SERMON KOTBAH MINGGU, 12 Juni 2022 , Kemuliaan Tuhan Teridah I Belang – belang Doni (Masmur 8 : 1 – 10 )

Invocatio       : Ibereken Dibata Bapa ras Tuhan Jesus Kristus min lias ate ras kemalemen ate man banndu (2 Tes. 1 : 2)

Ogen              : Roma 5 : 1 – 5 (Tunggal)

Kotbah           : Masmur 8 : 1 – 10 (Responsoria)

Tema              : Kemuliaan Tuhan Teridah I Belang – belang Doni

1. Perlebe

Nandai Dibata si mulia arah kerina perbahanen si enggo icidahkenNa e merupakan sada keharusan ibas kegeluhen kalak si erkiniteken bali bagi sekalak anak si nandai ras erkeleng ate nandangi orangtuana si enggo mpebelin – belin ia ras njagaisa kitik – kitik nari, bage me pe tep – tep kita harus erkeleng ate dingen mahamat nandangi Dibata si nggo leben nehken keleng ateNa man banta.

1. Isi

Masmur 8 enda mabai kita guna nandai ise Dibata e.

Mazmur enda eme ende – nden pujin si penangkih pemasmur eme Daud guna ncidahken kemuliaan Dibata simada kuasa. Ibas ende – endenna e ibenaken ras idungi pemasmur alu pengakun kerna kemulian Dibata, O Tuhan , Tuhan kami kemulianNdu teridah ibelang – belang doni (ay. 2a ras 10), teridah arah pengakun pemasmur enda maka Dibata labo bergantung man ise pe tapi sebalikna kerina sinasa lit bergantung man baNa, itekanken Daud maka Dibata e Dibata si isembah kita janah gelarNa ermulia ibelang – belang doni, emaka arah ende – ndenna enda pemasmur ngajuk kita guna radu ras nggejabken kemulian Dibata.

Iakuken pemasmur maka labo kepe terbatas kemulian ras kinihagan Dibata e, si e teridah arah kerina bekas tinepaNa, langit, bulan ras bintang adi si tatap si e labo jadi secara kebetulan tentu e jadi erkiteken lit arsitek si handal si nepasa bagepe adi si perdiateken kerina benda – benda galaxy si berjumlah ratusan atau bahkan ribuan si lit iangkasa tentu mabai kita rukur ise kin kerina si beluh nepasa, tentu e menggambarken maka labo ise pe ngasup ngaturken kerina maka banci lit adi la kin bekas sidik jari Dibata ije si erkuasa, enda me siigejapken Daud maka kuasa Dibata si luar biasa njadiken kerinana ratur dingen mehuli janah teridah kekagumen Daud enda arah pengakunna (ay. 2b, 4). Kepe kemulian Dibata si  igambarken Daud la terjeng teridah arah kinijilen tinepa si teridah idatas langit, Daud pe nuriken kerna kuasa Dibata erdahin ras teridah arah tinepa si kitik eme danak – danak ras si gara – gara si ibere Dibata pe gegeh guna ncidahken kemulian ras kuasa Dibata (ay. 3) guna membungkam kerina musuh – musuhna.

Tupung itatap Daud ku datas (nare ku langit, ay 4), igejapken Daud maka kepe kitik kel kap ia janah ia dem alu kekurangen erbahanca turah pengakunna kai kin manusia e maka nggit Dibata nginget ia (ay. 5). Manusia si fana ibahanNa jadi meherga, ndube itepa arah abu taneh tapi ibereNa kuasa guna nggeluh ras sentudu bagi tempasNa eme sinjadiken manusia la seri ras tinepa sideban janah manusia itepa labo terjeng arah “kata siibelasken” Dibata tapi pe arah “Proses Kerja” Dibata (bd. Kej. 2 : 7) lenga bias seh je tapi pe manusia itangkuhken (ay. 6) guna ndatken kemulian si jadi dalan ibas menjalin hubungen si khusus ras Dibata ras lit otoritas manusia guna ngusahai doni erkiteken si e maka manusia harus sedar kerna keistimewaan ras tanggungjawabna.

Ibas keistimewaaan manusia si ibere Tuhan tentu manusia jadi cerminen kemuliaan Dibata terlebih ibas keleng ate Kristus, manusia si nggo kebenen tempas Dibata ipelimbarui jadi mehaga. Erpalasken perkuah ate Dibata manusia si “male” (erdosa) ipelimbarui jadi manusia “baru” (nggeluh ibas perkuah ate Tuhan) janah erkiteken sie me maka patut manusia guna ngataken bujur man Tuhan, nggeluh bagi si isuraken Tuhan ula nggeluh ibas dosa si banci ncurnaken kemulian Dibata. Nggeluh bagi si isuraken Dibata berarti si jadiken Dibata jadi pusat kegeluhenta.

• Pengkenaina

Marilah kita mulihi nulih kempak pengakun si ibelasken Daud O Tuhan, Tuhan kami kemulianNdu teridah ku belang – belang doni guna nggejapken maka Tuhan kap si erkuasa nandangi kerina sinasa lit. Manusia eme makhluk hina tapi mulia, ibereken Dibata man manusia tridaya eme cipta, rasa ras karsa si labo lit ibas tinepa si deban. Kemajun jaman ras iptek paksa gundari la sitik menuntut manusia lupa nandangi perbahanen Dibata subuk nandangi alam bagepe nandangi teman manusia. Lit deba manusia enggo njadiken alam jadi dibata bahkan njadiken dirina sebagai si paling pantas guna ndatken pujin. Pemasmur ngajuk kita gelah nggit nggejapken maka kita enda tinepa si kitik, kita enda abu taneh tapi keleng ate Dibata kap singgo mpelimbarui kita eme dalanna kita gundari nggo nggeluh rembak ras Dibata erkiteken lias ateNa janah eme si mpeturah riah ukurta guna ikut ibas kemulian Dibata (ogen Roma 5). Marilah dage si cidahken kemulian Dibata arah kerina dampar geluhta guna mpetangkas tempas Dibata si lit ibas kita.

Sermon PJJ

Tanggal 12 – 18 Juni 2022

Ogen            : Galatia 5 : 22 – 26

Tema           : Ulih Kesah Si Badia

Ibas turi – turin Pustaka si badia, kalak si nggeluh ibas kebenaren iibaratken bagi 1 batang kayu si mejile perturahna janah erbuah meramis. Ibas pengogennta enda Rasul Paulus nuriken kerna erbage – bagu ulih kesah si badia (ind; buah roh) si teridah ibas kinata kegeluhen kalak si nggeluh ibas kebenaren Tuhan ras kalak si tuhu – tuhu jera (bertobat).

Kalak si nggeluh ibas pimpinan kesah si badia perayakenna eme ndalanken sura – sura Tuhan janah teridah ulihna ibas kalak e ia dem alu : Keleng ate (Agape) ibas geluhna labo iukurina kalak mehuli ntah lang man bana erkiteken nggo gejapna keleng ate Dibata man bana; Keriahen (chara) ermeriah ukur erkiteken penggejapen nggeluh ersada ras Dibata labo erkiteken paksa senang saja; Kemalemen ate (jun. Eirene; ibr. syalom) ekspresi ketenengen si la ipengaruhi keadaan ntah pe tekanan, dame erkiteken persadan ras Tuhan; Kesabaren (makrothumia) ngasup menahan diri la erbalas kerna kai siibahan kalak jahat man bana; Perbahanen si mehuli (christotes) mehuli man kerina jelma; Mehuli (agathosune); Setia (pistis); Lemah lembut (prautes) ngasup teneng ibas ngalaken erbage situasi; Penguasan diri (egkrateia).

Tema – nta eme ulih kesah si badia si harus lit ibas kinata kegeluhen kalak si tek man Jesus Kristus. 9 ulih kesah si badia enda jadi karakter man banta guna banci ikelompokken jadi 3 bagin

1. Karakter sincidahken uga hubungenta ras Dibata : keleng ate, kerihen, kemalemen ate
2. Karakter si ncidahken hubungenta ras temanta : kesabaren, perbahenen si mehuli, mehuli
3. Karakter sierkawiten ras pribadinta : setia, lemah lembut, penguasaan diri,

 Arah ulih kesah si badia eme tep – tep kalak si tek man Jesus ngasup jadi saksi dingen jadi pasu –pasu man kalak si deban.