SERMON KHOTBAH MINGGU, 03 April 2022,Ikut Ngenanami Kiniseran Kristus ( Pilipi 3 : 4b – 14)
Passion VI / Judika : Cidahken Kerajangku Bujur O Jahwe
Invicatio : “Ia Itulak dingen igombangi, igengkenNa kiniseran ras si mesui. Ciga ate kalak ngenen ia, la iergaken, lalit si mperdiatekenca” (Jes. 53 : 3)
Ogen : Jesaya 43 : 16 – 21 (Tunggal)
Kotbah : Pilipi 3 : 4b – 14 (Tunggal)
Tema : Ikut Ngenanami Kiniseran Kristus
- PERLEBE
Sue ras kalender gerejanta, minggu enda eme minggu passion VI entah pe siigelari minggu Judika (latin : judica erpalasken Msm. 43 : 1) ibabai kita gelah ngangkai keadilen ras kebujuren Dibata, ibas kegeluhenta tep – tep wari megati turah kinilabujuren ras kinilaadilen megati pe lanai si teh ku ja ndarami serpang pulah. Meremang kel sukat – sukat kebujuren ras keadilen e ibas doni enda. Banci jadi kita pe ikut ndalanken kinilabujuren ras kinilaadilen ibas jabu, gereja, masyarakat ras ija pa pe kita tading. Selaku manusia si nggo ibereken Dibata man banta kepenteren maun – maun la kita ngasup ndalanken si benar adi la kita nggeluh ibas keadilen ras kebujuren Dibata.
- ISI
- Kotbah
Pilipi eme sada kuta si lit i kawasen Makedoni Timur sekitar 16 km arah pesisir Laut Aegea. Pilipi ipanteki Paulus ras teman – temanna (Silas, Timotius, ras Lukas) ibas perdalanen misi si peduaken sebagai tanggapen pengenehenen si ibereken Dibata i Troas (Perb. Rasul 16 : 9 – 40). Surat man perpulungen Pilipi itulisken Paulus asum ia ibas penjara Roma (sekitar 61 – 63 M) itulis alu nada akrab antara Paulus ras perpulungen. Perpulungen Pilipi memiliki hubungen si khusus ras Paulus erkiteken kalak enda rusur ngirimken penampat man Paulus baik berupa duit bagepe hal si deban (2 Kor. 11 : 9; Pil. 4 : 15 – 16). Perpulungen Pilipi sendiri labo perpulungen si bayak (2 Kor. 8) tapi sura – sura perpulungen e nampati erkiteken kedekaten ras keriahen ukurna nampati guna perdalanen Paulus ibas erberita kerna berita si meriah. Ibas nehken penampatna man Paulus perpulungen e mengutus Epafroditus janah Paulus pe ngataken bujur man bana. Arah surat si ikirimkenna man perpulungen Pilipi Paulus mpetangkas kerna sura – sura Dibata kerna ukumen sekaligus meyakinken bangsa e guna tetap nandai Tuhan ras tetap ikut ibas dahin – dahin bas perpulungen. Adi biasa surat Paulus itulisken alu tujun guna ndungi persoalen perpulungen, tentu surat Paulus man perpulungen Pilipi pe guna mpersingeti perpulungen i Pilipi kerna pengangkan si papak si reh ibas pengajar – pengajar palsu si rusur membanggakan kejahudinna ras si memaksaken hukum Jahudi man kalak si la Jahudi misalna kerna ersunat, ndalanken hukum taurat si erbanca kiniteken ras ketutusen kalak Kristen si la Jahudi tempa – tempa sebuah kesia – siaan.
Pilipi 3 : 4b – 14 nuriken kerna Paulus ope denga bertobat. Perubahen kegeluhenna si ndube nggeluh rikutken aturen agama Jahudi, patuh nandangi hukum Taurat bahkan sekalak Doktor Teologi. Secara lahiriah ia i sunat, status ras kedudukenna pe sebagai kalak terhormat i kalangen kalak Parisi. Semangat militan Paulus ibas ndalanken kebenaren agamana ndube e me si erbanca ia nakiti kalak Kristen. Enda me si jadi kebanggaan man Paulus, iakapna maka ia tuhu – tuhu hebat ras benar tapi kepe ibas perjumpanna ras Kristus ipintun gerbang kota Damsik si nai iakapna benar dingen hebat kepeken kerina e kesia – siaan. Perjumpan Paulus ras Kristus e jadi pengalaman si mereken pencerahen ras pembebasen janah e me si isaksiken Paulus (Pil. 3 : 4 – 5). Ipulahi Paulus kerina si ndube iakapna jadi kinihagan man bana kenca enggo idatna si terulin, si mereken kegeluhen si tetap.
Ibas penandaina Dibata labo ikataken Paulus maka ia sempurna, kerina si nggo idatna arah perjumpanna ras Kristus labo ijadikenna jadi alat guna membanggaken diri entah merasa puas tapi ia tetap erjuang guna nandai Dibata alu lebih payo. Kai si ndube jadi kemegahen man banna kenca nggo tandaina Kristus e kerina jadi kesia –siaan.
- Ogen
Jesaya 43 : 16 – 21 nuriken kerna bangsa Israel paksana ndalani masa pembuangen i taneh Babel. Radu ras sieteh maka masa – masa pembuangen eme mas kelam ras suram nandangi bangsa e bahkan bangsa Israel rukur maka enda me wari – wari terakhir ia nggeluh. Arah Nabi Jesaya Dibata ngerana man bangsa e, ipulahiNa me bangsa Israel ibas kiniseran e nari, tujun Dibata mulahi bangsa e, eme guna nehken kegeluhen simbaru. Ayat 16, 17 naksiken kerna perbahanen Dibata man bangsa Israel tupung bangsa e erdalan nuju ku taneh perpadanen. Icidahken Dibata perbahanenNa si mbisa alu erban dalan i tengah lawit si man bentasen bangsa e janah engkernepken tentara Mesir. Ibas kegeluhen bangsa Israel lawit eme wilayah si berbahaya janah ianggap jadi ingan kuasa kegelapen, emaka perbahanen Dibata si nggo nelamatken bangsa e i Mesir nari jadi karya keselamatan si mbelin ibas Dibata nari. Ayat 18 – 21 Dibata nehken padanaNa maka simbaru reh me. Hal – hal simbaru si ate Dibata ibahanNa eme erbahan pasar arah gurun pasir, banci sibayangken gurun pasir si biasa butuh waktu si cukup ndekah guna mbentasi dalan e, ije me ibahan Dibata pasar guna jadi dalan. Mpepaler lau ibas gurun pasir, gurun pasir identik kerna situasi kerah ras tandus tapi ije me Dibata ngasup mpepaler lau seh maka kerina rubia – rubia ersurak ije. Enda ngatakenca sesuatu simbaru e me labo hal si biasa janah si lenga pernah lit, enda perkara si mbelin si menakjubkan. Enda me pesan Dibata man banta “olanai inget – inget kai si nggo ndekah jadi, la padah ipegedang kerna kejadin si nai – nai”, ngataken maka kerina si nggo lewat erbanca kita la focus nandangi pendahin Dibata emaka tetap tek Dibata sangana erdahin mpeturah hal – hal si luar biasa ibas kegeluhenta.
- Invocatio
Jesaya 53 : 3, nuriken kerna kiniseran sekalak suruh – suruhen si kehadirenna la terterima kalak, segat ate kalak nandangi ia rikutken ras pemimpin – pemimpin Israel nulak ia. Ipesega – sega kalak ia, igombang – gombangi, kerina kalak nutup ayo arah ia nari tapi kepeken suruh – suruhen eme si mereken keselamatan man banta, ia me si nebusi kerina dosa – dosanta.
- PENGKENAINA
Selaku anak – anak Tuhan tentu kita memiliki sejarah kegeluhen, baik senang ntah susah terutama sejarah kegeluhen si erbahanca kita ertutusna kita ndahi Tuhan janah harus siinget ibas kita ikut pendilo Tuhan e kita pe ikut ngenanami kiniseran Jesus Kristus. Erkiteken dosa –dosanta Kristus e ngenanami kiniseran. Ibas kita ngenanami kiniseran ula kita jungut – jungut atau menyalahken Dibata.
Penandainta kerna Dibata ngajuk kita nggit ikut muat bagin ibas kiniseran Kristus. Nggeluh ersada ras Kristus ngatakenca maka enggo sialoken kuasa pertobaten, sialoken pengalemi dosa. Tema nta ikut ngenanami kiniseran Kristus. Kristus ngasup ndalani kiniseran si mberat erkite – kiteken IA patuh man Dibata. Tentuna kita selaku kalak si ngakuken Kristus e Dibata ras Juruselamat, kita pe harus pang ngalaken kiniseran. Melala kiniseran sihadapi ibas kegeluhennta, lit si ngasup tapi lit ka nge si la ngasup seh deba maka depresi rsd., tapi kalak si tek ras patuh man Dibata ndatken gegeh guna ngalaken kiniseran e sebab tek ia maka Dibata pasti engkapiti kita ibas kerina perkara silit ibas geluhta. Kepatuhennta man Dibata ncidahken kiniteruken ukurta iadepen Dibata janah e me si merubah kita.
Pdt. Sri Novalinda Br Tarigan
GBKP Rg. Tebing Ganjang
SERMON BAHAN PJJ TANGGAL 03 – 09 April 2022
KEMENANGEN ARAH KRISTUS
1 KORINTUS 15 : 51 – 57
Korinti eme kuta si meriah erkiteken posisina si tepat ibas jalur daraten jadi dalan pintas jalur perdagangan. Situasi penduduk pe nggo bercampur suku bangsa seh maka mbue kejahaten terjadi. Ibas ingan si dem kejahaten, kegeluhen si mewah bagepe situasi moral si nggo ceda me Paulus ngelai ras erbahan kemenangen si luar biasa janah enterem kalak ibabai Paulus nandai Kristus tapi lit terjadi perpecahen ije si erbanca ceda ate Paulus.
Ogenta enda eme jadi perkatan Paulus, atena ngataken maka kita labo pantas guna ngaloken kerajan surga sebab daging ras dareh si ermasap – masap ibaba ku ingan si la ermasap – masap. Emaka adi ateta bengket ku ingan si la ermasap – masap syaratna eme dagingta harus iubah ras e terjadi paksa kerehen Jesus si peduakaliken. Paulus ngataken maka kematen labo man kebiarenken, ibas sengkemirep mata ibas paksa ersora terompet siperpudina dagingta e iubahken. Kematen eme kebiaren si tertinggi ibas diri manusia sebab mbiar kita nadingken teman ntah keluarga sinikelengi kita atau sebalikna emaka guna mpertahanken hidup lalap kita berjuang, berjuang uga maka tetap sehat, adi sakit man tambar, adi lit pangan si jadi pantangen mis nge si pantangken kematen e me hal si alami.
Nterem kalak mbiar mate erkiteken lenga lit kepastian ibas kita kuja ras uga kita kenca kematen ras si sedari maka kita dem alu dosa janah lenga kita pang mpertanggungjawabkenca tentuna si e erkiteken lenga kel paguh kinitekenta tapi kalak si nggo paguh kinitekenna lanai bo ia mbiar mate sebab kematen eme dalan maka jumpa kemalemen ate si tuhu – tuhu janah si tuhuna kita nggo ndatken pengalemi dosa arah Jesus Kristus. Paulus pe mpersingeti maka Dibata desken sekalak Bapa si sangana nimai anakNa guna reh ndahi IA mulihken janah kalak si reh man banNa lanai lit kebiaren sebab keleng ate Tuhan.
Pdt. Sri Novalinda Br Tarigan
GBKP Rg. Tebing Ganjang
Leave a Reply