Bimbingen Sermon Kotbah Minggu Tanggal 8 Mei 2022 (Minggu Jubilate : Ersuraklah),Enterem Kalak Si Tek Man Tuhan,Bimbingen Sermon Kotbah Minggu Tanggal 8 Mei 2022 (Minggu Jubilate : Ersuraklah)Bimbingen Sermon Kotbah Minggu Tanggal 8 Mei 2022 (Minggu Jubilate : Ersuraklah)Bimbingen Sermon Kotbah Minggu Tanggal 8 Mei 2022 (Minggu Jubilate : Ersuraklah)

Bimbingen Sermon Kotbah Minggu Tanggal 8 Mei 2022 (Minggu Jubilate : Ersuraklah)

Invocatio         : Nterem kal jelma ngikutken Jesus. Ije enterem kalak  si pinakiten ipepalemNa   (Matius 19 : 2).

Ogen               : 1 Raja-raja 17 : 17 – 24 (T)

Kotbah            : Perbahanen Rasul-rasul 9 : 36 – 43 (T)

Tema               : Enterem Kalak Si Tek Man Tuhan

Minggu enda igelari Minggu Jubilate ertina ersurak erkiteken penangtangen (pembebasen) si enggo ilakoken Tuhan Dibata ija tangtangna enda ikawitken (ihubungken) ras tahun pelimapuluhken si igelari tahun Jobel ija ibas tahun e itetapken Tuhan ibas bangsa Israel maka kerina erta, taneh ras jelma si ndube idayaken, ibas paksa sie ibebasken emaka mulihken man empuna si gelgel. Juma pe ibebasken alu la iperjumai kidekah sada tahun (Im. 25:8-17) gelahna juma e pe banci ngadi kentisik sekaligus ndatken pupuk kompos arah bulung-bulung ras dukut-dukut si macik-macik. Ibas konteksta gundari eme erkiteken penangtangen si enggo ilakoken Jesus Kristus arah kiniseran ras kematenNa siperingeti kita ibas Jumat Si Mbelin ras Paskah lako nangtangi manusia perdosa ibas iketen ras ukumen dosa nari.

Kata Dibata paksa enda mabai kita tole ngidah kai dalanna maka kita sebage kalak si erkiniteken e ersurak muji IA, eme erkiteken kai sienggo ilakoken Tuhan arah kuasaNa si mbelin si ncidahken keleng ate, perhatian ras penampatNa mulahi (nangtangi) manusia ibas perbebenna nari, ija e adi sinen ibas invocatio Matius 19:2 eme ibas penakit nari ija ikataken maka enterem kalak si lit i daerah Judea si idahi Jesus paksa e singikutken Jesus, enterem kalak si penakiten ipepalemNa si ertina erbage-bage jenis penakit ipepalem Jesus ibas paksa e. Kehadiren Jesus e maba penangtangen (pembebasen) ibas salah sada masalah si rusur ndenden (nderpa, ngkenai) manusia ras si ibiari manusia eme penakit sabab penakit e la saja maba kesusahen tapi pe banci maba kematen (bdk. 2 Sam. 12:16-19; Luk. 7:2). Invocatio enda mabai kita gelahna sebage kalak si erkiniteken, tetaplah siikutken Jesus Kristus dingen maba kerina “penakit” si ndenden, nderpa, ngguluti, ngelatihi, nuhsasi ibas geluhta subuk penakit daging kula, masalah, perbeben, kiniseran, tantangen, ras sidebanna ku IA.

Bagepe ibas ogen 1 Raja-raja 17:17-24 ituriken kerna perbeben si sangana ialaken sekalak diberu balu-balu ija anakna si kin sekalak ngenca rempet sakit janah penakitna e la tertambari bahkan reh dekahna reh kelekna mahanca dungna mate anakna e (ay. 17). Mberat perbeben diberu balu-balu enda erkiteken anakna pe sada ngenca (la kin pe sada ngenca anak ipupu,s adi anak kal si mate ningen e mberat nge); paksa e sangana kal perlego emaka muat nakan pe mesera terlebih kidekah enda la ka kin lit kadena pe (ay. 12). Tambahna, kematen anakna e tempa ngingetken ia kerna dosa-dosana si gelgel ilakokenna sabab paksa e lit pemahamen maka kerehen suruh-suruhen Dibata si ipahami sebage kalak si badia, mahanca iinget Dibata dosa sindube ilakoken sesekalak si jumpa ras suruh-suruhen Dibata e (ay. 18b). Janah iakap pe maka penakit si mekelek ntah kejadin si aneh sebage ukumen nangdangi dosa manusia (bdk. Jop 4:7-8; 8:3-4). Padahal ia enggo erpala-pala guna nghamati Tuhan arah nghamati Elia (ay. 12, 15). Emaka ceda kal atena rikut lit penyesalen engkailah maka Elia e reh ku rumahna (ay. 18a) sabab enggo rindih-indih perbeben sireh man bana. Nabi Elia pe ceda kal atena ngidah kejadin sinderpa diberu balu-balu e sabab kerehenna ku rumah diberu balu-balu si enggo nampati ia labo ngkurangi perbebenna tapi nambahi kiniseran simada rumah e (ay. 20). Enda ngingetken kita sebage kalak si erkiniteken gelahna ibas lit masalah, kiniseran, kejadin-kejadin si la bagi ukur, ula kal mis kita ndarami “kambing hitam” sebage sumber masalah e termasuk la nalahken Dibata erkiteken lenga sieteh hal-hal si mehuli i pudi sie si nangdangi jadi ras sinanami bas geluhta. Si aminken maka tep-tep kejadin lit hikmahna.

Ibas situasi si bage beratna pe, la bene kiniteken ras pengarapen nabi Elia man Tuhan. Tindaken siilakokenna ncidahken kinitekenna maka ibas Tuhan kerina kemungkinen lit denga (ay. 19, 21). Iamparkenna bana telu kali i babo anak e rikut ertoto ia man Tuhan mindo gelahna ipegeluh Tuhan mulihi anak e. Telu kali e nuduhken hal-hal sorgawi (Trinitatis ninta gundari) encidahken maka nabi Elia tuhu-tuhu tek maka Tuhan si ringan i Surga e erkuasa guna pegeluhken anak e mulihi. Isehken Tuhan pertoton Elia emaka nggeluh mulihi anak ndai. Jenari ibereken nabi Elia ia man nandena (ay. 22-23). Kejadin e lebih petangkas man diberu balu-balu e maka Dibata ngerana arah Elia (ay. 24) si mahanca reh tetapna ukurna lako ndalanken kai siikataken Elia sabab ibas Tuhan la lit si metahat asalken tek jenari ndalanken siisuruhNa. Kinitekenta man Tuhan mahanca la kita minter ngelabuh, kote dingen putus asa ibas situasi si uga pe beratna sabab tek kita ibas Tuhan la lit si metahat.

Kiniteken ras pengarapen maka ibas Tuhan kerina kemungkinen lit denga teridah pe arah kai siilakoken ajar-ajar si i Jope si megi berita maka Petrus sangana i Lida. Emaka amin pe ibas suasana ate mogogo erkiteken Tabita, sekalak si tek man Tuhan janah kinitekenna e erbuah ras teridah arah perbahanenna si mehuli rikut nampati kalak si musil e enggo mate (ay. 36-37), tapi arapen maka Jesus arah ajar-ajarNa banci ngelakoken mujizat lit denga. Em sababna maka mis isuruhna dua kalak ndahi Petrus ku Lida alu tenah gelah pedas-pedas ia reh ku Jope (ay. 38) erkiteken kejadin Petrus pepalem Eneas si enggo waluh tahun dekahna ampar ibas ingan medem erkiteken lumpuh i Lida, iarapken kalak enda jadi pe man Tabita arah Petrus.

Bage ialoken Petrus tenah e, minter ia berkat ras kalak ndai ku Jope.  Ibas ruangen si i datas, eme ruangen ibas atap si rata (sotoh) ingan mait Tabita iamparken enggo pulung kerina kalak si enggo mbalu ngkeleweti Petrus janahn tangis dingen ncidahken uis ras baju si enggo ibahan Tabita asum ia nggeluh denga (ay. 39) tanda kinijingkaten ras kiniulin Tabita gelgel e. Kepulungen ajar-ajar ras diberu balu-balu e ncidahken persadanna si mehuli sebage ajar-ajar Jesus guna sitatang-tatangen ras sikeleng-kelengen. Kerehen perpulungen e jadi pengapul keluarga siitadingken Tabita bagepe man bana kerina.

Petrus nuruh kerina kalak ndarat ibas ruangen e nari sabab Petrus ersura-sura gelahna  banci ia fokus nungtungken isi pusuhna man Tuhan rikut la atena ncidah-cidahken kuasa Tuhan si lit bas ia i lebe-lebe jelma si enterem sabab labo dirina si perlu ipujiken tapi Tuhan Dibata. Pertoton Petrus isehken Tuhan mahanca medak mulihi mata Tabita rikut nggeluh mulihi. Kenca sie maka idilo Petrus kerina kalak si tek ras diberu balu-balu si paksa e pulung ibas rumah e guna ngendesken Tabita man bana. Berita kerna sie mbar ku belang-belang Jope mahanca enterem kalak tek man Tuhan. Pendahin Kesah Si Badia arah ajar-ajar e tole pebetehken maka Jesus Kristus e tuhu-tuhu Dibata, Juruselamat si mereken penangtangen man manusia. Piga-piga wari nari Petrus i Jope guna petangkas tole Kata Dibata bagepe pegegehi kiniteken perpulungen e (ay. 40-41).

Bagem arah tema Enterem Kalak Si Tek Man Tuhan, ibabai kita tole gelahna sebage kalak si erkiniteken e, tetaplah si ikutken Tuhan Jesus segedang-gedang geluhta. Bagi diberu balu-balu i Sarfat ras Tabita i Jope, tanda ras buah kinitekenta e sicidahken pe arah sipakeken ras sibagiken si lit bas kita e ku kalak si deban gelah si lit bas kita e ernanam man kalak sidebanna. Kehadirenta ija ras katawari pe bali min bagi nabi Elia, Petrus, ajar-ajar ras diberu balu-balu i Jope eme mpegegehi kiniteken temanta si enggo erkiniteken ras peturah kiniteken man si lenga erkiniteken. Ibas si ugapana pe la kita pernah leja (medu, bosan) nungtungken kecibal geluhta man Tuhan arah pertotonta sabab tek kita, pasti isampatiNa alu cara ras waktuNa. Mberat gia si man baban e, menahang nge siakap adi ras Tuhan kita mabasa.