BAHAN SERMON KHOTBAH MINGGU, 27 MARET 2022 (PASSION V/ LETARE) , Meriahlah Atendu I bas Tuhan ( Mazmur 32:8-11 )

Invocatio        : Meriahlah Min Akapndu Katawari Pe Erkiteken Persadaanndu ras Tuhan. Sekali nari kukataken Meriahlah! ( Pilipi 4:4 )

Ogen               : Lukas 15:1-7

Khotbah         : Mazmur 32:8-11

Tema              : Meriahlah Atendu I bas Tuhan

I.KATA PERLEBE

Labo sada hal si berlebihen adi setiap manusia ersura ndatken keriahen ntah pe ermeriah ate ibas geluhna. Banci ikataken meriah ate eme sura-sura kerina jelma. Bahkan melala si menghalalkan segala cara gelah banci meriah atena. Meriah ateta adi berhasil ibas pendahin/usaha, bayak, sukses, sehat, jabu, anak-anak pe sikap  kerinana. Janah rusur ikaitken meriah ate adi seh bagi sinisuraken kita. Tapi melala si idah si terjadi rusur eme la bagi sinisuraken si terjadi. Uga banci kita ermeriah ate? Apaika ibas masa-masa si genduri enda, uga ningen ermeriah ate adi ekonomi erserana, pendahin pe kadang la menentu, anak-anak si nggo tamat sarjana mesera ndatken pendahin, anak-anak si nggo layak berumah tangga lenga jumpa jodoh, nande ras bapa tiap jumpa sigangen sora, rsdna. Tentu labo gampang ermeriah ate adi iperhadapken kita ibas keadaan si la bagi niarapken enda. Terlebih uga kita i ajuk lako tetap ermeriah ate ibas Tuhan (Thema) ibas memasuki Minggu Passion si pelimaken (Letare) enda. Letare ertina eme ermeriah ukur/bersukacita. Minggu si ngajuk kita lako tetap ermeriahate ibas Tuhan amin kai pe si terjadi ibas geluhta.

II.PENJELASEN TEKS

1.Invocatio
Rasul Paulus nulisken suratna man perpulungen i Pilipi tupung ia ibas Penjara. Paksa sie perpulungen melala ngaloken erbage-bage kiniseran. Emaka ibas suratna enda Rasul Paulus tetap ncidahken keriahen ukurna amin pe ia ibas penjara. Sebab labo situasi, keadaan (ibas penjara: tempat si terbatas erbahanca la ia banci beritaken Berita si meriah alu jumpa ras perpulungenna secara tatap muka, tapi sie kerina la jadi penghambat man bana ibas nehken berita si meriah. Kertas ras pulpen jadi alat penampat man Rasul Paulus ibas nehken berita si meriah man perpulungen), seh sura-sura ntah lang si erbahanca ia ermeriah ukur tapi erkiteken kiniersadanna ras Tuhan nge si erbahanca meriah ukurna.

2.Ogen
           Bahan ogen nuriken kerna perumpamaan si ibahan Yesus sanga Ia ngajar. Arah perumpamaan enda ituriken maka paksa sie lit pemahaman si salah kerna pengelompoken manusia. Kelompok si pertama eme pengalo cuke ras kalak perdosa, si melala kalak rate segat man bana sebab ate-atena erbahan pajak. Kelompok si peduaken eme kalak Parisi ras guru-guru agama si erpengakap maka ia eme kalak si benar dingen badia sebab alu benar dingen payo cara ia ndalanken hukum taurat. Paksa sie Yesus ngajar ras enterem kalak si megiken pengajarenNa, termasuk kalak si perdosa. Yesus ngalo-ngalosa janah man pe Ia ras. Hal enda mpeturah jungut jungut (segat ate) ibas kalak Parisi ras guru-guru agama. Tapi arah perumpamaan si ibahan Yesus ncidahken maka sekalak permakan erkeleng ate nandangi kerina biri-birina. Emaka amin sadalah gia si bene tentu idaramina seh dat. Amin pe si bene e eme kalak si perdosa, si ianggap sebagai orang-orang ‘kelas dua’, si la ndalanken hukum taurat misalna, si ikucilken, si la pernah iperdiateken rsdna. Tapi sebagai Permakan si tuhu-tuhu, Tuhan tetap erdiate ras rate keleng man bana. I daramiNa kerina manusia termasuk manusia si perdosa ndai, si enggo bene ndai, i daramiNa seh banci mulihken kempak Ia lako ndatken keriahen ukur erkiteken ia lit ibas Tuhan.

3. Khotbah

        Masmur 32 enda eme pertoton pengataken bujur pemasmur erkiteken Dibata enggo megiken pemindonna ras mulahi ia ibas kiniseran nari. Ituriken pe uga riahna ukur Daud ibas dosa-dosana enggo ialemi Dibata seh maka tuhu-tuhu malem atena meriah pe ukurna. Igejapkenna pe maka Dibata engkawali kegeluhen kalak si ernalem man baNa. Janah uga ka kita merespon perbahanen Dibata e. Emaka piga –piga hal ituriken ijenda ema : Ay. 8 : sangap kel kalak si ialemi Dibata dosana sebab Tuhan nuduhken dalan si man dalanenna, bahkan mata Tuhan tetap tertuju man bana, Tuhan tetap mperdiateken ia, Tuhan si ngajari ia. Adi Tuhan si nuduhken dalan si man dalanen, tentu lanai papak manusia e, adi Tuhan si nagajarisa tentu jadi kalak si pentar manusia e, adi Tuhan si mperdiaten ia tentu meriahlah ukurna Ay. 9 : ola bali ras kuda si la rukur, si arus iatur alu sangam ras tinali, sebab adi la bage la ia nggit patuh. Enda me gambaren manusia si mekeng, mesera man katanken, katana ngenca si iakapna si paling benar, mesera arih-arih ras, sura-surana ngenca atena idalanken. Sebage kalak si enggo ialemi Dibata dosan la arusna ngelakoken si bage rupana, lanai ia teridah sebagai kalak si tek
man Tuhan. Kita ula bage. Ay. 10 : kalak si ernalem man Tuhan ikelewetiNa alu keleng ateNa si tetap.
Enda mesera ndatkenca ibas doni enda, sebab manusia mobah-obah usur pusuh ras keleng atena, tapi Tuhan e tetap keleng ateNa man kalak si ernalem man baNa. Tapi kalak jahat mbue kiniseran si ihadapina. Ertina kalak si la ibasTuhan labo ngasup ermeriah ukur, kalak si la ibas Tuhan jadi manusia si jahat ia seh maka melala kiniseran si ihadapina si erbahanca pusuhna lanai tenang, geluhna er aru ate, mbiar katawari paksa pe sebab lalit inganna ernalem, lalit si mediate man bana. Kalak si ernalem man Tuhan pe ngenanami kiniseran kang
nge tapi lit inganna ernalem eme Tuhan, emaka tetap ia ersada ras Tuhan. Ay. 11 : sekali nari sangap kel kegeluhen kalak si bujur sebab meriah atena ibas ia ersada ibas Tuhan. Ngasup ia ermeriah ukur sebab i ikutkena Tuhan. Sampur keriahenna erkiteken kiniersadanna ibas Tuhan. Seh maka labo situasi/keadaan si erbahanca meriah atena tapi ibas ia ersada ras Tuhan ulu keriahen e.

III. APLIKASI

1. Kiniersadaan ras Tuhan nge si erbahanca kita kalak si tek ngasup ermeriah ate. Payo, melala kiniseran sinihadapi kita, tapi ola min sempat kiniseran/perbeben e erbahanca kita lanai ersada ras Tuhan. Sebab kalak si ersada ras Tuhan ibereken Tuhan gegeh seh maka ngasup ia ngalaken erbage-bage kiniseran. Bagi lagu rohani : Tuhan tak pernah janji langit selalu biru, tetapi Dia berjanji selalu menyertai. Tuhan tak pernah janji jalan selalu rata, tetapi Dia berjanji berikan kekuatan. Jangan pernah menyerah, jangan berputus asa, mujizat Tuhan nyata saat hati menyembah. Jangan pernah menyerah, jangan berputus asa, mujizat Tuhan ada bagi yang setia dan percaya.
   2. Tuhan tetap erkeleng ate man kalak si ‘bene’. Ertina Tuhan tetap mediate man kalak si terlupaken, lanai lit si mperdiatekenca erkiteken lebel orang-orang perdosa contohna si lanai pernah ku gereja, kalak si menolak rumahna ingan PJJ, kalak si la pernah muat bagin ibas pelayanan Gereja, ntah pe kalak si ibas penjara, narkoban, agen togel diberu-diberu perdenggal, rsdna. Tuhan tetap ngarapken ia kerina mulihken man Tuhan. Gereja seharusna pe merasa terpanggil untuk melakukan pelayanan man bana. Tuhan saja peduli man kalak si bene masak gereja tidak
2. la persoalen uga gia ban kalak lebel kerna kegeluhennta, sebab labo e si erbahansa kita la ermeriah ukur. Sebab si inget maka kita enda meherga kel I adep-adepen Dibata. Kita enggo I tebus alu meherga arah anakna Yesus Kristus. Kita enda si kerajangenna, tentu enda si erbahansa kita ermeriah ukur, seri bagi nina temata meriahlah atendu ibas Tuhan.
3. Bagi si ikataken Penafsir Kitab Masmur, Marie Claire Barth & BA Pareira : Tidak ada kebahagiaan yang lebih besar daripada kebahagiaan orang yang merasa di mengerti, di terima dan dicintai kembali. Tidak ada kebahagiaan yang lebih mendalam daripada kebahagiaan orang yang mengalami bahwa Allah itu adalah kasih, bahwa Dia selalu mau mengampuni semua orang yang sungguh-sungguh menyesali dosa-dosanya.

BAHAN PJJ 27 MARET- 02 APRIL 2022 ROMA 12:14-21

MERIAH RAS KERINA KALAK ( KOMUNIKASI )

Dibata njadiken  Manuisa e me  Makhluk Rohani ras Sosial. Ertina ibas ia berinteraksi ras kalak si deban tentuna butuh komunikasi, rikut pe ketika ia berinteraksi ras Dibata e pe alu komunikasi. Tapi mbue kang masalah si jadi ibas tengah kegeluhen enda erkiteken komunikasi si la mehuli. Hal enda jadi erkiteken kerina kalak memiliki presepsi sekalak-sekalak, cara rukur si berbeda, rikut pe ego masing-masing. Persoalen pe banci jadi ibas lingkungen kegeluhennta erkiteken salah ngaloken pesan ibas erkomunikasi. E maka peranan komunikasi ibas hubungenta ibas tengah kegeluhenta miliki cukup peran si mbelin. Secara khusus ibas KBBI komunikasi ertina eme pengiriman dan penerimaan pesan atau berita antara dua orang atau lebih sehinggha pesan yang dimaksud dapat di pahami. Arah e jelas maka kai  si peseh ras kai si alakoken bas komunikasi e harus jelas gelah la salah peresepsi atau penerimaan  Bage pe  ibas Tema PJJta wari enda e me meriah ras kerina kalak. Tentuna meriha ras kerina kalak e labo persoalen si menukah. Sebab kita enda pada dasarna memiliki sifat, karakter keinginan si berbeda. Tapi amin pe bage merih ras kerina kalak enda danci terjadi adi kita la memntingken ego rikut keinginanta masing. Rikut pe adi lit sura-surata pesehleh alu cara si payo, pengerana si payo, nada si payo rikut pe gesture (mata, mimik ayo) tubuh si payo gelah pesan dingen sura-sura si peseh kita e danci terterima alu benar.

Emaka ibas PJJ sekalenda Rasul paulus ibas kitab Roma 12:14-21 mereken kata persinget gelah ngasup min kita mendahuluken orang lain. E maka nina

1. Pasu pasu kalak si pesega-sega kam, ola sumpahi (biak manuisa adi I sakiti biasana danci secara refeleks mis erbalas tapi alu tegas Paulus mengingetken gelah ola numpahi tapi masu-masu tentu hal enda danci jadi adi ersada kita ras Dibata )
2. Ermeriah ukur ras kalak si ermeriah ukur, tangis ras kalak tangis (mampu menempatken diri)
3. Emperdiakteken keperlun kalak si deban, ola beluhen siakap kita (ola kita meganjang ukur seh maka belinen tah pentingen si akap kita asang kalak seh maka kita ateta rusur I pelebeken, tentuna kita harus belajar melihat orang lain )
4. la mbalas kejahaten alu kejahaten, tapi erbahan si mehuli rikut pengakap jelma si enterem (erbahan si mehuli la banci terjeng kita ngenca siakap mehuli, sebab danci siakap mehuli akap kalak la bage janah ibas kita erbahan si mehuli e pe danci jadi kesaksian man kalak sideban)
5. Asa ngasup ermeriah ukur ras kerina kalak
6. ola erbalas tapi bere dalan Dibata erbalas (pembalasan e hak Dibata)
7. Bere man dingen minem imbagnta

8 . Taluken si jahat alu erbahan si mehuli

Tentuna kai si peseh Paulus enda labo hal simenukah karna kita lebih banyak memikirken kalak si deban. Tapi hal enda jadi tanggung jawabta sebab sue bagi tersinget ibas ayat sebelumna maka kita la danci seri ras doni enda, tapi bereken maka perukurenta I pelimbarui Dibata. Tentuna adi ukur si enggo I pelimbarui Kesah Sibadia  mahan banna kai si kerjaken kita e tentu si ngena ate Dibata salah sadana tetap meriah ras kerina kalak amin pe mungkin ia pernah menyakiti tah la sepaham ras kita. tapi kita selalu berusaha arah membangun komunikasi simehuli ras kerina kalak.  Emaka amin ia berbeda ras kita lanai jadi persoalen sebab kita memandang ia teman dingen tinepa Dibata seri bagi kita. lanai ukurta si pejang-jang tapi sibere maka Dibata erkuasa ibas tengah kegeluhenta. E maka terus belajar menempatken diri segelah banci kita meriah ras kerina kalak. Dibata si pengasup kita arah pendahin Kesah Sibadia.

Pdt. Lestari Br Tarigan

GBKP Namo Bintang