SERMON PEKAN DOA WARI/BERNGI IV * GBKP KLASIS MEDAN – NAMORAMBE * Ertoto ras Pengalemen ( Markus 11:25-26)

Invocatio    : Isuruhna kami mindo man bandu bagenda, alemilah salah senina-seninandu asum ibahanna si la mehuli man bandu. “Erdandanken  si e mindo kami gelah ialemindu salah si enggo ibahan kami man bandu. Kami enda kap suruh-suruhen Dibata si isembah bapandu.” Tangis Jusup tupung ialokenna tenah enda (Kej. 50:17).

Khotbah      : Markus 11:25-26

Thema         : Ertoto ras Pengalemen

Tentu kerina kita pernah erbahan salah, janah kalak pe pernah kang erbahan salah man banta, enda sifat manusiawi kap! Tapi apakah lit hak-nta erbalas man kalak si erbahan salah? Adi lit, tentu kalak pe lit ka nge hak-na erbalas man banta, saja apakaha secara kiniteken enggo payo hal si bage sidalanken? Ibas Pekan Doa si pe-empatken enda kita ipersingeti kerna ertoto  ras pengalemen, emaka lit piga-piga hal si man renungennta eme:

1. Ertoto la danci lepas ibas kegeluhen kalak Kristen. Doa eme nafas geluh kalak si tek (nafas adalah tanda-tanda kehidupan). Bayangken saja adi kita la danci erkesah pasti menyiksa, ras danci jadi erbahan kita mate, bage ka pe kerna ertoto. Adi jelma nggeluh la ertoto, maka kegeluhen rohani-na mate, sebab toto e bentuk persadannta ras Tuhan. Toto e sifatna dua arah antara manusia ras Tuhan. Labo saja kita nuriken isi pusuhta tapi kita pe ngaloken sura-sura Tuhan ije me IA ngerana. Lit 6 poin si penting si kataken Pustaka Si Badia kerna ertoto:

• Ngidah Dibata sebagai Bapa ras sipermuliaken IA (Mat.6:9)
• Ertoto la bertele-tele (Mat.6:7)
• Ertoto alu bulat ukur (Mar.11:24)
• Meteruk ukur ras la pamer/gelah idah kalak (Mat.6:5-6)
• Ertoto alu ukur si bersih (1Tim.2:8)
• Ngalemi salah kalak si deban lebe (Mat.6:14-15).

Enda me poin penting ibas ertoto, emaka ula lupa maka ibas ertoto pe perlu kita lebe ngalemi salah temannta, gelah dat kita pe pengalemi dosa ibas Dibata nari.

2. Pengalemen eme tindaken entah pe pilihen guna nantangi kalak ibas ukumennta nari ras mpercayaken kerinana man Tuhan. Kamus mendefenisiken pengalemen (pengampunan) eme “Pembatalen utang”. Emaka tupung kita memilih guna ngalemi, maka si perani manfaat si la terbatas ibas pengalemen. Adi mulih kita kubas penungkunen Petrus man Yesus: “ O Tuhan, piga kali banci ku alemi seninaku si ersalah man bangku? Seh pitu kali?”, Erjabab Yesus:” Lang, labo seh pitu kali, tapi pitu pulu kali pitu kali” (Mat.18:21-22). Ijenda Yesus atena empeseh manfaat ras berkat si la terbatas man kalak si git ngalemi teman. Janah kita kerina tek, maka kita kerina i alemi ibas Kristus Yesus i kayu persilang. E me si membatalken utangta. Pengalemen ibas Yesus e tanpa syarat. Kita harus ngalemi salah kalak si deban terlepas ibas apakah si ersalah e meminta maaf entah pe lang. Alu kata sideban kemampuan kita guna ngalemi labo tergantung nandangi tindaken kalak sideban.

3. Enterem kalak lupa uga ersadana kiniteken ras pengalemen. Eme si ajarken Yesus ibas nasehat nandangi ertoto (Mar.11:20-26). Adi syarat si ibereken Yesus lit ibas kita kineteken man Dibata maka danci i pindahken uruk-uruk miser ku lawit. Adi tetap ukur janah tek maka kai si kataken kata e jadi (ay.23). Emaka i lanjutken Yesus nina: “Adi ertoto kam bagepe mindo janah tek maka nggo ialokenndu, ibere Dibata nge man bandu kai pe si ipindokenndu” (ay.24). Kiniteken si paguh danci erbahan kita tek alu bulat ukur man Tuhan. Ras si nen ayat si jadi renungennta nina: “Bage pe adi tedis kam ertoto, alemilah kerina kalak si ersalah man bandu, gelah Bapandu si i Surga pe ialemiNa dosa-dosandu” (ay.25). Jenari itegaskenNa sekali nari kebalikena nina: “Adi la ialemindu kalak si deban, Bapandu si i Surga pe labo ngalemi dosa-dosandu” (ay.26). Rangkaian kalimat enda nuduhken kaiten si cukup erat antara kiniteken ras pengalemen. Sope langa kita ertoto, kita leben ngalemi kalak si ersalah man banta si ertina, totonta pasti berakhir sia-sia adi kita langa melepasken sakit hati-nta ntah pe dendam si lit ibas ukurnta. Alu bage sura-sura Yesus gelah kita sadar, ngalemi kalak si ersalah man banta eme dasar utama guna ngaloken pasu-pasu ibas Tuhan nari (Mat.6:14). Dibata enggo leben ngalemi kita uga pe mbelinna kesalahennta. Emaka kita pe arus ngelakoken bage man sapih-sapih kita manusia.
4. Tuhan lalap iberena banta kesempaten guna ertobat. IberekenNa banta pengalemen si la terbatas. Enggo ka waktuna kita erbahan si bali man temanta. Menyimpan dendam labo lit manfaat-na tapi danci mpeturah pinakit ras labo danci kita reh maju-na. Erlajar kita arah pengalamen Jusup si nggit ia ngalemi senina-seninana si ndube erbahan geluhna sirang ras bapanaa bagepe agina. Erkiteken ipasu-pasu Tuhan ia seh jadi kalak si mbisa i taneh Mesir, jabaten/kekuasaan la erbanca ia gelap mata/dendam man senina-seninana, tapi ialokenna senina-seninana alu dem keriahen ukur. Teridah ibas ayat Invocatio lit kebiaren ibas senina-seninana ibas perjumpanna ras Jusup, emaka mindo maaf ia kerina man bana, jenari tangis Jusup tupung ialokenna tenah e, enda me tandana Jusup enggo ngalemi kesalahen senina-seninana. Perbahanen si bageme si patut si contoh ibas geluhnta selaku perpulungen ni Tuhan. Selamat ertoto ras sialem-alemen salah! Amin.

Pdt. Fenty Elisa br Ginting, S.Th

GBKP Rg. Kuta Lepar