Sermon Khotbah Pekan Kebaktin Penatalayanen Wari Pepituken, Sabtu 22 Januari 2022 , Ndahiken Dahin-dahin Si Mehuli ( Epesus 2 : 1 – 10 )

Invocatio         : Kenca bage itatap Dibata, janah idahNa maka kerina si enggo ijadikenNa  tuhu- tuhu-tuhu mehuli (Kejadin 1 : 31a).

Ogen               : Jesaya 3 : 10 – 11

Kotbah            : Epesus 2 : 1 – 10

Tema               : Ndahiken Dahin-dahin Si Mehuli

Arah 7 wari kita ngelakoken Pekan Kebaktin Penatalayenta tahun 2022 enda iarapken kita ngasup ndalanken tema umum Erberita Si Meriah Arah Tinepa segelah arah e pe sasaren tahun program gerejanta bas tahun 2022 enda eme Kreatif Merawat Lingkungan reh bancina sidalanken. Emaka arah Kata Dibata paksa enda rikut tema Ndahiken Dahin-dahin Si Mehuli, siinget kai siisenaken ibas ogen Jesaya 3:10-11 maka kai siidahiken kita e, ikut ka nge kita ngenanamisa. Adi nina kuan-kuan, “Si mulih sinuan, kai siisuan e ka nge iperani”. Emaka gelahna nanam si mehuli siman nanamenta, dahikenlah dahin si mehuli ula si jahat sabab pendahin si jahat siilakoken kita e pe dungna mulih ka nge man banta dampakna. E maka ula kal nina kalak tupung kita ngenanami si la mehuli e, “Enam, ma enggo nanamina bekasna nggaya e” ntah “Adah, me enggo nanamina ulih ulahna e”. Ceda kal ateta, sedak pusuhta adi bas pagit siakap e, ernahko ka kalak man banta.

Erkiteken sie, ibas kerina siidahiken kita, tetaplah siusih Dibata ibas IA njadiken kerina sinasa lit ija bagi isenaken ibas invocatio Kejadin 1:31a maka Tuhan Dibata secara berkala erbahan penilaian, evaluasi kerna kai siijadikenNa e guna ngidah ras meteh apakah sienggo ijadikenNa e mehuli ntah lang eme kerna bentukna/tempasna, inganna/letakna bagepe fungsina/kegunanna. Emaka ibas penciptaan e, seh 7 kali IA erbahan evaluasi, penilaian kerna kai siijadikenNa e (Kej. 1:4a, 10b, 12, 18b, 21b, 25b, 31a). Janah bas evaluasi/penilaian terakhir bagi isenaken ibas Kejadin 1:31a teridah maka wari ku wari lit peningkatenna ija adi bas Bahasa Indonesia nina, “Maka Allah melihat segala yang dijadikanNya itu, sungguh amat baik”. Sedangken penilaianNa bas nomor 1-6 eme, “Allah melihat bahwa semuanya itu baik”.

Bagem pe oratna kita ibas kerina siidahiken kita arusna meningkatken keberadaan ras kualitas si lit e labo mpekitiksa apai ka menekensa. Emaka perlu kal siban evaluasi, penilaian gelahna sieteh apakah siidahiken kita e maba manfaat si mehuli entah sebalikna encedaken sabab bagi isenaken ibas Epesus 2:1-10, ibas persadanta ras Kristus Jesus enggo ipekeke Dibata kita ras Kristus emaka enggo nggeluh kita mulihi. Janah geluh si gundari sidalani e erbeda ras geluhta sindekah sope denga kita itebusi Kristus. Bas kegeluhenta sindekah e, erkiteken salah ras dosanta, mate pertendinta eme kita nggeluh sirang ras Dibata sijadi ulu geluhta. Pertendin si mate berarti lanai ngenanami kehadiren ras kiniulin Dibata bahkan lanai nari nandai Dibata, lanai ertedeh ate man Dibata. (bdk. Kej. 3:8-10 eme pedauh bana ibas Dibata nari; cebuni, njaga jarak ibas Dibata).

Enda erkiteken Pertama : Pelanggaren (Yun “Paraptomasin” ibas asal kata “Paraptoma” si berarti transgression eme tindakan melanggar hukum, pelanggaran, tergelincir, jatuh; false step ertina langkah atau tindakan tidak benar; trespass ertina kesalahan, dosa. Istilah-istilah enda banci ipake guna nggambarken kalak si kebenen arah dalan siman dalanenna ntah tersesat, gagal ntah meleset ibas ngertiken ras ndalanken kebenaren; Peduaken : Dosa (Yun “Hamartiasis” ibas asal kata “Hamartia” ertine meleset, kegagalan untuk mencapai sasaran hidup; Peteluken : Ngikuti dalan doni, eme kalak si secara terus menerus ngikuti ras ngelakoken kebiasaan doni enda mahanca lanai ia ergegeh mulahi bana ije nari sabab enggo terbiasa ras nagih ia ngelakokensa.

Maka kalak perdosa e terus menerus ngikuti ras ngelakoken kebiasaan doni enda erkiteken iikutkenna pemimpin penguasa-penguasa si lit i awang-awang, eme kesah si erdahin ibas kalak si la nggit erkemalangen man Dibata. Paksa e ndube lit pemahamen maka doni enda erlapis-lapis. Lapisen udara ntah angkasa (awang-awang) iiani ntah ikuasai roh-roh jahat eme Iblis ras pengikut-pengikutna siipahami ibassa lit kuasa si mbelin (bdk. 2 Kor. 11:14-15; Ket. 13:1-16), si la erngadi-ngadi nuanken ngaruhna man manusia guna ngikutken ia (1 Ptr. 5:8). Kalak singikutken Iblis eme si pejangjang ndalanken sura-sura kula ras ukurna saja si petembil ras sura-sura Dibata. Bahkan kalak e mesikel kal ndalanken keinginan-keinginan, sura-surana si jahat e.

Tapi perkuah ate Dibata (Yun “Agape”) si berarti love eme cinta, kasih sayang; affection eme kesayangan, kasih, kasih sayang mahanca kita si tek man Kristus ipekeke Dibata kita radu ras Kristus kubas kegeluhen si mbaru si ertina membuat hidup bersama-sama, menaikkan, mendirikan, menimbulkan, memelihara, melindungi kehidupan. Emaka kalak Kristen si enggo nggeluh ibas kegeluhen si mbaru e la banci lang arus ndahiken dahin-dahin si mehuli si enggo leben irencanaken Kristus dingen enggo ilakoken ras isehkenNa pe man banta gelahna arah kerina siidahiken kita mahanca tinepa Dibata banci hidup secara bersama-sama erkiteken kita menaikkan, memelihara, melindungi keberadaan ras kegeluhenna. Em tujun tema Ndahiken Dahin-dahin Si Mehuli segelah tersehi tema umum Pekan Kebaktin Penatalayaneta Erberita Si Meriah Arah Tinepa mahanca tersehi sasaren tahun program pelayanen gerejanta tahun enda eme Kreatif Merawat Lingkungan.

Pdt. Eben Eser Depari