Sermon khotbah minggu pentakosta 1, (LPS Nutup Pekan Doa Tahun 2022) – Tanggal 05 Juni 2022 Klasis Medan Namorambe, Nggeluh Rikutken Sura-Sura Kesah Dibata (Roma 8:8-11)

Invocatio  : “Erkiteken Kesah Si Badia me si mereken kegeluhen man banta, emaka lagu langkahta pe arus rikutken peraten Kesah e” (Gal.5:25)

Ogen        :Johanes 7:37-39a (T)

Khotbah   :Roma 8:8-11 (A)

Tema        :Nggeluh Rikutken Sura-Sura Kesah Dibata

Kerina manusia si nggeluh bas doni enda tentu lit rusur sura-surana, mulai danak-danak nari seh ku si enggo metua, lit lalap sura-surana. Lit deba kalak erjuang kal ia bahkan erban cara curang pe la akapna dalih gelahna seh sinisurakenna. Perbahanen si bage tentu labo mencerminken biak geluh kalak si nandai ras ngikutken Kristus, uga kin arusna biak geluh kalak si nggo nandai Kristus?

Nats khotbahta enda ngerana kerna nggeluh ibas Kesah Dibata nadingken sura-sura daging. Ijenda rasul Paulus encidahken maka lit dua karakter jelma, eme si nggeluh rikutken sura-sura ukurna (selaku manusia) ras si nggeluh rikutken sura-sura Kesah Dibata. Situasi perpulungen i Roma paksa si e eme lit bas kiniseran, bahkan rasul Paulus sendiri ipenjaraken iteruh kekuasaan Kaisar Nero ije me kerina kalak Kristen itindas. Emakana gelah tetap paguh bas kiniteken (sebab enterem paksa si e si nggo mulai monce kinitekenna) isurati rasul Paulus perpulungen Roma enda. Ikatakenna maka kalak si nggeluh rikutken sura-sura ukur manusia la banci ngena ate Dibata (ay.8), ertina sura-sura ukur manusia sifatna berlawanen ras si ngena ate Dibata. Enda mengarah ku kalak si nggo nadingken kinitekenna, si berusaha selamat bas kiniseran nari. Alu kata sideban, ate rasul Paulus ngataken maka perayaken kalak si tek labo kap doni (rikutken sura-sura pribadi) melainken nggeluh rikutken sura-sura Kesah Dibata. Janah kalak si nggeluh rikutken sura-sura Kesah Dibata amin gia kulana mate, tendina nggeluh kap sebab Dibata enggo ngerembakken kalak si tek kempak IA. Alu kata sideban, pengarapen kalak si tek labo kap keselamaten bas doni enda melainken kegeluhen kenca wari kematen, ije nggo nimai keselamaten si ipadanken Kristus, jenari ngaloken geluh simbaru arah Kesah Dibata si ringan ibas kalak si tek (ay.10-11). Kai dage pedah Kata Dibata si seh man banta arah nats enda?

Tema-ta eme “Nggeluh Rikutken Sura-Sura Kesah Dibata.” Rikutken palas renungennta enda kita isingetken gelah min beluh mbedaken apai sura-sura ukurnta secara manusia, ras apai sura-sura Kesah Dibata. Kalak si nggeluh ngikutken sura-sura ukurna eme si mengutamaken kepentingenna saja, la masalah akapna erban cara curang pe, ras pepuasken ibas dosa, misalna nangko, erlua-lua, balas dendam ras sidebanna. Sedangken nggeluh rikutken sura-sura Kesah Dibata eme ndarami si ngena ate Tuhan ras ngikutken perentahNa, misalna erkeleng ate, nampati si kesusahen, nggit ngalemi salah, ras kerina biak-biak si ngena ate Tuhan. Dua hal enda berlawanen nge, sebab kalak si nggeluh ngikutken sura-sura ukurna saja labo nggit patuh man Tuhan erkiteken la mereken keuntungen akapna bana. Tentu labo hal murah naluken sura-sura ukurta selaku manusia. Tapi perlu si inget maka, nggeluh ngikutken sura-sura ukurnta manusia upahna eme kematen, sedangken nggeluh ngikutken sura-sura Kesah Dibata upahna eme keterkelinen. Ingetlah, kita lit bas doni enda seh ngayak wari enda eme erkiteken penampat Tuhan Si nepa kita, Si mereken Kesah man banta, emaka arusna geluhnta sipake guna ndalanken sura-suraNa (Invocatio).  Emaka marilah, pebulat ukurnta gelah nggeluh ngikutken sura-sura Kesah. Adi kita nggo nggeluh rikutken sura-sura Kesah tentu labo aru kel ateta gia reh kesusahen bagepe perbeben, tek kel kita maka Tuhan pasti mperdiateken geluhnta, ipermakaniNa nge kita bas ndalani erbage-bage paksa ibas geluhnta, sebab KesahNa Si Badia emekap si nampati kita bas doni enda. Minggu enda igelari Minggu Pentakosta. Pentakosta eme wari pe-50 ken kenca Paskah, ije nusur me Kesah Si Badia si ipadanken Kristus man ajar-ajarNa tupung IA nangkih ku Surga. Tupung Kesah Si Badia nusur, pulung ajar-ajar Tuhan Jesus ras enterem jelma si tek, jenari Petrus ras temanna sesama ajar-ajar ngerana cakap Kesah/bahasa Roh, seh maka erberita ia kerna Kristus ibas erbage-bage cakap, misalna Mesopotami, Media, Elam, Mesir, rsd. Seh maka lit lebih kurang 3000 kalak mindo iperidiken ibas gelar Kristus (Perb.2:41). Kesah Si Badia ibas cakap Yunani eme: Parakletos ertina penolong/penghibur, ia ringan ibas pusuhnta. Tuhan Jesus erpadan maka Kesah eme si nampati, mpersingeti ras ngajari kita guna ndalanken si ngena ate Tuhan (Joh.14:26 “Si nampati, e me Kesah Si Badia, si isuruh Bapa pagi i bas gelarKu, iajariNa kam kerna kai pe; dingen ipersingetiNa kam pagi kerna kerina si enggo Kukataken man bandu.”)  Kenca kita nggo ertoto ras ersembah man Tuhan ibas Pra Pekan Doa seh ku Pekan Doa, arapennta pusuhnta eme jadi ingan si sikap guna ingan tading Kesah Si Badia, seh maka reh ngasupna kita nggeluh rikutken sura-sura Dibata. Kinitekennta man Tuhan ula min terjeng arah sticker ngenca teridah, misalna i sepeda motorta ntah mobilnta galang je sticker “Jesus is my Savior” atau “Jesus Inside” tapi geluhnta la encidahken maka Kata Tuhan nggeluh bas kita. Dage, mari sipetetaplah ukurnta lako ngikutken peraten Tuhan, alu cara: si pemena, si ujilah kerina sura-sura si turah ibas pusuhnta apakah e guna kepentingennta saja atau guna kemulian gelar Tuhan. Sipeduaken, guna nguji kerina sura-sura si turah bas pusuhnta perlu kita tetap membangun relasi ras Tuhan subuk arah pertoton bagepe arah ngoge Kata Dibata, segelah nggeluh Kesah Si Badia ibas pusuhnta. Adi lit totota lenga siakap ijabap Tuhan, tetap ras teruslah ertoto, ula erdua ukur, bagepe ibas ngaloken calung anggur ras roti ibas Lakon Persadan Si Badia guna nutup Pekan Doa tahun enda, ula min erdua ukur kita bas erkiniteken man Tuhan bagi nina I Kor.10:21 “la banci kam minem tare calung Tuhan, jenari minem ka tare calung setan” Desken sekalak anak man bapa/nandena, bicara ngelawani ras mberontak gia ia, labo lit kemalemen ate idatna bageme pe kita nggeluh selaku anak Tuhan, adi la sue ras peraten Tuhan labo si dat kemalemen ate. Amin

Pdt. Elisabeth R. Ginting – GBKP Gedung Johor

Sermon Bahan Perpulungen Jabu-Jabu GBKP Tanggal 05-11 Juni 2022

Ogen   :Kejadin 1: 31 ; 2:1-4

Tema   :Kerina Tinepa Dibata Mehuli (GBP : Kelestarian Alam/Hari Lingkungan Hidup)

Tek kita maka kerina si lit bas doni enda subuk sinuan-sinuan si erbunga, si erduri, si galang ras kitik, bagepe mahluk hidup si melemuk, si liar, si ermbulu ras si erbisa, rikut pe kita kerina manusia itepa ras ijadiken Dibata kap. Janah kerina ijadiken Dibata labo sembarangen ntah pe la lit erguna. Kerina tinepa Dibata ningetken kita maka Tuhan enggo nepa doni enda ras kerina isina alu mehuli ras ratur guna encidahken kiniulinNa nandangi doni enda bagi si tersurat bas ogennta sekali enda.

Ibas ogennta enda ituriken uga kenca Dibata nepa doni enda ras kerina isina, bas wari si peenemken itatapNa me kerina janah idahNa maka kerina si enggo jadi e tuhu-tuhu mehuli, ertina lanai lit si kurang, lanai lit si man pandangen, seh maka nggo banci ikataken ‘enggo dung’ (finish). Kerina si enggo ijadiken Dibata pe dem bas kiniraturen, ipisahkenNa gelap ras terang (ben wari ras siang) guna memisahken waktu-waktu, maka lit waktuna istirahat, lit ka waktuna erdahin, jenari berganti ka wari ku wari pepituken. Janah wari si pepituken pe ipeserapNa ka (ikhususken) jadi wari si badia, ije ngadi Tuhan erdahin sebab enggo dung kerinana ijadikenNa. Enda merupaken sada gambaren geluh si man usihennta, uga Dibata ngelitken waktu untuk ngadi, emaka kuga responnta?

Selaku kalak si erkiniteken, sieteh maka kita manusia itepaNa sue ras tempasNa, dilaki ras diberu  ijadikenNa, alu tujun guna njagai ras mpekena-kena doni ras isina (ay.26-28). Alu kata sideban, kita enda me wakil Tuhan bas doni enda, si itepaNa mulia guna ngerawat ras mpekena-kena kerina tinepa Dibata si mehuli e. Emaka arusna sikap geluhnta pe arus min mulia segelah arah kita tetap teridah kuasa ras kemulian Tuhan ibabo doni enda. Kerina isi doni enda ijadiken Tuhan erguna kap man banta, janah arah e me kita banci encukupken keperlun geluhnta. Bahkan mahluk si kitik-kitik pe lit kerina gunana. Kai pe situhuna kuh ibahan Dibata arah tinepaNa e. Tapi adi turah biak merangap, em si erbahansa maka sinasa lit e pe kedungenna lanai bias. Emaka, bas tahun 2022 enda tema pelayanen GBKP “Kreatif Merawat lingkungan”  ngajuk kita  berkarya ngerawat lingkungen, mengolah taneh/sinuan-sinuan ras kerina pemere Tuhan si mehuli alu makeken erbage kelebihennta. Renungen PJJ nta sekali enda erkaiten ras Hari Lingkungan Hidup. Kuja kita akapndu la ngidah hasil karya Dibata?  Ku pantai, gunung, lau las, danau, taman bunga, kebun binatang, rst kerina e ningetken kita kerna tinepa Dibata si mehuli, bahkan ku juma, ku rumah, ku ingannta erdahin ije jumpa kita ras temanta erdahin ije pe si idah tinepa Dibata si mehuli. Emaka marilah sipuji Tuhan, sipake waktu-waktunta bas doni enda erban si mehuli, jenari bas wari si enggo ipasu-pasu Tuhan (wari pepituken) mari reh kita ersembah ku Tuhan arah kebaktin Minggu, jenari nggeluh makeken pemere Tuhan emekap akal kepentaren guna ngusahaken doni enda, gelah seh ku anak kempunta pe banci tetap tergejap pemere Dibata si mehuli enda.

Pdt. Elisabeth R. Ginting – GBKP Gedung Johor