Sermon Khotbah Minggu 17 April 2022 – Klasis Medan Namorambe ,Jesus Enggo Keke (Lukas 24:1-12)

Invocatio    :”Jenari Jesus ncidahken diriNa ibas rupa si la bagi biasa man dua kalak ajar-ajarNa. Ajar-ajar e sangana ibas perdalanen ku bas sada kuta (Mrk.16:12)

Ogen          :Masmur 103:1-5 (Antiphonal)

Khotbah     :Lukas 24:1-12 (Tunggal)

Thema       :Jesus Enggo Keke

Bas geluhnta si teptep wari megati si aloken berit si maba keriahen ukur, misalna berita kerna ketubuhen, berita kerna selamat bas bahaya nari ras berita menang lomba jenari ndatken hadiah. Lenga bo lit pernah si aloken berita kerna senina turangnta si keke bas kematen nari, sebab labo lit si ngasup naluken kematen lain Tuhan Jesus. Tentu alu bage siangka uga senggetna diberu-diberu si berkat ku kuburen Jesus ndatken berita kerna kekeken Jesus.

Paksa si e kenca peristiwa kematen Jesus i kayu persilang, bas wari Minggu erpagi-pagi berkat me diberu-diberu si biasa ngikutken Tuhan Jesus ku kuburen Jesus. Diberu-diberu e, eme Maria Magdalena, Johana ras Maria nande Jakup (lih ay.10). Enggo ibabana rempah-rempah si merim atena ngerempahi mait Jesus rikutken tradisi kalak Jahudi. Tapi sengget ia idapetina batu si nutupi lubang kuburen e nggo igulingken jenari mait Jesus pe lanai je. Tentu banci sibayangken, uga senggetna ras pe panik kel nge Maria ras kerina temanna e erkiteken mait Jesus lanai ije. Emaka bas situasi si bage, rempet ka idahna dua kalak dilaki tedis i deherna, uisna terang ersinalsal, seh maka mbiar kal ia kerina. Tapi menarik kel, reaksi kalak enda (ay.5) ija bas ia kebiaren e labo ia kiam melainken nembah mungkuk ia seh ku taneh. Sikap mungkuk e biasana ilakoken guna nembah ras nghamati, emaka banci kataken maka ibas keadaan sengget ras mbiar pe, la bene kinitekenna, tek ia maka si reh si uisna ersinalsal e badia. Jenari terjadi me dialog, ija ikataken kalak si ersinalsal uisna e man diberu-diberu ndai “Engkai maka idaramindu Kalak si nggeluh i tengah-tengah kalak si enggo mate?” Kata-katana encidahken maka Jesus enggo keke, lanai bas kematen. Emaka isuruhna me gelah iinget kalak enda kai si enggo ikataken Tuhan Jesus asum i Galilea denga, maka “Anak Manusia si isuruh Dibata la banci lang iendesken man kalak perdosa, ipakuken ku kayu persilang janah ibas wari peteluken nggeluh mulihi.” Paksa si e alu tangkas ituriken Jesus kerna kiniseran ras kematenNa man ajar-ajarNa (lih.Markus 8:31-32). Kenca bage maka nggo i inget Maria ras temanna ndai kerina kai si enggo pernah ikataken Tuhan Jesus, seh maka iturikenna me kerina kejadin e man Sepuluh sada ajar-ajar Tuhan Jesus (Judas enggo mate munuh bana). Tapi uga respon ajar-ajar e? La lit si tek! Tapi keke me Petrus jenari kiam ia ku kuburen. Idahna me kerina si enggo ituriken diberu-diberu e, ija kuburen e nggo kosong, tading uis mbentar balut mait ngenca ije. Mulih ia ku rumah dingen mamang atena kerna kai si enggo jadi e.

Sekalak diberu bas kalak Jahudi labo semal ngerana bas jelma sinterem, tapi uga maka Maria Magdalena ras temanna si jadi saksi pemena si ngaloken berita kerna kekeken Jesus, labo ajar-ajar Tuhan Jesus si dilaki? Seh maka ajar-ajar si Sepuluh sada la ia tek. Sebab berita kerna kekeken si labo umum terjadi pe mberat iakapna ngalokenca, apai ka si mpeseh berita e diberu ka, si paksa si e lit bas kecedan ate. Secara kejiwaan, kalak si mbaru erceda ate lit ibas tahap Denial (menyangkal), lenga ngasup ngaloken kai si terjadi ntah pe bagi kalak ernipi, apai ibas diberu si carana rukur idominasi suasana hati, emaka wajar kel nge ajar-ajar Tuhan Jesus la ia tek nandangi berita si ipeseh Maria ras temanna kerina. Tapi arah enda banci si idah, uga konsisten-na Tuhan nuduhken keberpihakenna nandangi kaum si ipinggirken, si ianggap lemah, seh maka diberu-diberu eme si jadi saksi si pemena bas ngaloken berita kerna Jesus enggo keke. Janah arah berita si ibaba dua dilaki si uisna ersinalsal ndai saja minter diberu-diberu e nggo tek maka Jesus nggo keke, lenga pe idahna Tuhan Jesus e mulihken. Berbeda ras ajar-ajar si Sepuluh sada, ija kenca Jesus encidahken diri secara langsung maka ia nggo tek, bagi si ituriken bas ayat Invocatio (Mrk.16:12) janah kenca ajar-ajar si ngidah Jesus ndai mulih mpeseh berita man temanna kerina, tetap kang labo lit si tek, perban lenga idahna Jesus secara langsung (ay.13). Emaka berita kerna kekeken Jesus e labo teraloken adi labo kin erpalasken kiniteken ras pengangkan kerna Kata Dibata. Sebab adi ikataken erkiniteken, la pe idah tek nge, apai ka adi iinget ajar-ajar e kerina kata-kata si pernah isehken Guruna e.

Kuasa Tuhan la kap ersibar, enda me si ituriken Pemasmur arah ogennta. Ipujina me Dibata si enggo ngalemi dosa-dosana, dingen si nggo mpepalem kerina pinakitna. Jenari ibas kuburen nari pe ipulahi Dibata, ipasu-pasuNa alu keleng ate ras perkuah ate. Bageme kinitekenna ibahasakenna arah pengalamen-pengalamen geluhna ngenanami kekelengen Dibata, si enggo mulahi nini-nini bangsa Israel bas ketertindasen nari. Tentu kita pe, kalak si tek, tuhu melala kal pengalamen geluhnta ngenanami kekelengen Dibata, emaka uga arusna sikapnta?  Bas peringeten wari Paskah enda kita iajuk guna mulihi mpelimbarui tekadnta bas erkiniteken. Paskah ertina : Paska (Yunani) ertina enggo ibentasi (sudah dilampaui), arah kekeken Tuhan Jesus teridah maka kematen enggo ibentasiNa. Kematen e hal biasa, ise pe manusia pasti mate, tapi si keke bas kematen nari labo kap hal si umum terjadi. Emaka berita kerna kekeken Tuhan Jesus e arusna jadi berita si maba keriahen man banta, si mpeturah semangat si mbaru bas kita. Emaka ikutlah keke, keke bas kemalasen, keegoisen/ngukuri diri sendiri, kerangapen, kinilasetian man perbulangen/ndehara, rsd.

Jesus enggo keke, eme tema-nta, ngajuk kita gelah ikut keke, gelah jadi si mbaru. Simbol Paskah eme telur, si nuduhken maka arah peristiwa Paskah lit kegeluhen si mbaru. Paskah e bali ras wari kemerdekaan, emaka petetap ukurnta, ola mbiar bas ndalani kegeluhen enda gia melala tantangen bas ateta ndalanken kebujuren. Mari dage, sipake kerina si lit bas kita si enggo ibereken Tuhan guna muji gelarNa. Keleng ateNa bali ras ganjangna langit ibabo doni nari man kalak si erkemalangen man baNa. Amin

Sermon PJJ Tanggal 17 – 23 April 2022

“Ukuri Lebe Maka Belasken” (Kuan-Kuanen 15:23, 28)

Lit erbage-bage jenis buah-buahen ibas doni enda, piga-piga jenis buah-buahen lit si arus tasak lebe bas batangna maka banci iperani janah nanamna pe entabeh, salah sadana eme buah jambu air. Buah si kin memang entebu, adi nggo tasak bas batangna tentu dat nanam ntebuna, tapi adi lenga ia tasak nggo iputikken uga pe nanamna mecapet, mekelat ras pe macem sebab lenga paksana iperani, janah iperami pe labo lit gunana, bicara ileketken ka pe ate kubas batangna lanai banci. Bali ras ranan si la bas paksa si payo ibelasken, labo banci itarik mulihken, seh maka bene keriahen ukur bagi pedah penulis kitab Kuan-kuanen si jadi ogennta.

Kitab Kuan-kuanen eme kumpulen kata ajar/nasihat sinisehken raja Salomo arah kepentaren si ibereken man bana. Kata ajar enda isehkenna guna ningetken kerina jelma segelahna ndarami kepentaren alu erkemalangen man Tuhan ras meteh kai kin si pentingna bas geluh enda. Emaka bas kitab si ngajarken kepentaren enda, isingetken kerna kuga arusna makeken kata-kata. Adi kata-kata e ibelasken ibas paksa si payo tentu mereken keriahen, desken buah jambu si iperani ibas paksana si entebu nanamna. Misalna adi ngerana guna mereken kata pengapul bas acara erceda ate, tentu kata-kata si pas eme si encurminken maka kita pe ikut ermorah ate ras si banci mpegegehi ukur si megi-megi, labo kata-kata  penghakimen gia mungkin lit salah keluarga e. Bagepe sebalikna, ibas paksa keriahen ukur misalna bas kerja erdemu bayu, labo kata-kata si mpebiar-biar si belasken tapi si mpeturah ukur guna ngataken bujur man Tuhan dingen tetap nggeluh erpenalemken Tuhan. Adi kata-kata si ibelasken pas, ibas paksa si payo, tentu ulihna mereken kemalemen ate.

Selanjutna nina penulis kitab Kuan-kuanen enda maka kalak mehuli, iukurina lebe maka ibelaskenna jabapna. Berbeda ras kalak jahat, pedas ia erjabap jenari mpeturah kesusahen (ay.28). Alu kata sideban banci kataken, maka arah ranan e pe banci ibedaken apai kalak si mehuli ras apai kalak si jahat. Kalak si mehuli, rananna erban malem ate, sedang ranan kalak jahat desken pisau si ntelap, banci ngelukai pusuh ntah pe erban tersayat pusuh kalak si megikenca. Tapi la banci si pungkiri bas geluh si teptep wari, lit ka nge kalak jahat si rananna medate/lemah-lembut, si malem ate kalak ibanna erkiteken lit tujunna (istilah: modus). Alu tujun gelah seh sura-sura ras gelah mehuli teridah bas jelma sinterem, itutupina kejahatenna, emaka perlu ka nge kita metenget nandangi kalak si bage! Saja ibabo si e kerina, inti pedah si isehken arah ogennta enda ngajari kita gelahna beluh makeken kata-kata si pas ibas paksa si payo alu cara siukuri lebe ope ibelasken, sebab kata-kata eme buah perukurennta.

Lit kata-kata bijak ngatakenca “Lidah tak bertulang” tapi amin gia tak bertulang, lidah/dilahnta e banci jadi pedang si paling entelap ibabo doni enda. Tema-ta eme “Ukuri Lebe Maka Belasken” emekap sada perentah si ningetken kita selaku anak-anak Tuhan gelahna lalap min erlajar dingen ngukuri kata-kata si pas ibas paksa si payo ope sibelasken, alu tujun gelah ula kitik ukur kalak siban, lanai gedang atena nggeluh jenari ndabuh ia kubas dosa. Sebab adi kata-kata si belasken kita mpeturah kesusahen, labo hanya kita si erdosa tapi mabai kalak pe lanai erkiniteken man Tuhan. Pendiri negara Republik Tiongkok, tahun 1949, tergelar Mao Zedong, kitik-kitikna sange eme anak sekolah minggu. Tapi bas sada paksa, ilebuh guru sekolah mingguna ia alu istilah “Anjing kuning” jenari lanai ia nggit ku gereja, emaka jadi komunis, bene kinitekenna. Ula min lit nari korban si bage, emaka bas pelayanen gerejanta marilah sipindo kepentaren man Tuhan gelahna arah kata-katanta banci mabai enterem jelma nggeluh erkemalangen man Tuhan saja.

Diskusi:

1. Turiken pengangkanndu, erti kata sipayo ibas paksa sipayo ras ukuri lebe maka belasken!
2. Turiken pengalamennta, ibas erkomunikasi sedekah enda dingen kai ulihna man banta ras kalak sideban?