SERMON KOTBAH JUMAT SI MBELIN JUMAT, 15 APRIL 2022 , Suruh-Suruhen Si Ipehaga ( Jesaya 52:13-15 )

Invocatio         : Nggeluhlah bagi kalak bebas, tapi ola bahan kebebasenndu nutupi si jahat, tapi nggeluhlah bagi budak Dibata (1 Pet. 2:16).

Ogen               : Heber 4:14-16 (Tunggal)

Kotbah             : Jesaya 52:13-15 (Tunggal)

Tema               : Suruh-Suruhen Si Ipehaga

 Jumat si Mbelin e me wari kematen  Jesus i kayu persilang. Alu ngenanami kiniseran si mesangat e me itangkap, ipersanNa kayu persilang si arusna labo ia mabasa. Ipalitken man baNa kesalahen aminna pe labo erkiteken salahNa. Icambuk seh luka dingen keri gegehNa. Ibas situasi e tetap Ia megenggeng, lit nge gegeh dingen kuasaNa guna mulahi baNa ibas kiniseran e nari, tapi la i pakekenNa, sebab enggo ietehNa erti ras makna kerehenNa ku doni enda e me guna keselamaten manusia. I gengkenNa kiniseran e seh mate. Kerina e i dalani Jesus alu tujun segelah manusia sinikelengina ndatken keselamaten. Peristiwa Jumat si Mbelin sebagai puncak kiniseran Tuhan Jesus jadi kite-kite kite keselamaten man banta manusia guna ngaloken keselamaten.

Penulis kitab Jesaya e me Jesaya si ertina Tuhan menyelamatkan. Jesaya e me anak Amos singelai tupung masa pemerintahen empat raja Jehuda e me : Uzia, Yotam, Ahas ras Hiskia. Kitab Jesaya si terdiri dari 66 pasal banci i bagi jadi telu bagin e me : Bindu 1-39 sinuriken kerna kerajaan Juda sangana iancam kerajaan Assur si megegeh. Bindu 40-55 sinuriken kerna negeri Babilon tupung bangsa Juda enterem i buang ije. Ije bangsa e i tindas janah pengarapenna pe enggo bene. Iberitaken maka nandangi i bebasken Dibata me bangsaNa, jenari i taruhken mulih ku Jerusalem guna menai kegeluhen si mbaru. Sada tema sipenting ibas bindu-bindu enda e me kap : Dibata e me Tuhan si ngkuasai sejarah, janah Dibata ersura-sura gelah bangsa Israel jadi persuruhen ku kerina bangsa-bangsa si pagin ndatken pasu-pasu arah bangsa e. Si terahir bindu 56-66 i tujuken man kalak si enggo mulih ku Jerusalem, perlu i petetap mulihi ukurna maka isehken Dibata nge padanNa man bangsa Israel. Bahan kotbahta Jesaya 52:13-15 termasuk kubas pembagin si peduaken, sinuriken kerna suruh-suruhen si ngenanami kiniseran.

Ibas ayat 13 i turiken kerna “bagenda nina Tuhan, la kap sia-sia suruh-suruhenKu ndahiken dahinNa; ipehaga dingen ipeganjang kel ia ” Kata suruh-suruhen ibas bahasa indonesia e me hamba. Kata hamba i jenda sinimaksudken Jesaya e me Mesias siipadanken Dibata  eme Jesus Kristus. Biyak hamba i jenda bagi i turiken ibas kitab Pilipi 2:6-8 “Aminna gia tetap lit ibas Ia biak Dibata, erkuasa dingen ermulia. Ia bali ras Dibata, tapi si enda la i pertahankenNa. Arah ukurNa jine itadingkenNa kerina silit ibas Ia. Jadi seri ras manusia; nggeluh bagi sekalak juak-juak. Janah teridah bagi sekalak jelma. meteruk ukurNa janah erkemalangen Ia man Dibata seh matena pe; e me mate i kayu persilang.” Jesaya menegasken maka suruh-suruhen Tuhan e bertindak alu bijaksana guna ndungi dahinNa aminna Ia harus ngenanami kiniseran tapi kedungenna Ia ipehaga ras Ipeganjangken. Ayat 14-15 nuriken uga mbarenda kiniseran sialami suruh-suruhen Tuhan e. enterem kalak sengget ngidah Ia, enterem jelma la tek maka Ia mesias si ipadanken Dibata. Tapi kedungenna melala bangsa jengang ngidahsa. Si ndube mencaci maki dungna lanai pang ia ngerana. Raja-raja pe lanai ngasup ngerana perban mamangna atena. Jadi ayat enda nuriken  nubuaten si ituriken Jesaya kerna Jesus Kristus singenanami kiniseran guna nelamatken manusia, tapi la ngadi seh ibas kiniseran ngenca. Kedungena Jesus Kristus e i pehaga ras i peganjangken.

Bagepe ibas ogenta heber 4:14-16 ituriken kerna Jesus me Imam si mbelin si enggo seh kulebe-lebe Dibata jine, sienggo ngenanami percuban  bali ras kita, saja ngenca la Ia erdosa. Ia iukum erkiteken dosa-dosata, Ia mate gelah kita terkelin. Ayat enda  eme sada pengajuk nandangi kita segelah tetap sigelem kiniteken siiakuken kita. Sebab Jesus e me Imam si Mbelinta. Alu tetap ngerembakken diri man Dibata si dem alu lias ate ras si erkuasa. Segelah sialoken penmpat ibas paksa siperluken kita.

Arah renungenta enda banci simaknai ibas kebaktian Jumat Si Mbelin enda kita ngertiken kerna pengorbanen Jesus Kristus sebagai anak Dibata, reh ku doni enda jadi seri ras manusia. Ngenanami kiniseran, mate i kayu persilang guna nebusi dosata. Janah e ilakokenna alu dem kesetian seh matena. Enda jadi sada gegeh ras semangat guna ndalani kegeluhenta maka kiniseran siidalani kita enggo leben i dalani Tuhanta Jesus. Ibas ndalani kegeluhenta i doni enda, banci megati jumpa kita kiniseran si reh nderpa kita. Situasi e erbanca kita kote. Tapi adi siinget uga Tuhan Jesus mentasi kiniseran e alu dem kinigenggengen dingen ngaloken kemuliaan, kiniseran e lanai erbanca kita kote. Tapi kitya tetap erpengarapen segelah kiniseran si ibentasi kita e banci erbanca kita megegeh.