KENANGKIHEN TUHAN YESUS KU SURGA KAMIS, 26 MEI 2022,“Naksiken Yesus Ku Belang-Belang Doni”(Masmur 68:8-19 (Responsoria))

KENANGKIHEN TUHAN YESUS KU SURGA KAMIS, 26 MEI 2022,“Naksiken Yesus Ku Belang-Belang Doni”(Masmur 68:8-19 (Responsoria))

KENANGKIHEN TUHAN YESUS KU SURGA

KAMIS, 26 MEI 2022


 

Invocatio       : Jenari nina Jesus man ajar-ajarNa. “Laweslah siari doni enda janah beritaken berita si meriah man keria doni enda (Markus 16:16).

Ogen            : Masmur 68:8-19 (Responsoria)

Kotbah           : Perbahanen rasul 1:6-11 (Tunggal)

Tema            : “Naksiken Yesus Ku Belang-Belang Doni”.


 

Mejuah-mejuah man banta kerina,

Bicara lit sada kejadin ibas sekelewetta, janah kita ngenca saksi hidup ibas peristiwa ndai, bicara isuruh kita jadi saksi, pang nge kita,nggit nge kita, siap nge kita? Erbage-bage mungkin jabapenta; lit singataken pang, lit ka ngataken aku labo nggit jadi saksi, labo kueteh e, labo aku ije. Engkai maka bage…, Ah erkai ka aku ije berurusen ras si berwajib, nambahi dahin, pangen sinik saja, salah kari sitik saja penuriken banci salih jadi tersangka.

Arah kotbahta sendah isingetken maka, nggit ras la nggit ituntut kita jadi saksi, eme saksi Kristus. Engkai erkiteken kita enggo ngidah, meteh ras naksiken kerna kekenNa ras kenangkhenNa ku Surga ibas Pustaka si Badia selaku si enggo itebus ras iselamatkenNa ibas dosa-dosa nari.

 

Turang ras Senina sinikelengi Tuhan Yesus,

Tang-tangna nari pe enggo nge teridah kejayaan Tuhan Yesus, enda teridah arah tanda-tanda sengget si ibahanNa. Sierbahanca keke me perukuren maka IA me siniarapken Israel guna manteki Kerajaan Israel, perukuren ajar-ajar pe enggo bali ras jelma sinterem. Kerina enggo irasuki idiologi Kerajaan Israel. Em sebab na maka ngusul me jakup ras Yohanes anak Zebedeus man Yesus nina; adi sada waktu kerajaanNdu pantek gelah banci min kami duana jadi pejabat tinggi (Mat.10:37). Tapi kenca kekeken Yesus ras KenangkihenNa ku Surga, nungkun rasul-rasul nina: O Tuhan gundari kin ateNdu manteki kerajaan Israel mulihi? (ay.6). Arah penungkunen enda teridah maka mesera denga kel iakap rasul-rasul ngertiken perbahanen ras pengajaren Yesus e, sebab pengertinna terjeng kubas kerajaan doni enda. Emaka labo lit respon rasul-rasul  asum pernah ikataken Yesus i rumah BapangKu mbas ingan, janah lawes me Aku nikapken ingan man bandu (Yoh. 14:2). Bagepe la lit respon rasul-rasul asum nina Tuhan Yesus: Kam me pagi naksiken kerna Aku man kalak si deban i Jerusalem, ibas kerina daerah Judea ras Samaria, seh ku belang-belang doni enda kerina (ay.8). Kerina ajaren si bersifat rohani enda bagi angin mentas saja man rasul-rasul. Emaka nina Malekat Tuhan man rasul-rasul e “O kalak Galilea, engkai maka kam tedis natap ku langit? Bagi enggo ietehndu Yesus angkat ku Surga, bage ka IA pagi reh mulihken” (ay.11). Sebab sempat ia bengong dekahen natap…emaka ipersingeti malekat Tuhan me raul-rasul e. Perubahen terjadi eme kenca ipersingeti Malekat Tuhan, bagepe kenca Tuhan Yesus isaksiken rasul-rasul e nangkih ku Surga. Arah peristiwa kenangkihenNa ncidahken maka kinirajanNa la terbatas ku bas Iasrael tapi pe she ku belang-belang doni enda.

 

Turang ras senina sinikelengi Tuhan Yesus,

Arah peristiwa enda teridah kenca rasul-rasul sirang ras Yesus enggo iangkana maka tugasna labo jadi pejabat tinggi ibas kerajaan doni enda, tapi jadi saksi Berita si Meriah ku belang-belang doni enda. Emaka orientasi perukuren rasul-rasul lanai jabaten/kerajaan Israel. Kenangkihen Tuhan Yesus ku Surga enggo membuka perukuren rasul rasul kerna pendahin si man dahinken ibas doni enda, eme Naksiken Jesus ku belang belang doni enda (Tema), bagi nina Tuhan Yesus ibas Invocatio: Laweslah siari doni enda jenari beritaken Berita si Meriah man kerina doni enda.

Ibas pengogenta ituriken kerna Dibatanta si dem alu kuasa ras kinimbisanNa si ngaturken kerina isi doni enda, janah IA ringan ibas ingan si meganjangna. Kerna si enda pe perlu isaksiken man kerina manusia. Maka IA kap Tuhan Yesus si kundul arah kemuhen Bapa simada Kuasa e. Kita selaku kalak si tek man baNa isuruh jadi saksiNa. Naksiken kerna perbahanen Yesus nandangi doni enda, janah bagi si enggo ipadankenNa maka reh denga IA pagi ngulihi nandangi kalak si tek man baNa, jenari ersada ras IA i Surga.  Berita kerna Yesus enda arus ipeseh man kerina jelma, la erpendobahen ise pe ia (bayak ntah musil, pejabat ntah juak-juak). Ibas ndahiken dahinNa e labo ipeturutna kita sisada tapi iberekenNa gegeh man banta guna nampati kita eme Kesah si Badia.

Lau Cih, 18 Mei 2022

Share this post

Leave a Reply

Your email address will not be published.