BAHAN SERMON KHOTBAH MINGGU 24 APRIL 2022 KLASIS MEDAN NAMORAMBE QUASIMODOGENETI : BAGI ANAK SI MBARU TUBUH , SORA TUHAN ERLEBUH ( Perbahanen Rasul-rasul 9 : 1 6 )

Invocatio        : Kalak simuniken dosana la banci sangap, kalak singakuken  dingen                                                      nadingken dosana, ialemi Dibata kap  (Kuan-kuanen 28: 13)

Ogen               : Masmur 37 : 34 – 40 (Anthiponal)

Kotbha           : Perbahanen Rasul-rasul 9 : 1  6 (Tunggal)

Tema              : SORA TUHAN ERLEBUH.

PERLEBE

Tuhan erlebuh Man banta guna banci IA mpeseh kataNa ras iutusna ku tengah-tengah doni enda. Bagi Tuhan Yesus taat ndalanken persuruhen BapaNa bage ka pe kita, situhuna ibas kegeluhenta enda pe kita ilebuh Tuhan guna jadi perberita kerna kata Dibata subuk ibas pendahinta masing-masing baik kita si jadi PNS, Pegawai swasta, Pengusaha, ibu rumah tangga ras sidebanna.  Tuhan Erlebuh man banta guna ndahiken kataNa, Uga nge jawabenta ? si ue ken nge entah lang, banci erkiteken mbiar kita ngalaken tantangen ibas pendilona e sierbanca la sipakeken waktu ras kesempaten silit ibas kita. Entah lenga kita siap ban beratna tugas sinialoken kita e. Tentuna ibas renungenta enda, Tuhan ngarapken kita ngaloi ibas pusuhta ibas IA erlebuh ras pengutusenNa e segelah tetap ermulia Ia ibas doni enda.

PENJELASEN TEKS

Bahan khotbah minggu enda ibas kitab perbahanen rasul-rasul nuriken kerna proses kegeluhen Paulus. Ope denga jera ia gelarna Saul, ia tubuh i Tarsus, ia kalak si erpendidiken meganjang. Ibas terjemahen bahasa Indonesia, perikop enda ibenaken alu kata “Sementara itu”.Kata “itu” mau menunjukkan sesuatu kejadian lainnya. Kata “sementara itu” lit keterkaitenna ras kejadin sebelumna eme, terjadi gerakan perlawanan si luar biasa nandangi kalak Kristen singikutken Yesus. Terlebih kenca Yesus nangkih ku Surga , Nusur Kesah si Badia ras terbentukna komunitas Jemaat mula-mula iAntiokhia. Arah sada sisi, semangat gerakan penginjilan sangat hebat tapi bas sisi si deban gerakan menyiksa pengikut Kristus pe luarbiasa i teruh kepemimpinen Saul. Istepanus pe mate ibunuh, ibenteri masyarakat, janah Saul pe erpengakap maka Istepanus patut ibunuh  (Perb 7,8). Saja ngenca bas situasi sisangat mencekam ras kejam enda lit sekalak sida-sida, menteri, pembesar ras kepala perbendaharaan Sri Kandake, Ratu negri Etiopia atena ku Yerusalem ersembah ku rumah pertoton. I tengah perdalanenna, isuruh Dibata Pilipus njumpai ras ngajari ia, janah kedungenna iperidiken ia erkiteken tek ia maka Yesus Kristus e Anak Dibata kap (Perb.Rsl 8:37). Jadi arah sada sisi masyarakat membantai kalak Kristen, tapi bas sisi si deban, Dibata mbuka kesempaten pertobaten man sekalak golongan elite, menteri, guna bertobat ras iperdikdiken. Memang ibas Alkitab la ituriken kuga respon si enterem kerna kisah mentri e, janah la ituriken bahwa Saul pe menyiksa ia. Saja lit kemungkinen, kejadin e me si mendorong seh maka “berkobar-kobar hati Saul untuk mengancam dan membunuh murid Tuhan. Janah ipindona pe “surat kuasa” bas Imam Besar  rumah pertoton nari guna nangkap kerina kalak singikutken Tuhan i Damaskus. Ibas ayat 3 – 5, ituriken kerna komunikasi Dibata ras Saul, ope Saul seh ku Damaskus, guna mengeksekusi “Surat Kuasa” Imam si Mbelin ndai. Tuhan erlebuh man Saul. Sora ngenca ibegi Saul, rupa Dibata la iidahna.Ope terbegi sora e, lebe rempet langit terang ersinalsal isekelewetna,  ndabuh Saul ku taneh janah ibegina Sora. Sora e ngelebuh gelar Saul alu jelas. Ibas ayat 4b ras 5, ije terjadi proses “pengenalan” Saul nandangi Dibata. Dibata mpetandaken diriNa sebagai Jesus, siiayak-ayaki Saul. Alu kata si deban, Dibata menegaskan man Saul bahwa ngayaki pengikut Dibata seri kap e ras ngayaki Dibata. Ayat enda banci jadi pengapul man banta pe.Jenari arah pihak Saul, terjadi pengakuan si spontanitas ras berbeda 180 derajat arah pengakun ras perbahanenna sebelumna, iakui Saul Sora e Tuhan kap.  Saul seh ku bas titik nol, titik balik,  tupung perjumpanna ras Dibata arah sora si ngelebuh gelarna e. Ogen ibas kitab Masmur pe ncidahken uga pengarapen pemasmur man Tuhan, iidah Daud sendiri uga penemani Tuhan man kalak si bujur, ertina lit kemalamen ate kalak kempak kalak siernalem man Tuhan saja, aminna lit tantangan nggeluh tapi ras Tuhan ngenca datna kemalemen ate.

Refleksi :

Sora Dibata e menghasilkan pertobatan ras perubahen perilaku Saul. Sora Tuhan si erlebuh e ternyata labo ncakapken kerna perbahanen jahat  Saul bas masa laluna saja tapi justru iutus Dibata ia ku lokasi ija atena menyiksa masyarakat eme Damaskus. Jadi lit ije Pengutusan Dibata labo guna ngkernepken tapi menyelamatkan. Kita selaku kalak kristen. Kata Dibata labo terjeng ibegiken, tapi harus idalanken. Sebab kata Dibata la saja nuduhken dalan man banta, tapi pe mereken kegeluhen man banta (band. Matius 4:4). Sebab man banta kata Dibata la bo guna konsumsi pemeteh, tapi tuhu-tuhu guna konsumsi keselamatenta. Apai ka kita nggeluh ibas paksa enda, melala godaan-godaan sibanci mabai kita ndabuh ku bas dosa. Emaka adi la lit gelementa kerna kata Dibata maka ndabuh me kita ku bas dosa. Persoalenna genduari nterem kalak kristen meteh kerna pentingna kata Dibata ibas kegeluhenna, tapi la nggit megiken kata Dibata. Enda teridah ibas jarangna ia ku gereja, pjj ras PA kategorial, bagepe kurang ia beribadah i rumah. Menurut pengalaman erkiniteken, biasana kalak sibage mesuna kal ndabuh ku bas dosa. Adi sidalanken kata Dibata maka bas kita lit kekelengen eme sikelengi dirinta bagepe sikelengi kalak sideban. Ibas kita ngkelengi kalak sideban la saja terjeng ibabah tapi ipraktekken ibas perbahanen, tandana kita kalak sieragama (kalak kristen). Janah mprakteken kekelengen alu mehuli ndarat ibas pusuh siersuruh nari. Perbahanen sibage me sipegeluhken kita. Alu bage mari tetap sibegiken sora Tuhan e erlebuh.

BAHAN PJJ 24-30 APRIL 2022

(Manajemen Waktu)

Ogen   : Epesus 5:16-20

Tema  : Pergunaken Kesempaten Alu Mehuli

Rasul Paulus nulisken suratna man perpulungen i Epesus sanga ia i bas penjara. Epesus sebage ibukota propinsi janah selaku kota pelabuhan seh kal majuna. Patung Dewi Artemis pe seh kal tersenana i ja e ingan penembahen bage pe ilakoken perbahanen amoral (pelacuran). Lit 3 tahun dekahna Paulus ngelai i Epesus emaka mbages kal penandai Paulus kerna perpulungen e. Melala kal kata “OLA” sinipeseh Paulus man perpulungen Epesus erkiteken rusur kal ilakoken perpulungen enda si la mehuli. Labo ieteh perpulungen e makeken kesempaten alu mehuli adi la kin ietehna kesempaten eme pemere Tuhan. Uga makekensa waktu si ibereken e alu mehuli. Rasul Paulus ngajuk perpulungen Epesus gelah nggeluh perdiateken lagu langkah si mehuli ula bagi kalak motu. Uga kin kalak motu? La ia merhat iajarken ras ipersingeti. Lalap iakapna benar dalan si dalanina, adi lit kalak si la sendalanen ras ia entah pe mandang ia minter iakapna kalak sideban si salah, janah kalak motu la merincuh ngergai Kata Dibata sabap Kata Dibata mabai ku si mehuli (ay.15). Tapi kalak bujur, kalak si pentar nggit ia ndengkehken ajar, ngaloken nasehat ras metenget i bas geluhna. Paulus pe nuriangi kerna ngergaken waktu alu ngataken pergunakenlah kesempaten si lit i bas kam alu mehuli, sabap wari-wari enda la kap mehuli. Antusenna eme kerina tipu iblis si jahat guna nggagalken masa depan alu erbage-bage cara. Iblis meteh cara nipu gelah la seh bagi sinisuraken Tuhan geluh si mehuli. Emaka ula sia-siaken geluh e alu kesenangen kentisik, pergermetkenlah kai si ngena ate Tuhan. Waktu entah pe kesempaten e kentisik ngenca, si enggo jadi lanai banci iulihi. Alu bage ula timai kesempaten sideban guna ndahiken dahin si banci si dahiken sendah lakokenlah, ula tertaren-taren, ula terlale-lale. Kejahaten reh buena, tegnologi reh majuna emaka kalak si jahat pe reh buena. Erbage macam penipun, ngajuk kita reh metengetna makeken waktu ras kesempaten sinibereken Tuhan man banta.

Megati kal i bas sada-sada perjumpan, perpulungen entah pe acara enterem kalak mbela dirina adi ilakoken acara e la tepat waktu. Ikatakenna: “maklumlah kam ya bagem adi kalak Karo la pernah tepat waktu, si timai kentisik nari” nina padahal enggo lewat sada jam lebih acara e pe lenga ibenaken. Ergan lalap si akap kalak si lenga reh asangken kalak si enggo setia reh leben janah enggo ndekah ertima. Tentu adi bage lalap alasenta la kita nggit mpekena si la pas, emaka tetap kita la tepat waktu. Kita lebe menakensa tepat waktu, ukurkenlah maka tep-tep perjumpan e perlu kal kita i je, adi lenga kita reh la akap kalak meriah, bage min si akap gelah pedas kita reh ku bas perjumpanta. Meherga si akap dirinta, tentu meherga si akap waktu sinibereken Tuhan man banta. Kita nggeluh i bas ruang ras waktu, kerina sinidahiken kita, sinipikirken kita kerina merluken waktu, la lit sekalak pe i bas doni enda lepas arah waktu. Tubuh pe kita lit waktuna, kalak si mate pe lit waktuna, jam wari ras tanggal tahunna. Bagepe Tuhan njadiken kerina si lit i bas doni enda lit waktuna 6 wari erdahin sada wari istirahat. Kita nggeluh i bas waktu, tetap si dalani, tapi bagepe seh kal teremna jelma nia-niaken waktu, terlale-lale. Adi sedekah enda meriah denga si akap terlambat, menaken sendah ulanai si pebelin biak terlambat. Waktu e la pernah mulihken ngasa ndigan pe lanai, emaka pakekenlah kesempaten e alu mehuli. Man banta kerina ergakenlah dirinta alu ngergaken waktu si lit denga, tupung kita nageluh denga silakokenlan si mehuli. Adi si sadari maka waktu eme pemere Dibata, je me kita ngasup ngubahken kebiasan si la mehuli i bas nia-niaken waktu. Nina Thomas Adams: “kalak si nggit mereformasi dirina nggo melala ngereformasi kalak sideban, engkai maka doni enda la tereformasi erkiteken tep-tep jelma nuruh kalak sideban lebe berubah tapi dirina jine la ia nggit ngubahsa”. Emaka benakenlah perubahen i bas dirinta nari alu mpergunaken kesempaten alu mehuli ras tujun simehuli.