SERMON KOTBAH 06 FEBRUARI 2022 , Jadi pengikut Kristus ( Markus 1:16-20 )

Invocatio        : Jenari nina Jesus man ajar-ajarNa “Ise atena ikut ras Aku arus ipersilangna bana ipersanna kayu persilangna jenari ikutkenna Aku” (Matius 16:24).

Ogen               : Jesaya 6:9-13 (Tunggal)

Kotbah           : Markus 1:16-20 (Tunggal)

Tema              : Jadi pengikut Kristus

 Kitab Markus enda isina kerna Berita Si Meriah si isuratken Markus, ibenaken alu Berita Si Meriah kerna Jesus Kristus Anak Dibata. Jesus Kristus igambarken selaku kalak si mejingkat janah erkuasa. KuasaNa e tangkas teridah sanga Ia ngajar, pelawes setan-setan, ras ngalemi dosa manusia, Jesus pe igelari ka “Ia persuruhen Dibata”. Markus nuriken kerna Jesus kalak mejingkat tangkas ukur tangkas kata. Lebihen pe itekankena kerna perbahanen Jesus asangken kata ras pengajarenNa. Khususna Markus 1:16-20 nuriken kerna pelayanen Jesus si pemena kenca Jesus i peridiken Johanes Peridiken. Kenca Johanes Peridiken ipenjaraken Jesus lawes ku Galilea. IbenakeNa guna mberitaken Berita Si Meriah. I je me ibenakenNa ndilo ajar-ajarNa si pemena si dahinna penjala nurung. Simon ras Andreas bagepe Jakub ras Johanes anak Sebedeus. Simon ras Andreas eme dua kalak si ersembuyak, bagepe Jakub ras Johanes. Tupung Jesus ndilo Simon ras Andreas si sangana njala : “Mari ikutken Aku maka Ku ajari kam jadi penjala jelma”. Minter itadingkenna jalana janah ikutkena Jesus. Bagepe Jakup ras Johanes anak Sebedeus si sangana nikapken jalana ibas perahuna, kenca Jesus ndilo ia duana minter i tadingkenna bapana Sebedeus ras kalak upahen ibas perahuna jenari iikutkenna Jesus. Ibas bahan renungenta enda lit dua bagin si penting si banci si renungken kita eme : Cara Jesus guna milih ajar-ajarNa ras Respon ajar-ajar Jesus ibas pendiloNa. Respon ajar-ajar Jesus ibas pendilona ibas renungenta enda la sekedar jawaban kata-kata saja tapi iikuti ras tindaken. Ketika Jesus ndilo alu kata “Mari Ikutken Aku”, Simon ras Andreas lansung iikutkenna Jesus e. Bagepe Jakub ras Johanes lansung i tadingkenna bapana jenari iikutkenna Jesus (menurut cataten maka duana anak nelayan si cukup bayak perban lit kalak upahen ibas perahuna). Empat kalak penjala nurung enda memiliki sada keyakinen nandangi pendilo Jesus. Bagepe cara Jesus ibas milih ajar-ajar labo bagi ukuren doni enda. Adi pemilihen ibas doni enda alu seleksi si memakai ukuran intelektual si tinggi. Adi Jesus ndilo ajar-ajarna si sederhan, nelayan, penjala ikan jadi penjala jelma. Arah bahan kotbah enda banci erlajar kita sebagai kalak sierkiniteken jadi pengikut Kristus maka kita harus peka ibas pendiloNa. Siap ibas pendilona ras mau bergerak guna merespon pendilo Jesus e guna pembarken berita si meriah.

Bagi i turiken ibas ogenta Jesaya 6:9-13 sinuriken kerna pendilo Dibata nandangi nabi Jesaya. Alu kiniteruken ukur Jesaya ngejap maka ia perdosa. Uga banci ia mritaken berita ibas Dibata nari alu bierna si erdosa. Tapi Dibata arah Malekat srafim mpebadiaken ia alu rara si jadi simbol pengalemi dosa. Kenca bage erdilo Tuhan nina, “Ise ndia kusuruh? Ise ndia nggit maba berita ibas Aku nari?” Ngaloi Jesaya nina, “Aku suruhlah aku!” Sanga Tuhan nuruh Jesaya ngerana ku tengah-tengah bangsa Israel, Dibata pe nuriken maka bangsa e pasti nulak pengajuk Jesaya guna mulihken ku dalan Dibata. Enda me tantangan pelayanan Jesaya. IetehNa pasti bangsa e la megiken ia tapi Tuhan nuruh jesaya guna tetap setia meritaken kata Dibata man bangsa Israel. Kepatuhen ras kesetiaan nge siipindo Dibata ibas jadi pengikutNa. Jenari Dibata mperlengkapi ras mpengasup persuruhennNa e.

Bagepe ibas keputusen ras responta guna ngikutken pendilo Kristus e maka kita harus ngikutken ajar Kristus ras ndalanken kai siisuruhna. Ibas kita ndalanken prentahNa e tentuna labo berjalan alu mulus-mulus saja. Sebab Jesus sendiri pe mengalami erbage-bage kiniseran i doni enda. Tapi tek kita maka kita ijaga ras ikawalina. Ibas invocatiota Matius 16:24 nuriken adi ngikutken jesus harus mpersilahang diri ras mersan kayu persilang.

BAHAN PJJ TANGGAL 06-12 PEBRUARI 2022

MALEMLAH ATE TUHAN ERKITEKEN TINEPANA

Masmur 104:31, 33-35

Kitab Masmur 104 nuriken kerna pujin man si mada tinepa eme Dibata Bapa sienggo nepa langit ras doni. Ibas ayat 31 pemasmur nuriken kerna pengarapenna nandangi Dibata segelah tetap Ermulialah TUHAN arah kerina tinepana. Sebab Dibata enggo nepa langit ras doni bagepe isina alu ratur ras mehuli (Kej. 1). Ilanjutken ibas ayat 33-35 kenca ituriken kekagumen pemasmur kerna kuasa Dibata, pemasmur erjanji guna tetap muji Dibata kidekah umur geluhNa. erpengarapen pemasmur arah ende-enden pujinna ngena ate Dibata. Ibas ayat 35 pemasmur ijenda mindo man Dibata segelah ngkernepken kalak perdosa ibas doni enda nari. Enda jadi tekat ras pengarapen pemasmur segelah tetap ia muji Tuhan.

            Ungkapen pemasmur enda ngajuk kita ibas bahan PJJ enda segelah kita pe banci ngidah uga Dibata enggo nepa kerina doni ras isina alu mehuli. Kita itepa Dibata berdampingen ras tinepa sideban si memiliki hubungen saling terkait sada ras sidebanna. Dibata mereken keistimewaan nandangi manusia alu mereken tanggung jawab segelah kita njagai doni enda. Kejadian 1:28 nuriken maka Dibata mereken pasu-pasu jenari iberekenna mandat guna ngkuasai (Jagai dingen mpekena-kena doni enda). Arapen Dibata segelah arah kerina tinepa banci muji Dibata. kai dage banci silakoken? Terjeng natap saja ras menikmati? Tentu lang, rikut tema tahun gerejata Kreatif merawat lingkungen enda me jadi komitmenta bersama segelah kita banci bersahabat ras doni enda alu aksita. Sebagai contoh mbuang sambpah bas inganna, mengelola sampah, nuan batang kayu, ras sidebanna.