BAHAN SERMON PEKAN DOA WARI III (SELASA/ 31 MEI 2022), Ertoto ras Erpengarapen

Invocatio             : “Kupindo man Dibata gelah italangiNa pusuh peratenndu gelah terang pengangkanndu. Alu bage banci ietehndu kai si banci iarapkenndu ibas Dibata si ndilo kam, bage pe gelah ietehndu maka seh kal buena erta-erta si mulia si isikapken Dibata man anak-anakNa”. (Ep. 1:18)

Ogen                     : Masmur 71:5-6

Thema                  : Ertoto ras Erpengarapen

Selaku manusia, kita megati nungkun ibas pusuhta, ngasup entah lang kita ngadapi wari-wari kegeluhen enda. Tentu jabapna, maka kita la ngasup adi kita mengandalken gegehta jine. Erkiteken uga hebatna, uga beluhna, ras uga bayakna pe kita, tentu kita tetap memerluken gegeh sideban gelah kita ngasup ngadapi kerina si jadi ibas kegeluhenta. Gegeh siniperluken kita eme gegeh simelebihi kodrat alam (megati igelari adikodrati), eme gegeh sirehna ibas Dibata nari erkelangken pertotonta man Dibata. Arah pertoton, Dibata mbereken kuasa si la terbatas man kita manusia si terbatas. Gegeh pertoton e banci menembus si la mungkin ibas diri manusia, misalna bagi pertoton Nabi Elia gelah ola nusur udan maka terjadi me lego telu setengah tahun dekahna, kenca ertoto ka ia mulihken, reh udan i langit nari, jenari taneh mereken asilna (Jak 5:17-18).

Ibas ertoto, lit dua hal penting si harus siinget me kiniteken (iman) ras pengarapen (harapan). Kiniteken ras pengarapen merupaken dua hal si la banci terpisahken tupung kita ertoto man Dibata. Kiniteken eme tek man Dibata ras kataNa (FirmanNya), sedangken pengarapen eme kesabaren ibas nimai jabapen ras penampat arah Dibata nari. Pengarapen enda me si mendorong kita guna lalap ertoto seh maka pertotonta ijabap Dibata. Pengarapen me si mbereken gegeh man banta guna terus erdalan ibas kiniteken ras taat man kataNa. Erpengarapen man Dibata la pernah mengecewaken, sebab kai pe si jadi ibas geluhta, eme rancangan damai sejahtera.

Judul perikop Masmur 71 enda eme: Pertoton kalak si enggo metua. Jadi metua eme proses alamiah ibas tiap jelma, tapi labo kerina kalak siap jadi metua (contohna: lit arusna enggo masuk Saitun tapi lenga nggit masuk Saitun). Masa tua merupaken arapen kerina jelma tapi ibas masa tua melala pergumulen geluh. Memang lalit alasen guna menolak jadi metua, arusna pe jadi metua merupaken sada kebanggaan. Adi budaya Tiongkok menganggap umur metua sebage lambang kebijaksanaan. Bali bagi budaya Yahudi, si menganggap maka umur metua merupaken wujud kematangen subuk pikiren bagepe spiritual. Tapi kenyataan si usur jadi, maka masa tua eme masa kebiaren erkiteken ibas masa tua gegeh erurakna, pinakit erbuena, bagepe secara psikologis megati turah kebiaren itadingken keluarga ras teman-temanna.

Isadari pemasmur me maka ibas masa tuana eme ia tuhu-tuhu butuh penampat Dibata, janah Dibata ngenca pengarapenna, emaka nina ibas Masmur 71:5, “Kam kap pengarapenku, man baNdu kap aku ernalem kitik-kitikku nari”. Pemasmur ngenehen maka geluhna mulai kitik-kitik nari seh masa tuana eme keajaiban Dibata. Mulai bertin nandena nari seh mulih ikandung taneh, geluh manusia iteruh kuasa Dibata. Arah pengakun pemasmur enda, erlajar kita maka erpengarapen man Dibata labo tupung ibas keadaan tersesak entah pe ibas pergumulen si mberat saja. Tapi pemasmur mulai kitik-kitikna nari seh asa metuana tetap erpengarapen man Dibata saja. Dibata ngenca jadi benteng geluhna.

Kerina kita pasti ngarapken si mehuli jadi ibas geluhta, misalna kebahagiaan geluh, kesusksesan, panjang umur, mejuah-juah, rsd. Tapi, faktana labo enda kerina jadi ibas kegeluhenta. Lit hal-hal si terjadi ibas geluhta di luar jangkauan pikirenta, si megati pe la pernah terbayangken kita terjadi ibas kegeluhenta. Emaka, melala kalak si kecewa, merawa, stress, depresi, rsd. Arah Kata Dibata ibas Roma 5:3-4, itegasken maka pengarapen eme hasil akhir arah sada proses. Urutenna eme, kiniseran, sabar ate (ketekunan), pengujin, ras pengarapen. Arah uruten enda, jelas maka pengarapen labo jadi uruten si pertama tapi ibutuhken sada proses. Ibas proses e ibutuhken kesabaren.

Bagepe, adi kita megegeh ertoto man Dibata gunana labo saja gelah kita ngaloken jabapen arah pertotonta tapi pe guna membentuk dirita memiliki karakter Kristus. Erbuena kita ertoto maka er-rembakna kita ras Dibata, ras mengubah dirita jadi seri ras karakter Kristus. Emaka, ertotolah kita alu dem kiniteken janah tetaplah erpengarapen man Dibata saja.