Sermon Khotbah GBKP – Minggu Passion III (Reminiscere) Tanggal 13 Maret 2022 – Klasis Medan Namorambe , Tuhan Ngkelengi Kalak Si Erkiniteken (Kejadin 15:1-6 )

Invocatio   :Emaka marilah sideheri alu la biar-biaren Dibata si erkuasa si dem alu lias ate. Ije sialoken perkuah ate ras lias ate gelah dat kita penampat ibas si iperluken kita (Heb.4:16)

Ogen         :Pilipi 3:17-21 ( R )

Khotbah    :Kejadin 15:1-6 ( T )

Tema         :Tuhan Ngkelengi Kalak Si Erkiniteken

Adi isungkun kita kai ndia bedana kegeluhen kalak si tuhu-tuhu erkiniteken ras si teridah tempa erkiniteken, mungkin mesera siakap mbedakensa, sebab adi kataken maka kalak si erkiniteken la lit perbebenna, labo lit ise pe si nggeluh i doni enda la lit perbebenna, bahkan sekalak Abraham pe, Bapa kalak si tek pernah bergumul kel ia ngalaken perbeben. Tapi lit nge si beda antara kalak si tuhu-tuhu erkiniteken ras si teridah ngenca erkiniteken, kai e? Mari perlebe sipebagesi pengangkannta kerna palas renungennta enda.

Ibas kitab Kejadin 15:1-6 enda ituriken me kerna perpadanen Dibata ras Abram. Sieteh maka Abram si denggo iganti Tuhan gelarna jadi Abraham, tantangna idilo lebe Tuhan secara pribadi, nina Tuhan “tadingkenlah kade-kadendu, rumah bapandu,jenari laweslah ku negeri si Kutuduhken”  paksa si e umur Abram enggo 75 thn (Kej.12:1,4), umur si lanai bo tergolong muda, tapi Abram alu tutus iikutkenna perentah Dibata e. Jenari erpadan Dibata man bana guna njadiken ia Bapa bangsa si mbelin, janah terberita me pagi gelar Abram, dingen geluhna ipasu-pasu Tuhan seh maka arah ia nterem kalak si dat pasu-pasu, khususna kalak si erban mehuli man Abram ndatken pasu-pasu Tuhan. ertina, Tuhan erpadan mereken bana  kesusuren, kebayaken, gelar si terberita ras kemalemen ate. Tapi kenca si e, labo minter ialoken Abram kerina e, teridah arah ibas palas renungennta enda. Ije ituriken maka Abram merespon padan Dibata (ay.1) alu ngataken “Tuhan si Mada Kuasa, kai gunana upah si iberekenNdu ateNdu man bangku e, adi labo lit anakku? ….La lit iberekenNdu anak kupupus, janah erkiteken si e, sekalak ibas budakku me enggo jadi si ngalo tading-tadingenku!” (ay.2-3) Si jadi penungkunen, apakah Tuhan lanai nginget janjiNa man Abram? Ibas ay.4 sekali nari Dibata erpadan/mereken jaminen man Abram maka labo budakna pagi si ngalo tading-tadingenna sebab lit me pagi pupusna, jenari ibabai Dibata Abram nare ku langit, niNa “..cubaken beligai bintang-bintang ah; bagi buena bintang-bintang e, bageme pagi teremna sinursurndu”  Kepeken Tuhan labo lupa nandangi janjiNa, tapi lenga seh paksana Tuhan nggenepi kerinana. Emaka megi Kata Tuhan e, tek Abram man Tuhan, janah erkiteken kinitekenna e ialoken Tuhan ia selaku kalak benar (ay.6) Arah palas renungennta enda teridah maka kalak si erkiniteken bagi Abram pe lit ka nge si jadi perbebenna, erkiteken ibas umur si enggo metua, lenga lalap lit pupusna. Tapi kedungenna, kinitekenna me si erbahan atan ia ngaloken kai si ipadanken Dibata man bana. Padan Dibata guna njadiken ia Bapa enterem bangsa tetap icikepna, emaka bas umur 100 tahun, dingen ndeharana Sara pe enggo 90 tahun, ije me tubuh Isak, anakna (Kej.21). Kai dage makna renungennta sendah kubas kegeluhennta si genduari?

Si pemena, Dibata la pernah nundalken padanna (ingkar janji), kerina si inanami Abram bas geluhna eme buktina. Lit kata-kata bijak ngatakenca “Ada kalanya Tuhan menenangkan badai, namun ada kalanya juga Dia membiarkan badai mengamuk dan menenangkannya” bali bagi si inanami Abram, ija ibas umur Abram si enggo lanjut, ije me Dibata nggenepi padanNa, labo perban lupa Dibata melainken guna encidahken kuasa-Na si mbelin si ngasup erban kai pe, la lit si metahat ibas Dibata. Tupung Abram lenga ngaloken kai si ipadanken Dibata, situhuna ije me kinitekenna iuji, tetap nge ia tek man Tuhan entah lang?! janah erkiteken tetap ia tek, ialokenna me upahna ibas Dibata nari. Kuga nge pengalamennta kidekah erkiniteken man Tuhan? Sipeduaken, erkiniteken man Tuhan ertina ernalem alu bulat ukur man Tuhan kai gia situasi si man adapen. Kalak si tuhu-tuhu erkiniteken man Tuhan teridah kap arah kinigenggengenna ibas ngalaken erbage perbeben, gia sekali labo minter ijabap Tuhan pemindonna bagi Abram enda, tapi tetap bulat ukurna nimaisa. Arah kinigenggengen e me reh tangkasna kuga belinna keleng ate Dibata, sebab kidekah  nimai penampat Tuhan ije me kalak si erkiniteken iproses gelah reh gegehna ras erpengarapen nimai padan Dibata. Ije me bedana kalak si tuhu-tuhu erkiniteken ras kalak si tempa teridah erkiniteken. Bagi si tersurat ibas ogennta, ija ituriken rasul Paulus maka kalak si erkiniteken eme si igelari warga Surga, si nimai kerehen Kristus mulihi gelah kula si ermasap-masap e isalihken jadi kula si mulia, tapi kalak si perimbang ras kayu persilang Kristus si ngukuri kerna barang doni ngenca, la banci lang lawesna kempak kebenen kap.

Minggu enda igelari Minggu Reminiscere (Passion III) ertina Ingetlah Min Perkuah AteNdu O Jahwe ningetken kita kerna keleng ate Tuhan si la erkeri-kerin ibas geluhnta. Keleng ateNa e me si mpengasup kita ndalani erbage paksa bas geluh enda, subuk senang ntah pe susah. Ayat Invocatio-nta ningetken kerina kita kalak si tek, gelah ula biar-biaren ngerembakken diri ras Tuhan, sebab IA dem alu lias ate, ibas IA nari kap kita ngaloken penampat. (Heb.4:16)  Dage, mari sigejapken  keleng ateNa e, kidekah kita nggeluh i doni enda kai saja nge tanda keleng ate Tuhan si enggo sialoken? Terbeligai kita kin? Tentu lang. Tema-ta eme “Tuhan Engkelengi kalak si Erkiniteken” kita mulihi isingetken maka kiniteken kap ngenca si jadi modalnta ngaloken keleng ate Tuhan, emaka  tetaplah tek ras erpengarapen man Tuhan saja!

(Pdt.Elisabeth R.Ginting – GBKP Gedung Johor)

Sermon PJJ GBKP Tanggal 13 – 19 Maret 2022

Ogen   :Kejadin 23:10-11

Tema  :Runggu Muat Si Mehuli

Semalna adi rikutken pengajaren nini-nininta nai, adi tupung mindo ateta arus me tan-ta arah teruh, e menandaken maka iperluken kel biak meteruk ukur. Sebab, labo lit ise pe nggit nampati kalak si meganjang ukurna, kalak si bage desken kalak si mindo tapi tan-na arah das, e gelarna ngerauk ntah pe banci kataken ngerampuk. Biak meteruk ukur teridah arah diri Abraham tupung ia ngadap man kalak Heti ibas ogennta.

Bas ogennta enda ituriken kerna kematen Sara, ndehara Abraham. Tupung si e ia ringan i negeri Kanaan, kenca isuruh Tuhan ia nadingken kutana jine. Sara mate i Hebron, ibas umur 127 tahun, janah tuhu ceda kal ukur Abraham erkiteken si e, tapi bage gia arus iukurina kerna ingan ija Sara ikuburken sebab semalna paksa si e kalak mate ikuburken i gua-gua. Emaka itadingkenna me mayat Sara, idahina kalak Heti (ay.3) jenari iturikenna sura-surana, maka selaku kalak tandang atena nukur taneh ingan ngkuburken ndeharana Sara. Megi si e, ipehagaken kalak Heti kal Abraham, ikatakenna maka Abraham enda ianggapna kalak si mbelin emaka meriah kal ukurna guna mereken kuburen si mejilena kal guna ngkuburken Sara, ndehara Abraham e. Teridah maka kepate kel kalak Heti enda nandangi Abraham, janah kata-katana jadi pengapul kal man Abraham. Jenari erjimpuh me Abraham i lebe-lebe kalak enda ndai, ipindona gelah ikataken kalak ndai man Epron, anak Sohar, maka atena nukur Gua Mahpela, si ndeher ras tepi jumana. Emaka kepeken Epron e sangana kundul ibas ingan runggun i gerbang kuta, radu ras kalak Heti sideban, jenari erbelas ia ilebe-lebe jelma sinterem e ngaloi pemindon Abraham. Iberekenna atena kerina juma e ras gua si lit ije man Abraham gelah banci ikuburken Abraham ndeharana ije. Tentu malem kel ate Abraham paksa si e, sebab si ipindona terjeng Gua nge ngenca tapi ibere Epron e ras jumana kerina pe, teridah maka Epron enda jelmana melias dingen la mesera ras ia arih-arih. Kai ndia si erbahan maka bage kel ulina respon Epron nandangi pemindon Abraham? Eme erkiteken iidahna kiniteruken ukur Abraham. Kiniteruken ukurna eme si jadi kunci arih-arih, seh maka dat me solusina, emaka kai dage kaitenna ras tema PJJ-nta?

Tema-nta eme Runggu Muat Si Mehuli, arah ogennta enda banci sieteh maka nai nari pe, arih-arih entah pe runggu enggo jadi kebiasaan geluh, teridah maka lit ka ingan si biasana ingan runggun, si ije Epron ndai kundul-kundul. Ibas tradisinta kalak Karo, runggu eme ingannta ercakap ngarihken kerna dahin-dahin si nandangi ilakoken subuk meriah ukur ntah pe ceda ate, bagepe guna ndungi persoalen-persoalen si la banci terdungi. Runggu ertujun gelahna banci duduk bersama guna ndarami solusi si mehulina. Ibas gerejanta GBKP tep-tep tahunna iprogramken Musyawarah Ngawan, si iagendaken tiap bulan Maret (tahun enda iagendaken tanggal 27 Maret 2022) guna banci ngawan ni perpulungen ras kerina Serayan Tuhan duduk bersama, meng-evaluasi dahin-dahin pelayanen si enggo erdalan, jenari mereken usul-usul guna ibahan jadi program pelayanen gereja ke depanna. Tujun musyawarah ngawan enda ilakoken eme guna kemajun pelayanen gereja ni Tuhan, emaka arusna kritik-kritik si membangun nge si ituriken ije, labo kebalikenna. Jadi, marilah ersikap kita guna musyarawah ngawan tahun enda, gelah reh dewasana kita kerina subuk ibas mempertanggungjawabken dahin-dahin pelayanen bagepe ibas ngukuri ide-ide cemerlang guna meningkatken pelayanen gereja sekaligus mpermuliaken gelar Tuhan. Amin

Pdt.Elisabeth R.Ginting – GBKP Gedung Johor