Bahan Sermon Perpulungen Jabu-Jabu Tanggal 08 – 14 Mei 2022,Kebujurenlah Si Ngkawali Kita,(Masmur 25 : 21)

Bahan Sermon Perpulungen Jabu-Jabu Tanggal 08 – 14 Mei 2022

(Nilai Hidup Dalam GBP : Jujur)

Ogen               : Masmur 25 : 21

Tema               : Kebujurenlah Si Ngkawali Kita

Salah sada perayaken nilai hidup perpulungen GBKP si tersena ibas Garis-garis Besar Pelayanen (GBP) eme jujur. Ibas KBBI, jujur ertina (1). Lurus hati, tidak berbohong (misalnya dengan berkata apa adanya); (2). Tidak curang (misalnya dalam permainan, dengan mengikuti aturan yang berlaku); (3). Tulus, ikhlas. Emaka jujur e mengacu kubas aspek karakter, moral ras erkonotasi atribut positip dingen berbudi luhur erkiteken ibassa la lit kebohongen, penipuan, nutup-nutupi, erpura-pura gelah teridah mejile padahal situhuna murde. Perayaken jadi kalak si jujur (bujur) enda la banci lang sabab sebage anak-anak Dibata siiigelari kalak Kristen e kita arus mereken usihen ibas perukuren, pengerana ras perbahanen, ija ibas sada wari kita ndalani kegeluhenta,  lit nge kemungkinenna kita la jujur (bujur) subuk ibas pengerana (erbual); ibas pusuh perukuren (la tulus, la iklas, la lurus hati); ibas perbahanen (curang).

Masalah siihadapi pemasmur eme Daud paksa e eme geluhna ibiari dosa ras kesalahen siibahanna tupung ia nguda denga (ay. 7). Enda mahanca la ia teneng subuk erkiteken mbiar iolok-olok, itokoh-tokohi kalak (i bully ninta gundari enda) bagepe iukum Tuhan. Gelahna masa laluna si la mehuli  e la lalap ngguluti ibas geluhna, emaka iubahna me cara, sikap ras perilaku geluhna. Emaka nina ibas ogenta enda ibas Bahasa Indonesia, “Ketulusan dan kejujuran kiranya mengawal aku, sebab aku menanti-nantikan Engkau” ertina Daud la nggit ndarami dalan ndatken penampat, keselamaten si deban si ertentangen ras Tuhan erkiteken man bana erpalasken kinitekenna, la lit penampat sideban si terulin asangken Tuhan. Pengarapen ras pengendesen kalak si erkiniteken man Tuhan, ndigan pe la mengecewaken.

Ibas ia nimai penampat Tuhan e, si arus ilakokenna eme ernalem man Tuhan alu konsekuensi (tanggung jawab, kewajiben, si arus ilakokenna) eme tulus ras jujur ngakui kerina kesalahenna man Tuhan Dibata gelahna ngaloken pengalemi dosa ibas Dibata nari. Pengakun dosa e senembas lebe enggo mahanca pusuh perukurenna teneng, dame sabab enggo ipulkakenna-iungkapkenna-ipedaratna ibas dirina nari. Raduken sie ia pe arus nggeluhken geluhna alu tulus (mehuli) ras jujur (bujur) tanda lanai nggit ngulihi lagu langkah kegeluhenna sigel-gel e. La ia nggit ikataken bagi nina kuan-kuan, “Jera la robah”. Adi jera, berarti nadingken kerina biak-biak, cara, sikap geluh si ndekah si la mehuli lako nggeluh nehken-ndalanken singena ate Tuhan eme nggeluh alu mehuli ras bujur. Alu bage kiniulin ras kebujuren e si ngkawali ia eme la ipeturahna segat ate, nembeh ate, rawa ibas manusia ras Dibata nari mahanca geluhna teneng, dame, mejuah-juah, senang.

Bagem kita pe nggeluhlah alu mehuli ras bujur (jujur) ibas kerina dampar geluhta gelahna e si ngkawali geluhta sabab ibas kita nggeluh mehuli ras bujur e la si peturah ras la si legi nembeh ate, mbuk-buk, emosi ras rawa kalak nangdangi kita. Alu bage teneng, dame, mejuah-juah, senang geluhta sabab la lit rananta (kata-kata, cakap, belas-belasta) bagepe perbahanenta (pengelako, perasat, tingkah laku) si mbiar-biari kita. Gia ibas kita nggeluh mehuli ras bujur e labo ka kerina kal kalak meriah iakapna ngalokenca erkiteken bagi ningen usur, bas nggeluh enda pasti lit nge “Judas Iskariotna”, tapi nembeh, mbuk-buk seh ciga gia sekali ate kalak ngenehen kita, e labo erkiteken kita la mehuli ras la bujur tapi erkiteken la kita nggit seri ras ia jadi kalak si lat-lat, la mehuli, la bujur. Tuhan Jesus bagepe ajar-ajar si pemena rikut kalak Kristen gel-gel nari kal nge nembeh ate anak-anak doni enda erkiteken igeluhkenna geluhna la seri ras cara, sikap bagepe perayaken anak-anak doni enda. Sada persinget nina, “Yang berbeda itu tidak selalu yang terbaik, tetapi yang terbaik itu selalu berbeda”. Berani tampil beda ibas si mehuli ras bujur eme kualitas geluh kalak Kristen termasuk perpulungen GBKP Si Malem enda. Mari terus rusaha ras erjuang guna nggeluh mehuli ras bujur.