Sermon Khotbah Pekan Doa Wari/Berngi 6 (Jumat, 03 Juni 2022) – GBKP Klasis Medan Namorambe , Ertoto Ras Puasa (Matius 6:16-18)

Invocatio    : Nina Tuhan, “Genduari jeralah kam, dahilah Aku alu erpuasa dingen tangis. Janah erceda ate.” (Joel 2:12)

Ogen           : Matius 6:16-18 (R)

Tema          : Ertoto Ras Puasa

Erpuasa tentu labo hal si asing man kerina jelma, sebab kerina pasti pernah erpuasa, lit deba erpuasa tupung nehken pemindon man Tuhan ntah pe paksana ndarami jawaben Tuhan ibas perbeben si nderpa kegeluhenna, lit ka deba si erpuasa erkiteken sakit pinakit misalna sope i-operasi, bahkan lit ka nge si erpuasa erkiteken diet guna ngurangi berat badan, tapi ibas kiniteken kai kin situhuna makna erpuasa ras tujun si payo ibas ndalanken puasa?

Ibas ogennta enda Tuhan Jesus nehken persinget kerna uga arusna sekalak jelma ndalanken puasa rikut pe ras makna erpuasa. Paksa si e, erpuasa eme hal si semal ilakoken kalak Jahudi, bahkan Jesus pe ndalankenca ija IA erpuasa kidekah 40 wari 40 berngi (Matius 4). Tapi, amin pe erpuasa jadi kesemalen ilakoken paksa si e, Jesus ngajarken cara erpuasa si payo. Emaka nina bas ogennta enda “adi erpuasa kam, ola peberjut-berjut ayondu bagi kalak pekulah-kulah..gelah ieteh kalak ia erpuasa” ibas terjemahen bahasa Indonesia “dan apabila kamu berpuasa, janganlah muram mukamu seperti orang munafik. Mereka mengubah air mukanya, supaya orang melihat bahwa mereka sedang berpuasa” Sieteh maka adi sekalak jelma erpuasa, la man ras la minem, tentu uga pe teridah lesu, ayona pe pucat, biberna kerah jenari kurang gegehna ndahiken kai pe, tapi ijenda ituntut Tuhan Jesus gelah min kalak si erpuasa  ‘ola peberjut-berjut ayondu’ (jangan muram) sebab labo perlu ieteh kalak ia erpuasa. Enda merupaken teguren, sebab tentu lit denga idahNa kalak si erpuasa gelah ‘pamer’ entah pe ndarami pengakun kalak sideban bahwa ia me si patuhna ndalanken puasa, si badia ras ndeher ras Tuhan, padahal tujun erpuasa situhuna labo gelah ndatken pengakun/ipujiken. Kalak si pekulah-kulah (Munafik), ipeberjut-berjutna ayona bagi kalak melihe gelah ieteh kalak ia erpuasa : lanai ngaloken upah ibas Dibata nari, alu kata sideban la lit gunana puasana. Tapi nina Tuhan Jesus “erduhaplah jenari suri bukndu, gelah la ieteh kalak kam erpuasa” enda ngataken maka erpuasa eme hubungen ras Dibata, la perlu ieteh kalak, tapi cukup Dibata saja metehsa, sebab eme dalan guna mperembakken diri ku IA sekaligus dalan rukur guna mpelimbarui diri. Emaka arusna kalak si erpuasa tetap ermeriah ukur (erduhap & ersuri), kalak si bage iidah Dibata me perbahanenna dingen iberekenNa upah. Jadi, situhuna tujun erpuasa eme dalan guna menjalin relasi si terbagesen ras Tuhan, sekaligus mpenangkih toto guna meteh sura-sura Tuhan labo sada paksaan entah pe keharusen rikutken tradisi/aturen agama, bagi siilakoken kalak Parisi seh maka mamang atena uga maka ajar-ajar Tuhan Jesus la erpuasa (Matius 9:14). Emaka arusna, kalak si erpuasa labo perlu pekulah-kulah, labo ka perlu ikata-kataken sebab Tuhan nge si mereken upah man bana.

Tema-ta eme Ertoto ras Puasa, enda ningetken kita maka ertoto ras erpuasa eme tanda ketedehen ateta ngerembakken diri ku Tuhan. Piga-piga contoh erpuasa si tersurat ibas Pustaka Si Badia eme: Musa, ija la ia man ras la minem kidekah 40 wari 40 berngi tupung ia tading i deleng Sinai ngaloken papan batu si isina Sepuluh Pedah Dibata (Kel.34:28) ; jenari Ester ope ia ndahi raja Ahasweros guna ngaduken Haman erpuasa janah ertoto ia kidekah 3 wari 3 berngi la man ras la minem (Est.4:16). Bahkan raja Daud pe pernah erpuasa, la ia man janah medem ia i babo lante mindo gelah Tuhan mpepalem anakna (2 Sam.12:16-17). Selain e, Daniel pe pernah ngelakoken puasa ija la sitik pe ipanna pangan si entabeh tah daging, lau anggur pe la iinemna, janah la ersuri pe ia kidekah telu minggu (Dan. 10:3) tupung ia ertoto guna bangsana ras ngaloken sada pengenehenen i tepi Lau Tigris. Jenari, erpuasa si tersurat bas Pustaka Si Badia pe la hanya ilakoken sekalak jelma, tapi pe sada bangsa eme bangsa Niniwe, tupung nabi Juna meritaken kerna ukumen si nandangi isehken Tuhan (Jun.3:7). Enda ngatakenca maka erpuasa eme hal si semal ilakoken tokoh-tokoh ibas Pustaka Si Badia. Janah ibas perpulungen si pemena pe (jemaat mula-mula) pernah ituriken erpuasa tupung ia erbahan kebaktin, jenari reh me sora Kesah Si Badia ngerana maka ate Tuhan ipakeNa Saul (Paulus) ras Barnabas guna ndahiken dahin pembarken Berita Meriah. Tapi arah contoh-contoh erpuasa enda, labo kerina puasa dalam erti la man ras la minem, contohna bagi siilakoken Daniel ia tetap man hanya saja ibatasina jenis pangan ras inemen tertentu, labo ia la man sama sekali. Emaka kepeken, ertoto ras erpuasa labo sebatas la man ras la minem, tapi uga kita menjaga komunikasi ras hubungennta ku Tuhan, jenari nadingken biak-biak si la ngena ate Tuhan bagi si iperentahken Tuhan man bangsa Israel erkelangken nabi Joel (Invocatio), alu kata sideban ertoto ras erpuasa eme tanda kecedan ateta erkiteken dosa-dosanta jenari jera ras mpeturah tekad si mbaru guna nggeluh ndarami peraten Tuhan. Dage, arah Pekan Doa wari pe-6 ken enda, marilah kita tetap setia dingen tutus menjalin hubungen ras Tuhan guna ngataken bujur, nehken pemindon, nuriken ukurnta, jenari ercakap-cakap ras IA, sebab eme tanda kegeluhen kalak si tek, tetap erkomunikasi gelah reh deherna kita ras reh mbagesna penandainta kerna IA. Amin