GBKP  KLASIS MEDAN NAMORAMBE WARI/BERNGI IV, KAMIS 20 JANUARI 2022 , “Tutus Ibas Ngelai” ( Matius 25:21-30. )

Invocatio          : Mula-mulana ijadiken Dibata langit ras doni (Kejadin 1:1)

Ogen                : Kejadin 41:46-49.

Kotbah             : Matius 25:21-30.

Tema               : “Tutus Ibas Ngelai”

Pengantar

Ngelai, istilah enda lanai bo asing man banta, ija arah ngelai ncidahken uga kita erdiate nandangi sesapih kita. Umpamana ibas kerja kerja megati kel kita muat bagin ikut ngelai selaku tegunta anak beru, terlebih ngelai asum muat man, ije kita ituntut aktif ibas, janah ikataken pe asum kita ngelai ola sinen rupana/ayouna, tapi sinenlah piringna. Ertina jelas maka ola kita mata-matan asum muat bagin ibas ngelai e, emaka asum ngelai ije ituntut keseriusen, ketutusen, ola kari asum lit sibaba si man elan e la urak-urak, erkiteken kita hanya kem saja ije, ilebuh kalak maka si dudurken, seharusna si orati kai si kurang maka sidudurken. Enda ertina kita tutus ibas ngelai. La obahna pe ibas dahin Tuhan maka dahin ngelai e arus idahiken alu tutus. Sebab dahin e sada dahin si mbelin si enggo ibereken Tuhan man banta selaku anak-anakNa, janah dahin ngelai e eme labo hanya itujuken man serayan Tuhan (Pdt, Pt,Dk) saja ngenca tapi pe man kerina pengurus-pengurus si lit ibas gerejanta bagepe man kerina ngawan ni perpulungen.

Penjelasen Nats

Arah bahan Kotbahta Matius 25:21-30, nuriken perumpamaan kerna telu kalak juak-juak si ngaloken talenta arah tuanna nari alu pelain-lain. Ija juak-juak si pemena lit iberekenna 5 talenta, juak-juak si peduaken ibereken 2 talenta ras juak-juak si peteluken ibereken 1 talenta. Sie ilakoken Tuan e man juak-juakna sue ras kengasupenna sekalak-sekalak. Kepeken juak-juak si ngaloken 5 talenta ras 2 talenta makeken talenta e alu payo janah idatna untungna masing masing, si ngaloken 5 talenta idatna 5 bagepe si ngaloken 2 talenta idatna 2 talenta.  Sementara si ngaloken sada talenta la ipakekenna talenta e alu ayo, justru itanemkenna. Asum reh tuan e justru ikatakenna tuan ndai la mehuli. Erdandanken sie merawa kal ate tuan e seh maka ibuat tuan e me talenta si sada sini ibereken man bana ndube jenari iukumna me juak-juak singaloken 1 talenta enda. Em erkiteken ia perkisat ras la ertanggungjabab.

Arah perumpamaan enda nuriken man banta uga kita gelah alu tutus entah pe setia ibas makeken kai si enggo ibereken Tuhan man banta selaku anak-anakNa. Kerna perbedaan talenta si ialoken Tuan e labo hal si penting. Tapi si harus iperdiateken eme uga kita ndalanken perentah e, silakoken nge alu tutus entah lang. Perintah ras pesan Tuhan labo perlu ipadangi/ ipersoalken, tapi idalanken. Tuhan pe labo ipersoalkenNa asakai ulih si ipepulung arah talenta si enggo iberekenNa man banta. Ija si lit ngaloken 5 talenta, ras 2 talenta radu ras ndatken pujin ibas tuan e nari nge. Engkai erkiteken ia tutus ibas ndahiken dahin si ibereken man bana. Memang labo kerina bali buena si aloken ibas Dibata nari, subuk ibas pemeteh, jabaten, pendahin, ulih pendahin rsd, tapi selaku anak-anak Dibata ije kita ituntut lako tutus ras setia ibas ndalanken kai si enggo isehkenNa e. Emaka seh kel nembehna ate Tuan ndai nandangi kalak si la tutus ibas makeken si enggo iberena ndube, engkai erkiteken ia pemalas janah nggit ndaram-ndarami alasen erkiteken perbahenenna si la ertanggungjabab. Jadi arah perumpamaan enda kita iajuk guna gelah tetap alu tutus ibas ndahiken kai si enggo isehken Tuhan man banta, gelah asum reh pagi Tuhan e ngulihi malem ateNa ngidah perbahanenta si mehuli ras ngena ateNa.

Aplikasi

Asum kita nggeluh denga ras lit gegehta dingen lit ibereken Dibata pemereNa man banta marilah sidalanken, sidahiken e alu tutus ras setia. Teklah Dibata mereken e man banta enggo sentudu ras gegeh kengasupen si lit ibas dirita, emaka labo perlu si idoi Tuhan alu kurang mbue siakap, ntah pe sikataken Tuhan e la adil, la bujur pada hal kita sendiri nge si la bujur dingen perkisat. Labo lit dahin si lebih kel beratna, ntah pe si terlalu gampang idahiken guna kemulian Tuhan. Perbahanen si ilakoken alu dem tanggungjabab ras tutus eme merupaken persembahen si nggeluh si ngena ate Tuhan. Kita selaku anak-anak Dibata, si enggo itebus Tuhan Yesus labo kalak si perkisat, tapi kalak si tutus ndalanken kai si isuruhNa.

Selaku serayan Tuhan, pengurus perpulungen, pengurus kategorial, rikut ras kerina ngawan ni perpulungen, ituntut kita guna ndalanken dahin si enggo isehken Tuhan alu tutus dingen alu dem tanggungjabab. Gejapkenlah maka dahin e dahin Tuhan, labo dahinta, adi dahinta banci ate-ateta, tapi dahin Tuhan la banci ate-ateta, harus sipertanggungjababken man Tuhan e pagin.

Kebaktin Pekan Penatalayanenta wari/berngi pe V ken 2022 enda iajuk kita selaku kalak si tek man TUHAN, tutus ibas ndahiken dahin kai si enggo isehken Tuhan man banta. Ibas invocation isingetken:  Mula-mulana ijadiken Dibata langit ras doni (Kejadin 1:1). Tangkas maka mula mulana pe Dibatanta tutus erdahin nandangi kerina si nasa lit ibabo doni enda guna kiniulin tinepaNa. Arah ketutusenNa e ka me maka kita pe isuruh lako Tutus I Bas Ngelai. Emaka kita selaku kalak si enggo itebusNa eme isuruh lako ngelai. Ise pe la erpendobahen. Ibas pengogenta Kejadin 41:46-49 isingetken uga Yusuf alu tutus ras ertanggungjabab ibas ndahiken dahin si iampeken man bana. Menai kin arah dahin si kitikna ipercayaken man bana seh kubas dahin si mbelin pe, tutus kel atena ndahikenca, teridah maka la sia sia si idahikenna e erkiteken Tuhan. Teklah maka kalak si tutus ibas ngelai ipasu-pasu Tuhan kap. Emaka kai pe si bahanndu, dahikenlah e alu tutus, tempa-tempa kam erdahin guna Tuhan,labo guna manusia (Kolose 3:23); Dahikenlah dahinndu alu meriah ukur. Anggaplah kam erdahin guna Tuhan, labo guna manusia (Efesus 6:7).

Pdt. Antonius Tarigan, S.Th