Sermon Pekan Penatalayanan GBKP Wari Peenemken Klasis Medan – Namorambe, Metenget Nandangi Pengajaren Si La Tuhu ( Perbahanen Rasul-Rasul 20:29-31)

Invocatio :“Metengetlah nandangi nabi-nabi perguak, reh ia ndahi kam bagi biri-biri si melemuk tapi situhuna ukurna bagi serigala si merawa” (Mat.7:15)

Ogen       : Masmur 119:110-112

Khotbah : Perbahanen Rasul-Rasul 20:29-31

Tema       : Metenget Nandangi Pengajaren Si La Tuhu

Sekalak si erjaga/petugas keamanan tentu ertanggungjawab adina lit kejadin kebenen tupung ia ertugas, sebab tugasna eme mengawasi, janah iarapken la lit si luput bas pengawasenna nari. Bageme pe sekalak Serayan Tuhan ertanggungjawab adi lit perpulungen si nadingken kinitekenna erkiteken ngikutken ajaren-ajaren si papak. Enda me si i singetken Rasul Paulus sope ia nadingken perpulungen Epesus. Ibas perpisahenna ras pertua-pertua si lit ije, ibelaskenna kerna tantangen ras ancamen si nandangi ialaken pertua-pertua e seh maka arus min ia kerina metenget dingen erjaga-jaga.

Bas nats enda Rasul Paulus make istilah “serigala si merawa” si nandangi reh, kenca ia pagi lawes nadingken perpulungen Epesus (ay.29), eme guna nuriken pengajar-pengajar sesat/guru perguak si atena mabai kalak si tek man Kristus kubas kepapaken. Istilah enda eme penggambaren kuga ngeri-na guru-guru perguak e, si banci menerkam sekaligus meneken kalak si nggo tek man Kristus seh maka nina serigala e “la alang-alangen ncedaken perpulungen e.” Kehadiren guru-guru perguak e ertujun guna memutarbalikken pengajaren Kristus gelah ndatken kekuasaan ras pengikut, jenari ncampurken ajaren Kristus ras pengajaren-pengajaren sideban nari, termasuk ilmu-ilmu filsafat. Litna pengajar-pengajar palsu e situhuna jadi tantangen teptep perpulungen paksa si e, labo hanya perpulungen i Epesus. Emaka ngidah si e me maka rasul Paulus mereken pedah gelah metenget sebab ajaren-ajaren si papak e mpeturah perubaten ras persoalen kap ngenca, la erguna nandangi rencana Dibata pas bagi si ipedahken rasul Paulus pe man  anakna Timotius (1 Tim.1:4). Ija nari kin rehna guru-guru perguak e? Nina rasul Paulus maka itengah-tengah perpulungen e nari keke me kalak si ngajar alu pengajaren si la tuhu, si atena narik kalak si enggo tek man Jesus guna jadi pengikutna (ay.30) enda nuriken maka pengajar-pengajar palsu ija pe lit, janah rehna ibas perpulungen e nari, emakana ipindo rasul Paulus gelahna pertua-pertua i kota Epesus e erjaga-jaga, sebab telu tahun enggo dekahna rasul Paulus ringan ije nehken Berita si Meriah alu iluh mambur, arusna ola min tersia e perbahan kurang metenget nandangi pengajar-pengajar sesat. Kai dage makna ras kaiten renungennta enda kubas Pekan Penatalayanen?

Tema-ta bas wari pe-enemken enda eme “Metenget Nandangi Pengajaren Si La Tuhu” kita iajuk bas menaken dahin-dahin pelayanen i tahun simbaru enda, tetap min kita erjaga-jaga sebab banci jadi pengajuk doni enda si terlihat biasa-biasa, si jadi bagian kehidupan sehari-hari kepeken banci meneken kinitekennta, lanai mabai kita ku dalan si ngena ate Tuhan, misalna alat komunikasi, kecanggihen teknologi, paham humanisme, banci mabai kita reh dauhna bas Tuhan nari, sebab siakap jagon/hebaten manusia asangken Tuhan Dibata, ras gegehnta nge si penalem bas erbahan kai pe, padahal tema besar Pekan Penatalayanen tahun enda eme “Erberita Si Meriah Arah Tinepa” si ningetken kita maka kerina si lit bas doni enda eme bekas tinepa Tuhan baik secara langsung maupun melalui tangan-tangan manusia misalna: Tuhan make manusia jadi alat-Na menciptaken teknologi, hasil karya manusia e banci mabai teptep jelma lupa nandangi mbelinna kuasa Tuhan, bahkan kita sesama manusia pe banci saling menjerumusken kubas dosa tapi ingetlah bagi kesaksin Pemasmur si tetap setia ia nandangi perentah-perentah Tuhan amin isidingi kalak jahat pe ia, janah seh kutampuk umur geluhna atena lalap ngikutken undang-undang Tuhan. bagelah min kita pe bas ndalani wari-wari geluhnta bas tahun simbaru enda, si tetapken lah ukurta maka la banci ibabai pengajuk kai pe meneken kinitekennta man Tuhan. Kai pe peranennta ibas gereja, subuk Serayan Tuhan bagepe ngawan ni perpulungen, ingetlah guna berhati-hati nandangi “serigala” doni si mabai kita ndauh ibas Tuhan nari, metengetlah njagai kiniteken seisi jabunta, temannta seperpulungen terutama kinitekennta jine. Tanggungjawabnta eme nggeluh ibas pengajaren Kristus dingen nehken ajaren e alu payo bagi si ngena ate Tuhan saja. Selamat Pekan Penatalayanen wari pe-6 ken!

Pdt. Elisabeth R. Ginting, M.Th

(GBKP Gedung Johor)