SERMON  KHOTBAH  MINGGU,  06  MARET  2022 Passion  II / Invokavit  :  Erlebuh  Ia  ku  AKU, Ikelini  Tuhan Kalak  Si  Erlebuh  Man  BaNa (Roma  10  :  8 – 13)

 Invicatio :  “Ibas  kesusahen  erlebuh  aku  man  Tuhan,  mindo  penampat  ku  lebuh  Dibatangku.  Ibas  kemah  si  Badia  nari  ibegikenNa  sorangku,  perserkongku  seh  kempak  Dibatangku”  (Msm.  18 : 7a)

Ogen      :  Ulangen  26  :  6 – 10a  (Tunggal)

Kotbah   :  Roma  10  :  8 – 13   (Tunggal)

Tema      :  Ikelini  Tuhan Kalak  Si  Erlebuh  Man  BaNa

---

1. PERLEBE

Minggu  enda  igelari  minggu  Invokavit.  Arah  minggu  enda  iajuk  kita  guna  tetap  erlebuh  man  Tuhan  ibas  kerina  situasi  kegeluhenta.  Tentu  tupung  kita  erlebuh  man  Tuhan  nggo  leben  sitandai  alu tangkas  ise  kin  Dibata  e  janah  tek  man  baNa,  sebab  labo  mungkin  kita  erlebuh  man  kalak  si  lenga  sitandai  janah  labo  mungkin  sipindo kai  siperluken  kita  man  kalak  si la terteki.  Pengarepenta  kerna  Dibata  mereken  simehui  arus  tetap  lit  ibas  kita  sebab  Dibata  erkeleng  ate  man  kerina  kalak  si  ernalem  man  baNa.

 

1. ISI

Perpulungen  kalak  Kristen  i  kota  Roma  lit  ibas dua  latar  belakang  agama,  Jahudi  ras  non-Jahudi.  Duana  kelompok  enda  iperdiateken  Paulus  labo  kel  mejile  hubungenna  bahkan  kalak  Jahudi  rusur  ngasgasi  kalak  si  la  Jahudi alu  maksaken  gelah  si  la  Jahudi ngikutken  kesemalem  kalak  Jahudi  bagi  harus  ersunat,  harus  mantangken  pangan,  rsd.  Erkiteken  si  e  maka  rusur  terjadi  bentrok  antara  kalak  Jahudi  ras  si la  Jahudi,  maka  Paulus mereken  sada  dasar ibas  erkiniteken  gelah  turah  pemahaman  si  seri  kerna  hal – hal  si rusur  jadi  perdebaten  ibas  kelompok  enda  (Roma  14 : 1 – 3; 17).  Sikap  kalak  Kristen  si  arah  golongen  Jahudi  pe  berdampak  ku bas  kinitekenna  nandangi  Jesus  sebab  piga – piga  kalak  ibas  kalak  e  labo  tek  maka  Jesus  e  Juruselamat,  tutus  ia  tapi  erpalasken  pemeteh  si  la  payo  (ay. 2),  enda  ncidahken  maka  kalak  e  labo  itandaina  kebenaren  ibas  Dibata  nari  ras  meganjang  ukurna  sebab  kebenaren  si  enggo  irancangna  eme  atena  ipakena  guna  membenarken  diri.  Ngidah  situasi  si  bage  rupa  mpeturah  kinigogon  ibas  pusuh  Paulus,  emaka  ibas  pengajaren  si  ituriken  Paulus  ipetangkasna  maka  Jesus  eme  penggenepen  Pedah  Sepuluh  (ay.4).  Ibas  bahasa  aslina  “penggenepen”  iterjemahken  ibas  bahasa  Yunani  nari  “telos”  ertina  sebagai  perwujudan,  penyempurnaan.  Jadi  kerina  siimaksudken  ibas  Padan  Sindekah  arah  Pedah  Sepuluh  enggo  igenepi/isempurnaken  ibas  Jesus  Kristus.

Roma  10 : 8 – 13  nuriken  kerna  kata  Dibata  ras  sikap  kalak  nandangi  kata  Dibata  e.  Kata  Dibata  e  rembak  ras  kita  enggo  lit  ibas  babahta  ras  pusuhta.  Kata  Dibata  eme  Dibata  e  sendiri  bagi  tersurat  ibas  Johanes  1:1.  Adi  ikataken  kata  Dibata  nggo  lit  ibas  babahta  ras  pusuhta  ngatakenca  maka  kata  Dibata  e  ersada  ras  kita  janah  teridah  arah  pengeranannta  ras  perbahanenta.  Pusuh  ras  babah  eme  dua  organ  tubuh  si  penting  kel  guna  naksiken  kerna  Kristus  sebab  ise  si  tek  man  baNa  la  kecewa  (ay. 11)  janah  si  erlebuh  man  baNa  ikeliniNa  (ay. 13).

Ulangen  26 : 6 – 10a,  ngerana  kerna  persinget  man  bangsa  Israel  uga  ndube  ia  nggeluh  jadi  budak  itaneh  Mesir  tapi  tupung  erlebuh  ia  mindo  penampat  idengkehken  Tuhan  sorana  erlebuh  janah  idungi  Tuhan  perkarana  si mbelin,  ibabaNa  bangsa  e  ndarat  ibas  taneh  si  mesawang  nari  bengket  ku  taneh  si  dem  alu  susu  ras  tengguli.  Pengalaman  pahit  bangsa  Israel  jadi  pembelajaren man  banta  guna  tetap  setia  erlebuh  man  Dibata  ras  nggejapken  keleng  ate  Dibata

 

• PENGKENAINA

Jadi  pengikut  Kristus  labo  segampang  bagi  siibayangken  kita.  Lit  rusur  pergumulen  si  mberat  si  harus  ialaken  segedang  kegeluhenta.  Ibas  ndalani  kerinana  banci  jadi  kita  jungut – jungut  ntah  pe  erkadiola  bahkan  lit  ka  si  nalahken  Dibata.

Tema  Ikelini  Dibata  Kalak  si  erlebuh  man  bana,  Ikelini (Ind.  Diselamatkan),  arah  tema  enda  iajuk  kita  gelah  tetap  erlebuh  man  Dibata  saja  sebagai  respon  maka  tuhu – tuhu  kita  nandai  Dibata  alu  tangkas  ras  tek  man  baNa.  Bagi  ende – enden  pengataken  bujur  si  ipenangkih  pemasmur  erkiteken  penandaina  Dibata  ras  penggejapenna  kerna  pengkawali  Dibata  si  nggo  mulahi  ia  ibas  mara  si  mangancam  geluhna,  ilebuhna  Dibata  janah  ipindona  penampat  (Mas.  18 : 7a). Erlebuh  ras  mindo  man  Dibata  ncidahken  maka  kita  erpengendes  ras  sipercayaken  geluhta  man  baNa.  Arah  kai  si  ilakoken  pemasmur  ngingetken  kita  gelah  ula  mbiar  ndalani  kegeluhenta  sebab  lit  Dibata  si  nemani  kita

Dibata  labo  pernah  nadingken  kita,  kidekah  kita  tetap  erdalan  ibas  sura – suraNa  maka  kerina  perbeben  si  nderpa  kegeluhennta  IA  ikut  muat  bagin  ndungisa.  Dibata  lit  ibas  kesusehenta,  ibas  baban  berat  geluhta  IA  tetap  mperdiateken  kita  nikmati  setiap proses  alu  erkiniteken  man  Dibata  gelah  si  datken  kualitas  iman  si  luar  biasa.

 

 

 

 

 

 

 

 

 

 

 

 

 

 

 

 

 

 

 

 

 

 

SERMON  BAHAN  PJJ  TANGGAL  06 – 12  Maret  2022

SINASA  LIT  IJADIKEN  ARAH  KRISTUS  GUNA  KRISTUS 

KOLOSE  1 : 15 – 20

 

Ibegi  Paulus  berita  kerna  perpulungen  kolose  arah  temanna  Epafras,  maka  situasi  perpulungen  sangana  ibengketi  pengajaren – pengajaren  si  la  payo.  Pengajaren – pengajaren  siituriken  man  perpulungen  Kolose  la  ngaloken  Kristus  selaku  anak  Dibata  si  nggo  lit  nai – nai  nari.  Emaka  arah  surat  sikirimken  Paulus,   ipetangkas  Paulus   maka  Kristus  e  labo  bagin  ibas  tinepe  e  tapi  Kristus  eme  sinepa  sinasa  lit,  alu  kata  sideban  proses  penciptaan  labo  terlepas  ibas  Kristus  sebab  kerinana  jadi  ibas  Kristus  emaka  krina  tinepa  e  harus  tunduk  man  baNa.

Ibere  Dibata  tanggungjawab  man  manusia  guna  njagai  ras  ngusahai  kerina  tinepa  Dibata  si  lit  idoni  enda,  janah  tugas  e  harus  idahiken  alu  dem  tanggungjawab  tapi  ibas  kinatana  manusia  la  ngasup  njagai  kepercayaan  si ibere  Dibata  eme  bena – bena  hubungen  manusia  rass  Dibata  ceda.  Ibas  situasi  enda  ka  me  Kristus  hadir  guna  mperdameken  manusia  bagepe  kerina  tinepa  ras  Dibata.  Kematen  Kristus  ikayu  persilang  jadi  bukti  maka  hubungen  manusia  ras  Dibata  mulihi  mehuli.  Kristus  tetap  njagai  kerina  tinepa  erkiteken  sie  maka  manusia  pe  harus  tetap  njagai  kiniulin  tinepa  Dibata  jadi  bukti  maka  lit  tanggungjawab  si  mbelin  man  Dibata.

Kerina  tinepa  si lit  idoni  enda  itepa  Dibata  guna  kiniulin.  Sada  ras  sidebanna  saling  membutuhken  (simbiosis  mutuslisme).  Emaka  manusia  harus  tetap  min  njagai  diri  gelah  la rate – ate  ras  la  mekarus  nandangi   tinepa  si  deban  sebab  Dibata  nepa  kerinana  guna  ncidahken  kiniulin  Dibata.  Aminna  pe  ibas  kinatana  melala  tinepa  e  nggo  ceda  erkiteken  manusia  la  ngasup  ngkuasai  diri  si  erbanca  lanai  teridah  kemulian  Dibata. Emaka  marilah  mulihi  si pekena  pusuhta  guna  tetap  ngergai  kerina  si  lit  idoni  enda  erkiteken kerina  ijadiken  guna  kemuliaan  Dibata.

 

Diskusi

1. Turikenlah pengangkanta  kai  ertina  sinasa  lit  ijadiken  arah  Kristus  guna  Kristus
2. Arihken dingen  lakokenlah  perbahanen  kai  si  banci  silakoken  ibas  jabu  guna  njagai  kiniulin  lingkunngenta