehulina ibas dirita guna kemuliaan Tuhan,

Ibas gerejata GBKP lit erbage-bage bentuk persembahen si nggo semal eme persembahen ibas kebaktin/PJJ/PA/ Retreat ras sidebanna. Persembahen riah ukur erkiteken kesehaten, pendahin, anak, persekolahen ras sidebanna. Persembahen perpuluhen/bulanen arah penggejapen kinitekenta ija Dibata nemani pendahinta tiap bulanna. Persembahen kerja rani setahun sekali nginget ras nggejapken uga Dibata masu-masu ulih juma, usaha, ras pendahinta. Intina amin lit si seri bentuk-bentuk persembahen enda tujunna eme ngingetken kita gelah tetap siakui maka ibas kerina pendahinta e bekas pemasu-masun Dibata. Janah ibas kerina pengakun e Dibata terpuji ras termulia. Ula kita jungut-jungut alu ngataken ntah kai deba tapi mari mpeturah pengakun ibas mpehaga Dibata. Janah kiniteken maka labo pernah kekurangen ise saja si nehken persembahenna alu tutus, tulus ras ermeriah ukur.