Bahan sermon pekan doa berngi ke 2, Ertoto ras Pengakun ( Roma 10:9-10 )

Bahan sermon pekan doa berngi ke 2

Invocatio : “Janah ngakuken maka Jesus Kristus e tuhu-tuhu Tuhan, guna kemulian Bapa. ” (Pil 2:11)

Ogen       : Roma 10:9-10

Tema      : Ertoto ras Pengakun

Teptep jelma tentu pernah ertoto ibas geluhna. Pertotonna e banci saja pertoton mindo penampat, mindo pengalemi dosa, mindo pasu-pasu, mindo kesehatan, ras erbage-bage hal sideban. Megati kerina e silakoken secara pribadi, subuk ibas pusuh bagepe ibas ingan-ingan si tertentu. Tapi megati kel ibas jelma sinterem e, la ka kerina nggit ras pang maba pertoton. Lit tempa kebiaren adi la kenca sikap pertoton e. Mbiar ipandangi kalak sideban. Bagepe lit ka nggiten ia ertoto bas jelma sinterem, tapi bas rumah lang erkiteken la idah kalak. Tentu enda sada pengangkan si la payo ibas erkiniteken. Sebab ertoto eme cara ngerana ntah pe erkomunikasi ras Dibata. E maka labo berarti kata-kata simehuli tandana pertoton e mehuli. Labo ka pertoton si mejile kata-kata na enggo pasti idengkehken Tuhan. Sabab si terpenting ibas pertoton eme isi pusuh kalak si nehken pertoton e rikut ras pengakunnna kerna Jesus kap Tuhan si erkuasa bas geluhna . Pusuh si meciho ras pengakun nggambarken isi pertoton si tuhu-tuhu kempak Dibata. Emaka ibas pekan doanta berngi sipeduaken enda ibereken Tuhan man banta sada pengangkan kerna ertoto ras pengakun.

Lit perpulungen pernah ngataken bahwa, ibas ertoto e labo perlu kel ibelasken, sebab ope sibelasken pe enggo leben ieteh Tuhan kai si jadi pemindonta. Tapi rikutken pengogenta wari si sendah ipersingeti kita gelah ertoto kita labo bas pusuh saja, tapi arus ibelasken arah babah. Sebab nina ibas pengogenta e, adi ngaku kam alu babah ndu Jesus kap Tuhan janah tek kam ibas pusuhndu maka Jesus enggo ipekeke ibas simate nari, maka terkelin kam. Enda me siituriken Rasul Paulus man perpulungen i Roma. Bage ka nge ibas ertoto, arus nge iakuken arah babahta, kai si lit ibas pusuhta. Labo banci ibas pusuh ngenca ibelasken. Memang ieteh Tuhan kai si lit ibas pusuhta, ietehNa kai si jadi pemindon ras pengarapenta. Tapi, perlu ka nge pengakun e kerna kai si ateta ibahan Dibata entah pe ibere Tuhan man banta. Contohna, sanga Jesus pepalem kalak sakit, reh ia ku Jesus. Emaka sungkun Jesus man bana, “Kai atendu Ku bahan man bandu? ” ijenda labo la ieteh Jesus kai ate si sakit e. Tapi perlu iakap Jesus, ia ngakuken arah babahna kai si jadi sura-surana. Enda nuduhken maka perlu kel mbelasken kata.

Pusuh ras pengakun eme dua hal si la banci lang, arus lit ibas ertoto. Ertoto arah pusuh dingen lit pengakun arah babah. Enda me si arus ilakoken kita, ula min pemindon entah sura-suranta e sirenungken saja ibas pusuhta, tapi belasken lah ibas pertotonta. Alu bage pertoton alu dem kiniteken, idengkehken Tuhan ras ngena ateNa. Emaka tetapkanlah ukurta ertoto man Dibata dingen saksikanlah pengakunta maka kempak Jesus kap si sehken kerina pertotonta e. Amin.