Khotbah Minggu 19 Juni 2022,Dibata Ngerembakken Manusia Kempak DiriNa(Masmur 105 : 1-6 )

Khotbah Minggu  19 Juni 2022

Invocatio : Kam kap Dibatangku ajari aku ngelakoken peratenNdu, mehuli min kam kempak aku, jenari babai aku arah dalan sip inter (Msm 143:10)

Ogen : Masmur 105 : 1-6 (Responsoria)

Kotbah : Roma 10:1-4 (Tunggal)

Tema   : Dibata Ngerembakken Manusia Kempak DiriNa

********************************************************

Pengajaran kerna dalan keselamaten ibas tep-tep agama tentu pelain-lain. Pemahamen si benar kerna pengajaren e tentu mabai kita kubas tindaken si payo. Emaka selaku kalak Kristen arus paguh ntah mbages min arusna pemahamenta kerna dalan keselamaten ibas pengajarenta gelah ngikuti kubas ketetapen ukur bagepe perbahanenta. Janah la terjeng ipahami tapi nggeluhlah ibas pengajaren e. Sebab kiniteken e tentu teridah arah perbahanen. Enda me sinanami Paulus tupung ia  erberita simeriah, gelah kalak si ngakuken kinitekenna man Dibata la lepak pendalankenna kinitekenna e arah perbahanenna, seh maka tempa sia-sia penebusen silakoken Yesus man bana guna keselamatenna.

Roma 10:1-4

Paulus Ras Ketaatenna

Adi ngerana kerna ketaaten kerna undang-undang tentu Paulus lanai bo iraguken kerna si e. Ia eme sekalak si tuhu-tuhu taat ndalanken undang-undang taurat erkiteken kitik-kitik na nari kin ia nggo disiplin elajar ras ndalanken undang-undang e. Janah seh ka nge ia kubas pengertin maka i darat undang-undang Yahudi e lalit dalan keselameten si deban. Emaka alu semangat ia guna munuhi kalak Kristen.

Tapi kenca Dibata ndatken Paulus jelas teridah perubahen ibas dirina. Pemahamenna si salah ndube jadi sada pengajaren si mpegegehi kerina kalak si tek. Paulus yakin kel maka kalak Yahudi e patuh ras taat ibas ndalanken undang-undang tapi labo ibas pengertin si benar. Ndalanken undang-undang erkiteken perbahanenna labo erkiteken kinitekenna. Emaka ituriken Paulus ukurna si ertoto guna kalak jahudi e, alu pusuh pengarapenn si tuhu –tuhu gelah ula min lepak bangsa e ngidah keselamaten e.

Paulus Ras Pengertin Si benar

Ieteh Paulus kel uga kegeluhen kalak jahudi tupung ia nehken surat enda sebab ia pe mbarenda ngenanamisa. Kepatuhen kalak jahudi ndalanken undang-undang tuhu-tuhu teruji, tutus ras taat kel ia tapi la arah pengertin si payo. la ia nggit mperdiateken kebenaren Dibata. La ia nggit ngidah kuga Dibata ngerembakken diriNa man manusia. Iusahekenna lalap ndalanken kebenarenna seh maka la ia nggit tahluk man kebenaren Dibata.

Pengertin si la payo enda tentuna ngikuti kubas cara beribadah nandangi Tuhan bagepe ibas ndalani kegeluhen. Emaka kai pe siibahanna gelah serta ia ibas perjumpanna ras Dibata. Kerina enda pengertin si salah sebab Kristus eme penggenapen undang-undang seh maka kerina kalak si tek man baNa rembak ras Dibata. Berarti keselamaten e labo ulih pengertin manusia ntah pe usaha manusia, tapi keselamaten e eme anugerah Dibata si iberekenNa man Banta erkiteken perkuah ateNa si mbelin man banta.

Masmur 105 :1-5 (Ogen)

Ijenda ituriken keriahen ukur kalak si rembak ras Dibata. Janah kerembakenna ras Dibata e mabai bana guna ngiahken kalak kerina pe gelah ermeriah ukur. Momoken kemuliaan Dibata, turiken perbahanenNa, rendelah muji Tuhan, meriahlah ukurta, dahilah Tuhan, Sembahlah Ia rasa lalap. Kerina enda ungkapen uga Dibata erdahin ibas kegeluhen pemasmur janah iajukna kerina  jelma guna muji ras nembah Dibata. Kalak si rembak ras Dibata tentu ngasup erberita arah kerina dampar geluhna sebab ietehna Dibata si mada geluhna, sinampati Ia ibas ndalani kegeluhenna emaka la tersinikkenna bana ibas meritaken keriahen ukurna.

Masmur 143:10 (Invocatio)

Pemasmur nuriken kerna pertotonna gelah min ibere Dibata man bana ukur lako jadi kalak si lalap metedeh ate ndalanken kebenaren. Tentuna lit ije sura-sura guna ngelakoken kai si ngena ate Dibata. Arus lit kerembaken ras Dibata guna ndalanken kai kin si ngena ate Dibata.

Refleksi

1. Nggeluhlah kita ibas pengertin sibenar.

Keselamaten si ibereken Dibata man banta labo ulih gegeh ras usahata tapi anugerah erkiteken perkuah ateNa. Emaka ibas kita ndalani kegeluhenta marilah nggejapken perkuah ateNa e man banta. Ula ndabuh kubas pengertin si lepak piah dungna si pala-palai erban mehuli gelah dat pengakun ibas Dibata nari. Siakap kerajinenta beribadah, keaktifan pelayanen, ntahpe perbahanennta si mehuli jadi dalan Dibata nelamatken kita.  Tapi sempurna kel penebusen Kristus I kayu persilang guna nelamatken kita lanai bo perlu itambahi ntah ikurangi. Tapi aloken e alu pengataken bujur ras geluhkenlah ibas perbahanenta tanda keriahenta ngalokenca.

2. Tetaplah cidahken ulih nggeluh rembak ras Dibata

Tetaplah sicidahken ulih nggeluh rembak ras Dibata. Bagi pemasmur nuriken kerna kiniulin Dibata ibas geluhna bagelah kita erberita kerna perbahanen Dibata. Ibas keadaan siugapana pe tetap ngasup ncidahken kinitekenta man Dibata. Sebab mehuli kel Dibata man banta.

3. Totoken ras dukunglah dahin gereja GBKP ras UEM

Minggu enda pe iajuk kita guna notoken ras mereken dukungen nandangi pelayanen si idahiken GBKP ras UEM. Gelah dahin-dahin si nggo iprogramken banci tetap idalanken ibas perkuah ate Dibata. Alu bage reh belangna berita kerna kiniulin Dibata man doni enda.