SERMON Klasis medan namo rambe 23 FEBRUARI 2022 kHOTBAH MINGGU 27 FEBRUARI 2022 MINGGU PASSION 1 /ESTOMIHI (Jadilah Man Bangku Lingling Kecion), Kata Dibata Mereken Keriahen ( Jesaya 55:10-13 )

Invocatio          : Ibas tep-tep kuta ipegegehina ukur ajar-ajar janah iajarina gelah tetap ia tek man Tuhan. Nina ngajar, “La banci lang sibentasi lebe erbage-bage kiniseran ibas mengketi Kinirajan Dibata”. (Perb. 14:22)

Ogen                : Matius 13:18-23 (Tunggal)

Khotbah           : Jesaya 55:10-13 (Tunggal)

Tema                : Kata Dibata Mereken Keriahen

Keriahen eme si jadi perayakenta, ise pe kita isungkun pasti nge metedeh ateta guna ndatken keriahen reh ku tengah-tengah kegeluhenta. Tetuna guna ndatken keriahen e labo  banci reh bage-bage saja, ija harus nge lit upaya guna ndatkenca. Janah keriahen si tuhu-tuhu e hanya lit ibas Tuhan Yesus ngenca. Bangsa Israel pe sangat mengharapken keriahen reh man bana, bagi si inanamina ndube asum ia tading i negerina Yerusalem. Metedeh kel ate guna banci ialokenna min keriahen e, dingen mulihken ku negerina, banci kin? kuga carana? Ijenda Nabi Yesaya nehken kata Dibata man bangsa Isarael si sangana ringan i taneh pembuangen, asum sie bangsa Israel ngalaken perbeben si mberat, engkai? Erkiteken ia nggo kebenen kutana Yerusalem, Rumah pertotonna, ras keluargana marpar merap. Janah ia arus ibaba ku negeri Babel ijadiken budak. Tetuna ibas situasi enda labo situasi gampang, banci sibayangken adi kita ikut ibas peristiwa enda ija kita sirang ras keluarganta, anak-anakta, perbulagenta, ndeharanta ras kalak si ndeher ras kita tentuna ndele kel ateta, lemah kal kita menghadapai si terjadi e. Enda me situasi si alami bangsa Israel  ija ia lit ibas perbeben si mberat. Erkiteken sie me nabi Yesaya nehken kata Dibata man bangsa enda, maka kata Dibata si i peseh labo kata kata hiburan semata, tapi pe kata si ipeseh nabi Yesaya eme Kata Dibata si erkuasa si mpegegehi ras mpekeke kiniteken bangsana ija ibas ia ngalaken perbeben si mberat paksa e. Arah nats khotbahta Yesaya 55:10-13 ikataken maka kata Dibata si erkuasa si berotoritas. Ay.10-11: Bali ras udan si nusur i langit nari, lanai ulih ku datas tapi litap ibanna doni, simahanca turah sinuan-sinuan si ngellitken benih ras nakan man pangan. Bage me pe kata si Kubelasken, la mulihken man bangKu alu sia-sia, tapi isehkenna kai si Kurencanaken, dingen ilakokenna kai si Kusuraken. Bage me pe kata Dibata si ndarat ibas Tuhan nari pasti akan maler ras mereken kegeluhen man tep-tep kalak si ngalokenca. Kata Dibata si mampu mengubah/mpelimbarui kearun ate bangsaNa, kebiaren ras ketidakpastian. Kata Dibata mengubah kebiaren jadi keberanian, si mabai bangsaNa jadi bangsa si erpengarapen. Aminna gia ia lit ibas perbudaken tapi lit pengarapenna erkiteken kata Dibata.  Kata Dibata e tetap erkuasa seh rasa lalap. Kata Dibata la pernah gagal sebab kata Dibata jadi bagi sini iarapkenNa. Erdandanken sie kita erlajar ras tetap erpengarapen man Tuhan, gelem kata Dibata, mempercayakan kegeluhenta nandangi keleng ate Tuhan.

Ay.12: Itadingkenndu Babil alu dem keriahen, alu dame kam kerina itaruhken, iebe-lebendu rende meriah deleng-deleng ras uruk-uruk, batang-batang kayu ersurak ras ertepuk-tepuk. Bangsa Tuhan mulih me ku negerina, janah kemulihenna idemi alu keriahen. Keleng ate Tuhan tetap nemani kegeluhen bangsaNa ibas perdalanenna menuju kubas keriahen. Hal enda pe jadi sada gambaren pe man banta ibas perdalanen geluhta i doni enda, asum kita mereken diri sepenuhna nandangi keleng ate Tuhan, maka kita pe sangana erdalan ibas dalan kegeluhen si lebih mehuli si enggo isikapken Tuhan man banta. Nggeluh, erdalan ras Tuhan eme sada gambaran perdalanen kegeluhenta i doni enda si seh kal riahna. Amina gia dalan sini ibentasi kita dem alu kiniseran tantangen la e erbahanca kita mbiar, ragu sebab Tuhan kap ras kita.

Ay.13: Gancih duri turah kayu eru, gancih rambah duri turah kayu murbai. Enda me jadi tanda seh rasa lalap kerna Aku sada peringet-ingeten kerna kai si enggo kulakoken. Ija asum bangsa enda nadingken kutana janah tading i negeri pembuangen, mungkin taneh kutana ndai nggo idemi rambah duri ras tanaman liar. Tapi erkiteken Kuasa Tuhan taneh kutana ndai kedungenna turah ije batang Eru ras batang murbai, ertina maka Tuhan mereken mulihken man bangsa enda kemakmuran. Asum kita ngendesken kegeluhenta sepenuhna man Tuhan, tek kita maka Tuhan si erkuasa  mengubah kegeluhenta ku arah lebih baik. Iubahken Tuhan ibas rambah duri  si la erguna jadi batang kayu si erbuah meramis.

Pengogen Matius 13:18-23; Ibas nats enda nuriken man banta kuga pentingna guna megiken kata Dibata. Perumpamaan si ngambur benih; ije ituriken kerna benih si lit ndabuh ku duru dalan, benih si ndabuh ku taneh si erbatu-batu, benih si ndabuh ku tengah-tengah peren duri, janah si ndabuh ku taneh si mehumur. Benih eme iibaratken selaku kata Dibata janah inganna ndabuh eme pusuh manusia. La bali empatna penuankenna kerna kata Dibata e ibas kegeluhenna. Emaka lit si mbelin kel iakapna keriahenna iba ngaloken kata Dibata e,  janah lit ka si labo tergejap ibas pusuhna.

Invocatio: Perb. Rasul 14:22; Ibas nats enda ituriken kerna Paulus ras Barnabas si meritaken kata Dibata ku kuta-kuta ija enggo pernah lit kalak si tek man Kristus ipegegehina gelah reh tetapna kintekenna amina gia erbage-bage reh kiniseran si ngekenai kegeluhenna la erbahanca ia surut ibas kinitekenna. Sebab guna bengket kubas kinirajan  Dibata, la banci lang mentasi erbage-bage kiniseran. Alu bage kalak si tek e tetap ia setia, dingen la mobah ibas kintekenna man Tuhan, aminna gia reh erbage-bage kiniseran, sebab enggo ipegegehi ukurna.

Tema : Kata Dibata mereken keriahen, hal enda lanai bo teraguken, enggo terbukti tuhu-tuhu. Hal enda teridah arah ketubuhen Tuhan Yesus Kristus ku doni enda (Johanes1:14) eme guna nebusi dosa dosa manusia. Ketubuhen Yesus e tuhu-tuhu maba keriahen man banta. Janah Kata Dibata e me  si njadiken doni enda ras isina kerina. Adi enggo si begiken kata Dibata, tetaplah si pakeken kubas kegeluhenta maka meriah ukurta. Engkai maka aru ateta eme erkiteken si begiken pe kata Dibata megatin la sipakeken ibas kegleuhenta, pas bagi benih si nabuh tepi dalan, taneh erbatu-batu, bagepe ku peren duri.

La tersilahi amina gia kita selaku kalak si tek man Tuhan Yesus, maka erbage-bage kiniseran, perbeben pasti reh engkenai kegeluhenta, tapi labo man kebiarenken, sabab kata Dibata kap si jadi gegehta. Alu bage asum kita reh ku gereja marilah sibegiken kata Dibata e alu tutus, kata Dibata ola si sepeleken, ola la si diate, ola ka ibas gereja kita kesempaten guna tunduh, ercakap-cakap sanga khotbah pandita, main Hp adi la siakap menarik khotbah pandita. Setialah ibas megiken kata Dibata, kata Dibata labo sia-sia.

Minggu enda eme Minggu Passion I sini igelari Estomihi si ertina jadilah man bangku lingling kecion. Ija ibas Minggu enda ngajuk kita perpulungen guna memaknai peristiwa kiniseran Tuhan Yesus. Kita selaku warga gereja iajuk guna nginget nandangi makna kiniseran Tuhan Yesus guna Keselamatenta manusia. Seh maka kita selaku anak-anakNa tetap menjadiken Tuhan Yesus ingan penundalenta (ingan kecionta). Gelah tetap megenggeng kita ibas ngalaken si olabi ukur iibas geluh enda. Dibatalah ingan penalementa si paguh, Dibatalah sinampati ibas tep-tep perbebenta, janah erkiteken Tuhan kita ndatken kedamen si maba keriahen ibas kegeluhen.

PERPULUNGEN JABU-JABU TANGGAL 27 FEBRUARI – 05 MARET 2022

Tema : TEK DINGEN NGENDESKEN DIRI MAN TUHAN

Ogen   : Perbahanen Rasul 11:19-26

(Gereja Yang Ideal)

Labo mesukah jadi kalak Krisen, engkai? Disamping kita ituntut jadi usihen kita pe idilo guna erberita kerna Tuhan Yesus nandangi kalak si lenga nandai Tuhan Yesus, janah pe harus pang ngalaken kiniseran. Sabab labo jaminen adi enggo pe jadi kalak Kristen bebas ibas kiniseran. Sabab Tuhan Yesus pe ngataken maka ise atena ikut ras Aku arus maka ipersilahangna bana janah ipersanna kayu persilangna jenari ikutkenna Aku. Adi sinen perdalanen kegeluhen ajar-ajar pe labo se mulus yang dia alami asum ia ras Yesus, ija kenca kematen Tuhan Yesus erbage-bage nge kiniseran sini hadapina, tapi labo e erbahanca ia surut ibas kinitekenna man Tuhan Yesus e, justru ia semakin gigih meritaken keselamaten ni Tuhan Yesus. Termasuk pe si Istepanus si enggo tek man Tuhan Yesus, pang ngalaken kematen guna meritaken kata Dibata.

Adi sinen ibas bahan PJJnta enda  kegeluhen kalak si tek man Tuhan Yesus bas paksa enda  pas bagi cingkeru nirambasken, hal enda jadi erkiteken kiniseran, peniksaan sini hadapina. Amin bage gia kalak si tek man Tuhan Yesus la pernah menyerah. Aminna mberat gia siman alanken tetap ia ibas kinitekenna. Aminna gia Istepanus enggo mate ibunuh erkiteken naksiken kebenaren kata Dibata, tapi justru ibas kecibal kalak si tek man Tuhan Yesus si enggo marpar merap e la ngadi guna erberita ku daerah ija ia ringan, lit deba seh ku Pinike, Kiperus ras Antiokia. Janah i antiokia berita si meriah e la hanya iberitaken man kalak Jahudi saja tapi pe man kalak si labo Jahudi, janah kalak Kiperus ras kalak Kireni pe ikut meritaken berita si Meriah kerna Tuhan Yesus man kalak si la Jahudi e. Alu bage ibas pemberitaan e reh teremna kalak si tek man Tuhan Yesus. Berita kerna kai si enggo jadi i Antiokia enggo seh ku Jerusalem. Alu bage Barnabas pe berkat ku Jerusalem guna nehkken pelayanen, ncidahken kepedulian nandangi para petobat muda ibas kiniteken i Antiokhia (ay.11:22-24). Barnabas terkenal erkiteken kemampuanna mereken semangat man kalak si deban. Barnabas eme kalak si mehuli si dem alu Kesah si Badia ras nteguh kinitekenna. janah ia menasehati kalak si mbaru tek gelah  “tetap setia man Tuhan” (ay.23). Gelah amina gia lit kiniseran ialaken si mbaru tek e, lanai ia monce, tapi tetap semangat ibas kinitekenna. Jenari berkat me Barnabas ku Tarsus ndarami Saul, guna berkat ku Antiokia. Setahun dekahna ia ras perpulungen i Antiokia reh warina reh tambahna kalak si tek. Janah i Antiokia me tangtangna kalak si tek man Tuhan Yesus e igelari Kristen. Bage me teridah semangat ibas kalak si tek guna meritaken berita si meriah man sekelewetna. Alu la biar-biaren tetap iberitakenna berita e, kiniseran labo penghambat man bana guna erberita.

Ibas masa pandemic enda perlu kal si peturah mulihi semangat yang baru ibas dirita guna erberita si meriah subuk nandangi perpulungen si enggo ndekah lanai ku gereja, bagepe nandangi kalak si lenga nandai Tuhan Yesus. Sabab dahin erberita la banci ngadi, tapi arus tetap iberitaken berita e amin kujapa pe kita lawas. Bagi sieteh kita dampat pandemic enda tuhu encedai ku bas kiniteken perpulungen bagepe pendahin. Alu bage kehadirenta selaku warga gereja tetap mereken semangat yang baru nandangi kalak si deban guna tetap ibas kegeluhena. Gereja ola ngadi erberita bagepe maba keriahen nandangi sekelewetna.

Pdt. Antonius Tarigan, S.Th

Diskusi

1. Kai sebabna maka enterem kalak si tek man Jesus i Antiokia seh igelari Kristen?
2. Kai nge tanda-tanda kalak si tek ras ngendesken dirina man Tuhan?