BAHAN SERMON PEKAN KEBAKTIN PENATALAYANEN WARI IV (19 Januari 2022) , “Si Tatang-tatangen Selaku Aron Dibata” ( Keluaren 17:8-13 )

Invocatio : Marilah kita sisampat-sampaten gelah keke ukurta guna nehken keleng ate ras ndalanken si mehuli (Heb. 10:24)

Ogen        : 1 Korinti 12:4-11

Khotbah : Keluaren 17:8-13

Tema       : “Si Tatang-tatangen Selaku Aron Dibata”

1. KATA PERLEBE

Istilah aron eme sada konsep pola kerjasama ras tolong menolong ibas masyarakat Karo, subuk ibas ngadapi ancamen arah pihak sideban ntah pe ibas ndahiken sada pendahin. Istilah aron rehna arah kata sisaro—saron (artina saling membantu) sinidahiken arah sada kelompok si terdiri arah 6 seh 24 kalak. Mulana aron enda erdahin labo igalari alu sen tapi upahna eme gegeh, si tujunna eme saling nampati sada ras sidebanna, misalna paksa merdang, paksa rani, mbangun rumah, ras sidebanna. Istilah aron enda megati igelari petangkapen (pinjamm gegeh). Janah istilah aron enda ipake ibas tengah-tengah gereja, guna radu ras ngelai ibas peken anggur Tuhan. Ibas pekan kebaktin penatalayanen tahun 2022 enda kita iajuk guna sitatang-tatangen selaku aron Dibata sue ras temata ibas wari si sendah.

1. ISI
2. Invocatio (Heber 10:24)

Lalit sada pe si ngasup nggeluh sisada, tentuna kerina manusia perlu teman guna mereken penampat ras dukungen ibas geluhna. Lit waktuna kita perlu ipegegehi, sebalikna lit waktuna kita mpegegehi kalak sideban. Lalit manusia si serratus persen megegeh ras ngasup ngatasi persoalenna sisada. Emaka arah kata Dibata ibas Heber 10:24 enda ngingetken maka kita manusia si lemah si harus sisampat-sampaten ras saling menopang sada ras sidebanna.

1. Ogen (1 Korinti 12:4-11)

Perpulungen Korinti tupung e menilai maka pemere-pemere Kesah e sebage tanda kedewasaan rohani. Erbuena pemere Kesah e maka ertambahna kualitas kerohanianna (spritualitasna). Erkiteken sie maka terjadi persaingen (kompetisi) si la sehat. Masing-masing memandang maka dirina lebih rohani asangken kalak sideban. Emaka Rasul Paulus nuriken man perpulungne Korinti maka erbage-bage pemere Kesah tapi sada nge Kesah si merekenca e (ayat 4). Arah Kesah e, kalak si tek ikut membangun tubuh Kristus arah pelayannenna. Jadi, Kesah (karunia Roh) e ibereken guna kepentingen bersama, labo guna kepentingen pribadi (ayat 7). Kesah e ibereken guna membangun (sitatang-tatangen), labo guna memecah tubuh Kristus. Dibata mereken sada ntah lebih Kesah man kalak si tek guna mendukung pelayanenna. Masing-masing ibereken Dibata karunia si khusus guna ndalanken peranna sue ras rencana Dibata. Tinepa Dibata kap kita; ibas persadanta ras Kristus Jesus, ijadikenNa kita guna ndahiken dahin-dahin si mehuli si enggo leben irencanakenNa, gelah sidahiken e (Ep. 2:10).

1. Khotbah (Keluaren 17:8-13)

Kemenangen bangsa Israel ibas peperangen ngelawan bangsa Amalek enda cukup unik ras berbeda arah kemenangen bangsa Israel ngelawan bangsa-bangsa sideban. Perang enda merupaken perang si pemena siilakoken bangsa Israel kenca bangsa Israel ndarat ibas tanah Mesir nari. Josua isuruh Musa  mimpin bangsa Israel erperang ngelawan bangsa Amalek. Tentuna kerna strategi perang ibas mendan perang ipercayaken man Josua, sedangken Musa, Harun, ras Hur lawes ku datas uruk. I datas uruk Musa tedis janah iangkatna ciken siibereken Dibata ku datas. Adi iangkat Musa tanna ku datas, menang bangsa Israel, tapi adi ipesusurna tanna, bangsa Amalek si menang. Tupung latih iakap Musa, maka Harun ras Hur ngangkat duana tan Musa ngadi-ngadi ben e seh bangsa Israel menang ngelawan bangsa Amalek. Tan Musa si la ergerak (tetap terangkat ku datas) ncidahken penyerahen diri secara total man Dibata, sebage gambaren pertoton si la erngadi-ngadi man Dibata guna keselamaten bangsa Israel. Bageme Musa, Josua, Harun, Hur, ras pasuken Israel siikut erperang ndalanken peran ras fungsina masing-masing. Peperangen siilakoken Josua ras pasuken Israel itopang alu kuasa Dibata erkelangken Musa, janah isampati Harun ras Hur, alu ngangkat ciken Dibata sebage tanda permohonen gelah Dibata ncidahken kuasa-Na man bangsa Israel.

• APLIKASI

Kesuksesan sekalak jelma ibas mencapai sada-sada hal labo saja erkiteken sumber daya manusiana si mehuli, strategi si tepat, ntah pe perencanaan si cukup baik tapi ibalik sie kerina, kesuksesan e jadi erkiteken campur tan Tuhan ibas geluhna bagepe dukungen teman ras keluarga. Kerina kita pasti lit kekurangen ras kelebihennta. Ibas kekurangenta e, tentu kita perlu penampat temannta guna mendukung usaha ras pendahinta. Terlebih ibas tengah-tengah gereja, kerina kita idilo guna saling mendukung ibas ndahiken pelayanen e. Rasul Paulus menggambarken maka Gereja sebage kula ni Kristus, sada kula melala ringring (band. Roma 12:4-8). Adi sioge ibas tulisen Rasul Paulus kerna anggota tubuh labo saja ngerana soal tempat/posisi tapi lebih ku bas fungsina. Hal enda ngingetken kita maka kerina kalak si tek ndatken ingan si khusus ibas tubuh Kristus. Kerina kita ndatken fungsi si khusus ibas tubuh Kristus. Alu bage, lalit sada pe kita si ersikap pasif guna muat bagin ibas dahin-dahin gereja. Kerina kita muat bagin sue ras pemere si ibereken Dibata man banta. Pakekenlah kerina pemere Dibata man banta guna kemuliaan Dibata.

Pdt. Lia Diyanti br. Ginting, S.Th

(GBKP Rg. Kuta Tengah)