BAHAN SERMON KHOTBAH MINGGU KLASIS MEDAN NAMORAMBE 16 JANUARI 2022 (EPIPHANIAS II) , Kiniulin Dibata Tangkas I Bas TinepaNa ( Masmur 36:6-11)

Invocatio         : Kenca bage itatap Dibata janah idahNa maka kerina si enggo ijadikenNa tuhu- tuhu Mehuli (Kej. 1:31a)

Ogen               : 1 Korinti 12:1-11 (T)

Kotbah            : Masmur 36:6-11 (R)

Tema               : Kiniulin Dibata Tangkas I Bas TinepaNa

PERLEBE

Biasana lit sada kepuasen ibas kita nggo ndungi sada pendahin, adi pendahin hasilna mehuli bagi siarapken kita. Emaka lit rusur ibahan perencanaan ntah mungkin desain sope denga dahin e ibenaken. Misalna kalak siatena mbangun rumah tentu perlu lit perencanaan uga mode rumah, ntah iundang arsitek guna nentuken mode rumah e, atau misalna adi kalak perjuma sope denga nuanken inehen lebe guna posisi ras kontur taneh, sebab bagi nina kuan-kuan mandangi roka dung peranin labo nari lit ertina. Tentu adi pernehen kita ku doni enda, kerina si itepa Dibata e lit kerina manfaat ras saling terkait sada ras sidebanna, saja kita manusia lenga kel sieteh terdauhen kai kegunaan masing-masing sitepa Dibata e baik mulai sikitikna kel seh ku simbelinna. Dibata enggo nepa doni enda seh maka jadi me kerina isi doni enda mehuli. Gambaran kiniulin Dibata, Di bage kin tuhu mehulina tinepa Dibata, kai nge ndia si banci ilakoken kita sebage tanda kita selaku sekalak si tek man Dibata?

PEMBAHASEN TEKS

Kejadin 1:31 si jadi bahan invocatiota emekap kerna Dibata nepa doni enda ras kerina isina alu mehuli bagepe dem kiniraturen, Wycliffe ibas tafsirenna kerna kitab kejadin ras khusus ayat 31 nulisken “Sungguh amat baik (tôb meõd). Ketika Tuhan memperhatikan hasil lengkap dari tindakan penciptaan-Nya, Dia menunjukkan rasa sangat senang dan sangat puas. Segala sesuatu di alam semesta ini, dari bintang yang paling besar hingga helai rumput yang terkecil, mendatangkan sukacita bagi-Nya. Semuanya merupakan sebuah paduan yang sangat indah. Di sini kepuasan sang Khalik dilukiskan dengan bahasa yang padat namun jelas.”.Adi si perdiateken doni enda bagepe ras isina kerina, maka siidah seh kel ulina kerina tinepa Dibata enda. Alu kataNa jine, itepa Dibata doni enda ras kerina isina. Adi sinen mulai ayat 1 kitab kajadin “Mula-mulana ijadiken Dibata langit ras doni. Doni lume denga, la lit tempasna…”(Kejadin 1:1-2). Kerina si enggo itepa Dibata i bas doni enda encidahken kemulianNa. Dari ketiadaan, kekosongan, dan ketiadaan bentuk, Allah mencipta, mengisi dan mengatur alam semesta ini. Banci si idah maka Dibata emekap sekalak Maestro Karya Seni, si ngidah maka kerina tinepa si enggo ijadikenNa tuhu-tuhu mehuli. Lit pitu kali Dibata nehken maka tinepa si mbaru, si enggo itepaNa e “tuhu-tuhu mehuli” (ayat 4, 10, 12, 18. 21, 25, 31).Adi Dibata saja pe enggo ngidah maka kerina tinepa si itepeNa e tuhu-tuhu mehuli, emaka kita manusia selaku tinepa Dibata e, arusna pe ngasup ngidah kiniulin ibas tinepa Dibata e seh maka banci sijagai alu mehuli tinepa Dibata e.

Si jadi bahan ogenta ibas kitab korinti enda nuriken kerna uga kuasa Dibata erdahin arah Kesah Si Badia. Kesah Dibata me simereken man kalak si tek erbage-bage kengasupen. Emaka nina Rasul Paulus erbage-bage pemere Kesah tapi sada nge kesah simerekenca. Erbage-bage dahin tapi sada Tuhan simere dahin e ras kengasupen khusus guna ndahikenca. Alu e Paulus nuriken man perpulungen i Korinti si konteks masyarakatna Majemuk paksa  si e, bahwa ibas kinierbagen talenta, kiniliten ras kengasupen ibas manusia tanda bahwa e kuasa Dibata ibas nepa doni ras manusia, Dibata dem alu kebayaken, bagi isi doni si itepa Dibata berbeda bentuk, fungsi rsd. Bage me pe Dibata nepa manusia alu erbage-bage kelebihen ras keahlian tentu tujunna guna ermulia Dibata, sebab kerina si lit e pemere Dibata arah penampat Kesah Si Badia, tentu adi nggo ituntun kesah si badia kita pasti ibas kinierbagen kengasupen ibas manusia ipergunaken guna kiniulin. Bahan Khotbahta ibas Masmur 36:6-11 Ungkapen kekagumen pemasmur Raja Daud kerna uga kin keleng ate Dibata si nggo sehkenNa man manusia, ayat 1 “O Tuhan Keleng ateNdu seh ku langit” ungkapen langit sebage ingan simeganjangna ras pemahamen ije me ingan Tuhan tading, ngataken bage gedangna keleng ate Dibata, tentu enda berdasar alu pengalamen hidup pemasmur si nggo ngejabken uga pendampat Dibata si nggo ialokenna. Keleng ate ras kesetiaan gambaren langit ras awang-awang, keleng ate ras kesetiaan duana biak Dibata si komplit, sebab keleng ate Dibata man manusia icidahken arah tetap setia Ia ngarak-ngarak kegeluhen manusia ras doni enda. Kebenaren ras kinibujuren Dibata igambarken meganjang desken deleng ras mbages desken lawit. Manusia perlu rasa aman ibas kegeluhenna, melala gia erta tapi la aman tentu labo lit ertina, ijenda daud nuriken bahwa rasa aman situhu-tuhu ibereken Dibata kita ringen iteruh kabengNa, bagi rubia-rubia si erkabeng si melindungi anakna iteruh kabengna. Isikapken Dibata keperlun manusia, besur kita ibahanNa, besur riba-iba ras sidat inemen ibas lauNa si malem e, kerna nakan ras inemen dua hal si menjadi kebutuhen pokok manusia e pe nggo icukupken Dibata man banta. Tentu alu ungkapen daud enda kerina nuriken bage me kegeluhenta iteruh keleng ate Dibata malem siakap nggeluh, kerina icukupkenna ras e tanda keleng ate ras janji setiaNa man banta. Tentu guna si ituntut man banta gelah kita pe setia man Tuhan.

PENGKENAINA

“Kiniulin Dibata Tangkas ibas TinepaNa”, enda me temanta ibas minggu enda.  Ibas Dibata enggo nepa doni enda ras kerina isina mehuli alu dem kiniraturen. Alu mehuli IA erdahin sue ras kai si enggo irancangkenNa . Alu ratur idahikenna sada-sadai dahin e. Enggo ipesikapNa bagepe enggo ijadikenna doni ras kerina isina alu mehuli. Manusia si enggo itepaNa e arus maka erdahin alu mehuli ibas encidahken kegeluhenna i doni enda. Alu bage lingkungennta banci terjaga alu mehuli bagepe banci meminimalisasi terjadinya kerusakan lingkungen. Selaku sekalak si tek man Tuhan, si enggo itepaNa alu tuhu-tuhu mehuli, emaka i bas tahun Gereja GBKP “Kreatif Merawat lingkungan” tahun 2022, si bengketi ka pelayanenta alu semangat si mbaru si rehna ibas Dibata nari. Ndahiken dahin tep-tep wari bagepe  pelayanen gereja alu dem kiniraturen, nggo ibereken Dibata kita erbage-bage kiningasupen ras kelebihen si pelain-lain mari sipergunaken enda guna ncidahken kratifitasta masing-masing terutama gelah terjaga lingkungenta (temanta manusia, alam sekitar) tetap mehuli. Kiniulin Dibata Tangkas ibas tinepaNa, berarti kiniulinNa teridah arah, karya/tindakan/perbuatan, tentu enda simenjadi penggerak  man banta tanda keleng ate, kiniulinta arus min teridah arah perbuatan, tindakenta si berdampak baik man sekitar, labo terjeng karya kata tapi sipaling penting karya nyata sibanci igejapekan kalak sideban ras doni enda.

Pdt. Jeri Karlo Tarigan, S.Th