BAHAN SERMON KHOTBAH MINGGU GBKP KLASIS MEDAN – NAMORAMBE 29 MEI 2022 , Pepayo Min Aku Tuhan ( Masmur 17:1-6 )

Invocatio          : Totoken maka cidahken Tuhan Dibatandu min man kami dalan si man dalanen bagepe                                        kai si arus idalanken kami (Jer. 42:3)

Ogen                : Johanes 5:1-9 (T)

Kotbah             : Masmur 17:1-6 (R)

Tema               : Pepayo Min Aku Tuhan

1. PERLEBE

Kinata kegeluhen manusia si enggo ndabuh ku bas dosa enda eme kerina ngenanami perbeben, masalah ibas kegeluhenna, labo lit manusia nggeluh si la lit perbeben ntah masalahna. Subuk masalah sosial, ekonomi, pinakit, jabu (anak si gutul, bapa pe gutul, nande si la bagi nande) kerina pasti engkenai manusia. Saja si jadi persoalen megati labo erkiteken mbelin kitikna perbeben sinihadapi kita, tapi uga sikapta ibas merespon perbeben e. Seba sierbanca kita lanai ngasup ngidah kelng ate Tuhan perban belinen rusur aru ate /khawatirta, ibas sada tulisen nina ibas bahasa Inggris kata kekhawatiren iperinci alu nina: “all your anxieties, all your worries, all your concerns, once and for all” (semua ketakutan, kecemasan, kegelisahan, ketidaktenangan, segala yang membebani pikiran, sekali untuk selamanya). Emaka mari mindo gegeh man Tuhan arah pertotonta alu pengarapen maka ibegikenNa pingko-pingkota.

1. PEMBAHASEN TEKS

Masmur 17  eme kap pertoton Daud si sangana lit ibas kiniseran, tupung ia lemah entah kote subuk perukuren bagepe daging kulana ituriken kerina man Tuhan arah pingko-pingkona. Ibas pertoton enda, pemasmur mindo gelah ibegiken dingen ialoi Tuhan min kerina pingko-pingkona. Anem gia manusia labo lit si la erdosa, tapi Daud erpengaku maka ia nggo erusaha guna nggeluh benar alu la nipu kalak arah perkataanna nari (ayat 1), nggeluh ia alu bujur (ayat 2) ras lalit sura-sura sijat ibas ia (ayat 3), arah kegeluhen Daud pang ia naksiken bahwa ia nggo nggeluh ibas dalan Tuhan, tentuna pengakun Daud enda ilandasi kegeluhen rohani si enggo idalanina, alu la ndahiken sijahat ras asa gegehna la ngikutken sura-sura sijahat, emaka tek kel ia idengkehken Tuhan totona. Sebab ibas pengakun Pemasmur Tuhan e Adil, beluh ia muat keputusen si tepat ras meteh kerina isi pusuh manusia. Tentu adi man manusia kita mindo perhatian kerna kai sienggo ibahan kita lenga banci tepat ras sue pertimbangenna sebab manusia terjeng ngenen arah tampilan luar saja, tapi adi Tuhan ngenen seh kupusuhta emaka payo keputusenNa man banta. Alu palas sie me maka Daud ertoto man Dibata man penampat sebab ietehna Tuhan e ngenca sibanci mereken penampat si payo.

Ogenta Kerna Yesus Pepalem Kalak si enggo sakit telu puluh waluh tahun dekahna. Ituriken maka i bas perdalanen Jesus seh IA i Jerusalem guna sada perayan kalak Jahudi. Paksa e posisina ideher kolam Betesda si i je nterem kalak pinakiten medem, pentang, cempang mate serapen. Kerina ia nimai paksa lau i kolam e erburak si imaknai dingen itekina maka malekat Tuhan si erbahanca kolam e erburak. Pengangkan dingen arapen e erbahan maka kerina si i je tertima jadi kalak si pemenana bengket ku kolam paksa lau erburak Ikut ia bas kalak si nterem e guna ndatken tambar paksa lau erburak.  Senembas aru ate kalak sisakit e sebab tupung erburak lau e, lalit teman ntah sima-sima sibanci namaken ia ku kolam Betesda, Pengarapenna terjeng man manusia ngenca, emaka tupung isungkun Yesus, atendu gelah malem min Pinakitndu? Kekeken, angkat amakndu jenari erdalanlah! Enda perentah si ikataken Jesus man kalak si sakit e. Tentuna enda sada perbahan si metahat kal ngelakokenca. Adi banci pe labo atena ndekah sakit. Adi ngasup nge ia, labo merhat bage kecibalna. Penungkunen Jesus, atendu kin gelah malem pinakitndu? Sada sisi enda arah logika pikiren manusia man kemamangen sabap la mungkin kalak sakit la merhat malem. Tentuna penungkunen Jesus,’menstimulus’ pengarapen si lit denga i bas pusuh sakit e. Banci saja enggo ngelabuh kal ia i bas pinakit si bage dekahna. Jabapen si sakit e labo ‘ue malem ateku’ tapi nuriken paksa-paksa si enggo lewat bas ingan dingen perjuangenna secara pribadi bagepe sekelewetna si la lit nampati ia. Ertina, perlu kal ia penampat i bas kelemahen si lit i bas ia, aru atena la lit si banci nampati ia. Tertima-tima kal ia gelah lit kalak si namaken ia ku bas kolam e, ngarapken perkuah ate. Jesus ngaloi ia labo njabab arah kai si iturikenna e, tapi nuruh ia keke dingen ngangkat amakna ras erdalan. Tentuna enda si metahat kal banci ilakoken sekalak si lumpuh. Banci saja perentah enda iakapna megombang. Tapi arah perentah Jesus e, ilakokenna maka ieteh ia enggo malem. Ertina patuh ia nandangi perentah Jesus, lit usahana dingen tek ia maka ia keke. Labo ijabapina Jesus nuriken pinakit dingen kinilangasupenna. Janah arah enda nuriken maka i bas pinakit ras kelemahenna paksa e, amin nggo ndekah ia sakit, lit denga semangat guna malem, la ia putus asa, Jesus reh maba kemalemen. Keke eme simbol, naluken kelemahen si lit, sedekah enda la banci keke tapi ipala-palai. Ngangkat amak ertina, amak eme ingan ampar, simbol kenyamanen, arus tadingken ingan kenyamanen e. Erdalan, nuriken la saja tedis tapi lit aksi si banci iidah dingen nerusken kegeluhen si arusna idalanina. Enda pe sejalan ras Invocatio ta nuriken kerna kalak sierpengarapen ertoto man Tuhan, pengarapen ibas kecibal nggeluh sipaksa ialaken bangsa Israel I motivasi Jeremeia gelah ula putus asa ras berdiam diri, tapi arus peturah semangat ras pengarapen alu ertoto gelah iajari Tuhan kita ku dalan si mehuli ras dalan pulah ibas kiniseran nari, ertina aplikasi ertoto erbuahken tindaken mehuli meteh peraten Tuhan guna kita

• APLIKASI

Megati manusia ibas ngalaken perbebenna entah masalah-masalah geluhna alu kelsehen, putus asa seh maka lit pe si enggo bene pengarapenna. Kelsehenna teridah ibas ia erlebuh dingen serko man Tuhan nina, “engkai maka aku singenanamisa Tuhan?”. Adi terjeng je denga nge si jadi kelsehenna langa bo jadi masalah simbelin kal, tapi dikune enggo seh ku bas meraguken keleng ate Tuhan dingen nalahken Tuhan ibas perbebenta jenari nadingken Tuhan (la nai tek nandangi Tuhan) enda merupaken puncak kelsehen manusia ibas perbebenna. Tapi pemasmur ibas kelsehenna pe tetap ia tek janah erpengarapen man Tuhan, maka ibegikenNa kap kerina pingko-pingkona, mperdiateken kita janah ngasuhi kita ibas kerina dampar geluhta. Tapi si e lebe harus ipalasi alu nggeluh bujur bagi pengakun pemasmur.  Jadi kalak kristen lit sada jaminen maka kita ipegegehi ngalaken kerina perbebenta arah kita erpengendes man Tuhan janah tek kita Tuhan nampati kita guna ndungi kerina masalahta. La nai kita erbebe sekalak kerna perbebenta alu ngandalken gegeh ras kemampunta tapi siendesken kerinana man Bapa si ni Surga. Pengakunta “Pepayo Min AKu Tuhan” I je sialoken perkuah ate ras lias ate gelah dat kita penampat i bas paksa si iperluken kita.

Pdt. Jeri  K Tarigan, S.Th